អ៊ីរ៉ង់ ថា ត្រាំ មាន​ជម្រើស​តែ​២គត់ គឺ​ ចរចាដោយសន្តិវិធី ឬចង់ជួបសង្គ្រាម ដែលមិនអាចយកឈ្នះ

រឿងរ៉ាវរវាងអាមេរិក និងអ៊ីរ៉ង់ បានឈានដល់ចំណុចតានតឹងបំផុតមួយ កាលពីថ្ងៃអាទិត្យកន្លងទៅនេះ បន្ទាប់ពីកងឆ្មាំបដិវត្តន៍អ៊ីរ៉ង់ បានចេញមុខមកដាក់សម្ពាធចំៗ ទៅកាន់លោកប្រធានាធិបតី ដូណាល់ ត្រាំ។

តាម​ការ​ផ្សាយ​របស់ France24 កាល​ពីថ្ងៃទី​៣ ខែ​ឧសភា ឆ្នាំ​២០២៦ ខាងអ៊ីរ៉ង់ បាននិយាយបែបឌឺដងថា ឥឡូវនេះ អាមេរិកគ្មានផ្លូវរើសច្រើនឡើយ គឺមានតែពីរផ្លូវគត់ ដោយ​ទីមួយ គឺត្រូវសុខចិត្តចុះកិច្ចព្រមព្រៀងជាមួយអ៊ីរ៉ង់តាមសម្រួល ឬទីពីរ គឺត្រូវបង្ខំចិត្តធ្វើសង្គ្រាមមួយ ដែលអ៊ីរ៉ង់អះអាងថា «មិនអាចទៅរួច» សម្រាប់អាមេរិកឡើយ។

ការចេញមុខមកនិយាយខ្លាំងៗ របស់អ៊ីរ៉ង់បែបនេះ ធ្វើឡើងបន្ទាប់ពីលោក ដូណាល់ ត្រាំ បានមើលងាយ និងបដិសេធចោលនូវផែនការសន្តិភាព ដែលអ៊ីរ៉ង់ទើបតែបានដាក់ស្នើ។ លោក ត្រាំ យល់ថា អ៊ីរ៉ង់នៅមិនទាន់បានសងតម្លៃឲ្យសមរម្យ ចំពោះកំហុសឆ្គង ដែលពួកគេបានធ្វើមកលើពិភពលោកក្នុងរយៈពេល ៤៧ឆ្នាំកន្លងមកនេះនៅឡើយទេ។ ជំហរដាច់ខាតរបស់លោក ត្រាំ បានធ្វើឲ្យ​អ៊ីរ៉ង់ខឹងសម្បារយ៉ាងខ្លាំង រហូតដល់ថ្នាក់ចេញមកព្រមានថា ជម្រើសសម្រាប់អាមេរិកកាន់តែរួមតូចទៅៗហើយ។

ខណៈពេលដែលមេដឹកនាំកំពុងតែឌឺដងដាក់គ្នា សង្គ្រាមសេដ្ឋកិច្ចក៏កំពុងតែឆេះយ៉ាងសន្ធោសន្ធៅដែរ។ អ៊ីរ៉ង់ បានប្រើវិធីបិទផ្លូវទឹកដឹកជញ្ជូនប្រេងសំខាន់ៗ ដើម្បីធ្វើឲ្យ​ពិភពលោកចលាចល ចំណែកអាមេរិកវិញ ក៏បានប្រើវិធីបិទផ្លូវសេដ្ឋកិច្ច ដើម្បីកុំឲ្យ​អ៊ីរ៉ង់មានលុយចាយ។ សូម្បីតែមន្ត្រីយោធាអ៊ីរ៉ង់ ក៏បានព្រមានដែរថា បើអាមេរិកហ៊ានប្រើកម្លាំងបាយ ពួកគេនឹងពន្លិចនាវាចម្បាំងអាមេរិកឲ្យ​ក្លាយ ជាផ្នូរកប់ក្រោមបាតសមុទ្រមិនខាន។

ទោះបីជាមានការគំរាមកំហែងគ្នាទៅវិញទៅមកយ៉ាងណាក៏ដោយ អ្នកដែលកំពុងដេកមិនលក់ បក់មិនល្ហើយ គឺប្រជាជនអ៊ីរ៉ង់ផ្ទាល់តែម្ដង។ ដោយសារតែជម្លោះនេះ ទំនិញគ្រប់យ៉ាងបានឡើងថ្លៃកប់ពពក ដែលធ្វើឲ្យ​ជីវភាពរបស់ពួកគេកាន់តែដុនដាប។ ប្រជាជនខ្លះ បាននិយាយថា ពួកគេកំពុងខំតស៊ូទ្រាំរស់ដោយសារតែមានមាស និងប្រាក់ដុល្លារ​សន្សំបន្តិចបន្តួចសម្រាប់គ្រាក្រ ប៉ុន្តែពួកគេបារម្ភថា ប្រសិនបើជម្លោះនេះនៅតែមិនចេះចប់មិនចេះហើយ ពួកគេនឹងគ្មានអ្វីសម្រាប់បន្តជីវិតទៀតឡើយ៕

ប្រែសម្រួល៖ ឈាង