ក្តីសង្ឃឹមសម្រាប់កម្ពុជា! ឱសថបុរាណដែលជាជំនួយរបស់ចិន មានប្រសិទ្ធភាពព្យាបាលរោគសញ្ញា ជំងឺកូវីដ-១៩

ឱសថបុរាណ Lianhua Qingwen ដែលរដ្ឋាភិបាលចិនប្រគល់ឲ្យកម្ពុជា គឺត្រូវបានអនុញ្ញាតឲ្យចុះបញ្ជីជាថ្នាំដើម្បីព្យាបាលរោគសញ្ញាដូចជាគ្រុនក្តៅ ក្អក ខ្សោយកម្លាំង ឈឺសាច់ដុំ តឹងច្រមុះ ហៀរសំបោរ ឈឺនិងស្ងួតបំពង់ក ដកដង្ហើមខ្លីនិងអណ្តាតឡើងក្រហម ដែលជារោគសញ្ញាបណ្តាលមកពីជំងឺដូចជាគ្រុនផ្តាសាយ, H1N1, SARS និងករណីស្រាលនិងមធ្យមនៃជំងឺកូវីដ-១៩ ហើយវាមានប្រសិទ្ធភាពនៃការលាងសួតនិងបន្សាបជាតិពុល។

ឱសថបុរាណនេះ ត្រូវបានផ្តល់ការអនុញ្ញាតឲ្យប្រើប្រាស់នៅក្នុងប្រទេសនានា ក្រៅពីប្រទេសចិនដើម្បីព្យាបាលរោគសញ្ញា ដែលបណ្តាលមកពីករណីស្រាលនិងមធ្យមនៃជំងឺកូវីដ-១៩។

Lianhua Qingwen គឺជាផលិតផលឈានមុខគេរបស់ក្រុមហ៊ុនឱសថ Yiling។ ចាប់តាំងពីការផ្ទុះឡើងនៃជំងឺកូវីដ-១៩មក វាត្រូវបានគេណែនាំឲ្យប្រើប្រាស់ដោយអាជ្ញាធរជាតិចិន និងសម្រាប់ការព្យាបាលនៅខេត្តជាង២០ក្នុង​ប្រទេសនេះ។

ថ្នាំនេះត្រូវបានគេប្រើយ៉ាងទូលំទូលាយនៅតាមមន្ទីរពេទ្យដែលចិន កំណត់សម្រាប់ការទទួលយកនិងព្យាបាលអ្នកជំងឺកូវីដ-១៩ ក្នុងអំឡុងពេលនៃការផ្ទុះឡើងនៅប្រទេសចិន។

លទ្ធផលនៃការសិក្សារួមគ្នាជាមួយមន្ទីរពេទ្យជាង២០លើការព្យាបាលជំងឺកូវីដ-១៩ជាមួយថ្នាំ Lianhua Qingwen នេះ ត្រូវបានចុះផ្សាយនៅក្នុងទស្សនាវដ្តី Phytomedicine។

វាត្រូវបានគេរកឃើញថា ថ្នាំនេះមានសុវត្ថិភាពនិងប្រសិទ្ធភាពក្នុងការព្យាបាលជំងឺកូវីដ-១៩ រួមផ្សុំជាមួយការព្យាបាលតាមបែបធម្មតា ព្រោះវាអាចកាត់បន្ថយរោគសញ្ញានៃជំងឺកូវីដ-១៩ ដូចជាគ្រុនក្តៅ អស់កម្លាំងនិងក្អក។ លើសពីនេះ វាជួយព្យាបាលការរលាកសួត កាត់បន្ថយរយៈពេលនៃការមានរោគសញ្ញានិងបង្កើនអត្រានៃការជាសះស្បើយ។

គិតមកទល់ពេលនេះ ថ្នាំ Lianhua Qingwen ត្រូវបានអនុញ្ញាតឲ្យចែកចាយទៅកាន់ទីផ្សារនៅក្នុង១៥ប្រទេសនិងតំបន់ រួមមានទាំងប្រេស៊ីល រ៉ូម៉ានី សិង្ហបុរីនិងហ្វីលីពីនផងដែរ។

ទោះបីជាយ៉ាងណាក៏ដោយ លោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល នៅថ្ងៃទី ២៩ ខែមេ​សានេះ បានថ្លែងបញ្ជាក់ថា ប្រភេទថ្នាំដែលរដ្ឋាភិបាលសារធារណរដ្ឋប្រជាមានិតចិន ផ្តល់ជំនួយ​ដល់កម្ពុជា ចំនួន ៨៨,០០០ប្រអប់ គឺជាប្រភេទ ឱសថបុរាណចិន ដែលមិនបានបញ្ជាក់ថាព្យាបាលជំងឺកូវីដ១៩ជានោះទេ។

លោកជំទាវបានថ្លែងថា “ក្រសួងសុខាភិបាលទទួលស្គាល់នេះគឺរបៀបដូចជាថ្នាំឱសថបុរាណផ្សេងៗទៀត ដែលតែងតែ​មក​សុំចុះបញ្ជិកា នៅក្នុងក្រសួងសុខាភិបាល។ គឺជាឱសថបុរាណចិន ហើយនៅក្នុង​លិខិតវិញ្ញា​បណ្ណ​បត្រទទួលស្គាល់ចុះបញ្ជិកានេះ ក៏មិនមានដាក់ថា ព្យាបាលជំងឺកូវីដ១៩ជានោះទេ”៕

ប្រែសម្រួលដោយ៖ Vann Vann

ប្រភព៖ Bio​ Space

ចុចអាន៖ ចិនផ្តល់ជំនួយឱសថបុរាណជិត ៩ម៉ឺនប្រអប់ដល់កម្ពុជា មិនមែនជាឱសថព្យាបាលជំងឺកូវីដ១៩