ប្រាក់រង្វាន់ពាន ACL2 ច្រើនជាងពាន ACL3 ទ្វេដង ខណៈកម្ពុជាបាន១កៅអីកន្លះរដូវកាលក្រោយ

ប្រាក់រង្វាន់នៅក្នុងពានរង្វាន់ AFC Champions League Two មានចំនួនច្រើនជាងពាន AFC Challenge League ទ្វេដង ខណៈនៅរដូវកាលក្រោយ ២០២៦-២០២៧ ក្រុមក្នុងលីគកំពូល កម្ពុជា ទទួលបាន ១កៅអីកន្លះ ដើម្បីប្រកួតនៅពានទ្វីប អាស៊ី កម្រិតទី ២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងលីគកំពូល កម្ពុជា មានក្រុម ព្រះខ័នរាជស្វាយរៀង មួយហើយ ដែលកក់កៅអីឡើងទៅលេងពាន ACL2 រដូវកាលក្រោយ បន្ទាប់ពីពួកគេយកឈ្នះក្រុម ភ្នំពេញក្រោន ៤-១ កាលពីថ្ងៃ សៅរិ៍ ទី ៤ កន្លងទៅ។ បច្ចុប្បន្នមាន ២ ក្រុម កំពុងប្រជែងគ្នាយកកន្លះកៅអី នោះគឺ ភ្នំពេញក្រោន និង អង្គរថាយហ្គើរ។ បច្ចុប្បន្ន ភ្នំពេញក្រោន ឈរលេខ ២ ក្នុងលីគ លើសពិន្ទុក្រុមលេខ ៣ អង្គរថាយហ្គើរ តែ ៣ ពិន្ទុប៉ុណ្ណោះ ស្របពេលការប្រកួតនៅសល់ ៥ ប្រកួតទៀត។

សម្រាប់ក្រុម ដែលបានកៅអីឡើងមកលេងពាន ACL2 ពិតជាទទួលបានអត្ថប្រយោជន៍ច្រើនមែនទែន។ ក្រុមបានចូលវគ្គចែកពូលនឹងទទួលបាន ៣០ ម៉ឺនដុល្លារអាមេរិក។ បើឈានចូលវគ្គ ១៦ ក្រុម នឹងទទួលបាន ៨ ម៉ឺនដុល្លារអាមេរិក, ឈានចូលវគ្គ ៨ ក្រុមនឹងទទួលបាន ១៦ ម៉ឺនដុល្លារអាមេរិក។

សម្រាប់ក្រុមបានឈានចូលវគ្គពាក់កណ្តាលផ្តាច់ព្រ័ត្រនឹងទទួលបាន ២៤ ដុល្លារអាមេរិក។ ក្រុមជើងឯករង នឹងទទួលបាន ១ លានដុល្លារអាមេរិក។ ចំណែកក្រុមក្លាយជាជើងឯក នឹងទទួលបាន ២.៥ លានដុល្លារអាមេរិក។

ចំនួននេះពិតជាច្រើនមែនទែន បើធៀបនឹងពាន ACGL ដែលក្រុម កម្ពុជា លេង ២ រដូវកាលកន្លងមក។ ក្រុមបានចូលដល់វគ្គចែកពូលនឹងទទួលបាន ១០ ម៉ឺនដុល្លារអាមេរិក។ ក្រុមបានឡើងដល់វគ្គ ៨ ក្រុម​ចុង​ក្រោយ នឹងទទួលបាន ៨ ម៉ឺនដុល្លារអាមេរិក​បន្ថែម​។

បើបានឡើងដល់វគ្គពាក់កណ្តាលផ្តាច់ព្រ័ត្រនឹងទទួលបាន ១២ ម៉ឺនដុល្លារអាមេរិកថែមទៀត។ ចុងក្រោយនៅវគ្គផ្តាច់ព្រ័ត្រ សម្រាប់ក្រុមណា ដែលឈ្នះជើងឯកនឹងទទួលបានប្រាក់រង្វាន់ ១ លានដុល្លារអាមេរិក ហើយក្រុមជើងឯករងនឹងទទួលបាន ៥០ ម៉ឺនដុល្លារអាមេរិក៕

អត្ថបទ៖ សេម កុសល