ចិនផ្តល់ជំនួយឱសថបុរាណជិត ៩ម៉ឺនប្រអប់ដល់កម្ពុជា មិនមែនជាឱសថព្យាបាលជំងឺកូវីដ១៩

លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល នៅថ្ងៃទី ២៩ ខែមេ​សានេះ បានថ្លែងបញ្ជាក់ថា ប្រភេទថ្នាំដែលរដ្ឋាភិបាលសារធារណរដ្ឋប្រជាមានិតចិន ផ្តល់ជំនួយ​ដល់កម្ពុជា ចំនួន ៨៨,០០០ប្រអប់ គឺជាប្រភេទ ឱសថបុរាណចិន ដែលមិនបានបញ្ជាក់ថាព្យាបាលជំងឺកូវីដ១៩ជានោះទេ។

លោកស្រីថ្លែងថា “ក្រសួងសុខាភិបាលទទួលស្គាល់នេះគឺរបៀបដូចជាថ្នាំឱសថបុរាណផ្សេងៗទៀត ដែលតែងតែ​មក​សុំចុះបញ្ជិកា នៅក្នុងក្រសួងសុខាភិបាល។ គឺជាឱសថបុរាណចិន ហើយនៅក្នុង​លិខិតវិញ្ញា​បណ្ណ​បត្រទទួលស្គាល់ចុះបញ្ជិកានេះ ក៏មិនមានដាក់ថា ព្យាបាលជំងឺកូវីដ១៩ជានោះទេ”។

រដ្ឋាភិបាល នៃសាធារណរដ្ឋប្រជាមានិតចិន នៅថ្ងៃទី ២៩ ខែមេសា ឆ្នាំ២០២១ បានផ្តល់ជំនួយជាឱសថបុរាណចិន Lianhua Qingwen Capsules ចំនួន ៨៨,០០០ប្រអប់ដល់កម្ពុជា ក្រោមកិច្ចសហប្រតិបត្តិការក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ។

ពិធីទទួលឱសថបុរាណចិន ធ្វើឡើងក្រោមវត្តមាន ឯកឧត្តម ម៉ម ប៊ុន ហេង រដ្ឋមន្ត្រីក្រសួងសុខាភិបាល ជាមួយលោក វ៉ាង វិនធៀន ឯកអគ្គរដ្ឋទូតវិសាមញ្ញ និងពេញ​សមត្ថភាពចិន ប្រចាំកម្ពុជា នៅព្រឹកថ្ងៃទី ២៩ ខែមេសា៕

អត្ថបទ៖ ឡេង ដេត