ព័ត៌មានអន្ដរជាតិ

អាមេរិក បញ្ចេញ យន្តហោះទម្លាក់គ្រាប់បែកនុយក្លេអ៊ែរ B-២១ Raider លើផ្ទៃមេឃដ៏កម្រ

បានផុស

២ ខែ មុន

នៅ

ថ្ងៃសុក្រ ១៧ មេសា ២០២៦

ដោយ

យន្តហោះទម្លាក់គ្រាប់បែកបំបាំងកាយរបស់សហរដ្ឋអាមេរិកម៉ាក B-២១ Raider មានសមត្ថភាពបាញ់ប្រហារនុយក្លេអ៊ែរគ្រប់ទីកន្លែងក្នុងពិភពលោកបានលេចរូបរាងហោះលើមេឃក្នុងពេលថ្មីៗនេះ ដែលមានតម្លៃជិត ៧០០ លានដុល្លារ ត្រូវបានថតជាលើកដំបូងដោយកងកម្លាំងអាមេរិក។

យោងតាមកាសែតអង់គ្លេស The Telegraph ផ្សាយថ្ងៃទី១៦ ខែមេសា ឆ្នាំ២០២៦ រូបភាពនៃការសាកល្បងចាក់ប្រេងពីលើអាកាសរបស់យន្តហោះនេះ គឺជាការមើលឃើញដ៏កម្រមួយដែលកំពុងស្ថិតក្នុងការសាកល្បង។ អ្នកជំនាញរំពឹងថា យន្តហោះនេះនឹងចូលបម្រើការជាផ្លូវការនៅឆ្នាំក្រោយ។

យន្តហោះ B-២១ Raider និងយន្តហោះដឹកប្រេងអាមេរិក។ រូបភាព៖ US Air Force

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មិនតែប៉ុណ្ណោះ យន្តហោះ B-២១ នឹងក្លាយជាយន្តហោះទម្លាក់គ្រាប់បែកបំបាំងកាយទំនើបបំផុតរបស់ពិភពលោក ហើយវានឹងជំនួសឱ្យយន្តហោះទម្លាក់គ្រាប់បែក B-២ បានបម្រើការអស់ជិត ៣០ឆ្នាំមកហើយ។

រូបថតដែលចេញផ្សាយដោយកងទ័ពអាកាសអាមេរិកបង្ហាញថា យន្តហោះទម្លាក់គ្រាប់បែក B-២១ Raider ហោះពីលើភ្នំក្នុងទីតាំងមួយដោយមិនបង្ហាញថា នៅឯណាទេ បន្ទាប់ពីមានយន្តហោះ KC-១៣៥ Stratotanker មួយគ្រឿងទៀត ហោះប្រកៀកគ្នា។

ការចាក់ប្រេងលើអាកាសរបស់យន្តហោះចម្បាំងគឺមានសារៈសំខាន់ណាស់ក្នុងជម្លោះណាមួយដែលអាចកើតមាន វាអាចឱ្យកងនាវាពង្រីកវិសាលភាពយ៉ាងខ្លាំង ដូចធ្លាប់បានបង្ហាញជាមួយនឹងការវាយប្រហារតាមអាកាសរបស់សហរដ្ឋអាមេរិកលើប្រទេសអ៊ីរ៉ង់ក្នុងពេលថ្មីៗនេះ។ យន្តហោះ B-២១ ផលិតដោយក្រុមហ៊ុន Northrop Grumman មានមូលដ្ឋាននៅរដ្ឋ Virginia ។

យន្តហោះទម្លាក់គ្រាប់បែកបំបាំងកាយថ្មីរបស់អាមេរិកម៉ាកនេះ ប្រើប្រាស់ប្រេងឥន្ធនៈត្រឹមតែមួយភាគតូចនៃប្រេងឥន្ធនៈដែលធ្លាប់បានប្រើសម្រាប់យន្តហោះ B-២ Spirit ពីមុនប៉ុណ្ណោះ។ វាបានក្លាយជាយន្តហោះទម្លាក់គ្រាប់បែកដែលសន្សំសំចៃប្រេងបំផុតមិនធ្លាប់មានពីមុនមក នេះបើយោងតាមយោធាអាមេរិក។

លោក Ken Wilsbach មេបញ្ជាកងទ័ពអាកាសអាមេរិកលើកឡើងថា៖ « យន្តហោះទម្លាក់គ្រាប់បែកវាយប្រហាររយៈចម្ងាយឆ្ងាយនេះនឹងកាត់បន្ថយតម្រូវការលើកងនាវាដឹកប្រេងរបស់យើងនិងបង្កើនសមត្ថភាពដើម្បីគាំទ្រដល់កងកម្លាំងរួម»។

ចំណែក លោក Stephen L Davis ប្រធានកងទ័ពអាកាសអាមេរិកបន្ថែមថា៖ « យន្តហោះនេះនឹងផ្តល់នូវជម្រើសការងារច្រើនប្រភេទនិងការទប់ស្កាត់ការវាយប្រហារនានាដែលប្រទេសយើងត្រូវការ។ សមត្ថភាពនេះធានាថាយើងអាចធ្វើការវាយប្រហាររយៈចម្ងាយឆ្ងាយដែលជ្រាបចូលគ្រប់ទីកន្លែងក្នុងពិភពលោកនៅពេលណាក៏បាន»៕

ប្រែសម្រួល៖ ណឺ មិនា

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា