ព័ត៌មានអន្ដរជាតិ

ជនស៊ីវិលអ៊ីរ៉ង់ធ្វើរឿងដ៏ក្លាហានដែលទំនងធ្វើឲ្យត្រាំប្តូរចិត្តឈប់វាយប្រហារ ព្រោះខ្លាចជាប់ឧក្រិដ្ឋកម្មសង្គ្រាម

បានផុស

៣ សប្តាហ៍ មុន

នៅ

ថ្ងៃពុធ ៨ មេសា ២០២៦

ដោយ

រឿងរ៉ាវប្រជាជនអ៊ីរ៉ង់ប្រមូលផ្តុំគ្នាព័ទ្ធជុំវិញរោងចក្រថាមពល តាមបណ្តោយស្ពាននានា កំពុងផ្ទុះការចាប់អារម្មណ៍ខ្លាំង នៅក្រោយពេលដែលប្រធានាធិបតីសហរដ្ឋអាមេរិក លោក ដូណាល់ ត្រាំ ប្រកាសទទួលយកបទឈប់បាញ់ជាមួយអ៊ីរ៉ង់រយៈពេល២សប្តាហ៍ និង ទទួលយកលក្ខខណ្ឌរបស់អ៊ីរ៉ង់ដែលបានដាក់ចេញចំនួន១០ចំណុចសម្រាប់ដំណើរការចរចា។

ការផ្សព្វផ្សាយរបស់ភ្នាក់ងារព័ត៌មានអ៊ីរ៉ង់បង្ហាញឲ្យឃើញជនស៊ីវិលឈរការពាររោងចក្រថាមពលអគ្គិសនីនៅអ៊ីរ៉ង់។ IRNA

បណ្តាញសង្គមដែលកំពុងតែផ្ទុះនោះ បង្ហាញឲ្យឃើញថា ជនជាតិអ៊ីរ៉ង់រាប់ពាន់នាក់កំពុងបង្កើតជាខ្សែសង្វាក់មនុស្សជុំវិញរោងចក្រថាមពល ស្ពាន និងហេដ្ឋារចនាសម្ព័ន្ធផ្សេងទៀតរបស់ប្រទេសពួកគេ ក្នុងយុទ្ធនាការមួយដែលមានឈ្មោះថា «ខ្សែសង្វាក់មនុស្សរបស់យុវជនអ៊ីរ៉ង់សម្រាប់ថ្ងៃស្អែកដ៏ភ្លឺស្វាង» ដោយឈរកាន់ដៃគ្នាប្រឆាំងនឹងការគំរាមកំហែងដែលអ៊ីរ៉ង់មិនមែនចាប់ផ្តើមសង្គ្រាមនិងមិនសមនឹងទទួលបាន។

នៅពេលថ្ងៃ លោក ដូណាល់ ត្រាំ បានបង្ហោះសារព្រមានថា «អរិយធម៌ទាំងមូលនឹងស្លាប់នៅយប់នេះ» ប្រសិនបើអ៊ីរ៉ង់មិនបំពេញតាមការទាមទាររបស់ខ្លួនក្នុងការបើកច្រកសមុទ្រ Hormuz ឡើងវិញ ហើយ ការវាយប្រហាររបស់យោធាសហរដ្ឋអាមេរិកត្រូវគេរំពឹងថា នឹងធ្វើឡើងក្នុងប៉ុន្មានម៉ោងក្រោយមក ពោលគឺនៅយប់ថ្ងៃអង្គារ ដែលត្រូវព្រឹកថ្ងៃពុធម៉ោងនៅកម្ពុជា។

ប្រឈមស្ថានភាពស្លាប់-រស់ដ៏លំបាកស្មុគនេះ ប្រជាជនសាមញ្ញ គ្រូបង្រៀន សិស្ស និងអត្តពលិកដាក់ខ្លួនរបស់ពួកគេនៅចន្លោះភ្នំភ្លើងសង្គ្រាមរបស់ប្រទេសពួកគេ និងគ្រាប់បែកអាមេរិក។ នេះបើតាមផ្សព្វផ្សាយក្នុងបណ្តាញសង្គម អមដោយរូបភាពនៃការកាន់ដៃស្រាក់គ្នាបន្តយ៉ាងវែងនៅតាមទីតាំងនានា។

ខ្លឹមសារបរិយាយតាមបណ្តាញសង្គម បានលើកឡើងថា៖«គ្មានពាក្យណាគ្រប់គ្រាន់សម្រាប់ទុក្ខសោកនៃការមើលរឿងនេះទេ។ គ្មានទេ! ទាំងនេះគឺជាមនុស្សដែលកំពុងព្យាយាមការពារមន្ទីរពេទ្យរបស់ពួកគេ រោងចក្រប្រព្រឹត្តកម្មទឹករបស់ពួកគេ និងសមត្ថភាពរបស់កូនៗរបស់ពួកគេមានអនាគត»។

លោក ដូណាល់ ត្រាំ ក្នុងរយៈពេលប្រមាណ២ម៉ោងប៉ុណ្ណោះ មុនឱសានវាទផុតកំណត់ បានប្រកាសយល់ព្រមទទួលយកបទឈប់បាញ់រយៈពេល២សប្តាហ៍ ដែលចូលជាធរមានភ្លាមៗតែម្តង ហើយនៅក្នុងនោះ ក៏ព្រមទទួលយកលក្ខខណ្ឌ១០ចំណុចរបស់អ៊ីរ៉ង់សម្រាប់មូលដ្ឋានចរចា។

ងាកទៅភាគីអ៊ីរ៉ង់វិញ រដ្ឋមន្ត្រីការបរទេសអ៊ីរ៉ង់ Abbas Araghchi បានប្រកាសលើកឡើងអំពីលក្ខខណ្ឌ១៥ចំណុចដែលដាក់ចេញសម្រាប់បទឈប់បាញ់នេះដែរ។ ក្នុងរយៈពេល២សប្តាហ៍នៃបតឈប់បាញ់ ច្រក Hormuz នឹងបើកឡើងវិញសម្រាប់ការធ្វើនាវាចរណ៍ដោយសុវត្ថិភាព ប៉ុន្តែ អ៊ីរ៉ង់នឹងបិទច្រកនោះវិញ បើមានការវាយប្រហារជាបន្ត។

ក្នុងកម្រិតនយោបាយ គេឃើញថ្នាក់ដឹកនាំប៉ាគីស្ថាន បានប្រឹងប្រែងយ៉ាងខ្លាំងក្នុងការសម្របសម្រួលភាគីទាំងពីរដើម្បីធានាឲ្យមានបទឈប់បាញ់រយៈពេល២សប្តាហ៍នេះ និងការបើកច្រកតាមអ្វីដែលអាមេរិកចង់បាន។ ភាគីជម្លោះនឹងត្រូវជួបចរចាផ្ទាល់មុខនៅប្រទេសប៉ាគីស្ថាននៅថ្ងៃសុក្រខាងមុខនេះ៕

រ៉ាន់ រើយ