ប្រធានសភា​អ៊ីរ៉ង់ ​ជះសម្តី​ទៅ​អាមេរិក​វិញ​ ដោយ​គ្មាន​កោត​ញញើត​សូម្បីបន្តិច​

ប្រធានសភាអ៊ីរ៉ង់ លោក Mohammad Bagher Galibaf បានប្រកាសកាលពីថ្ងៃចន្ទទី១១ ខែឧសភា ថា កងកម្លាំងប្រដាប់អាវុធរបស់ប្រទេសលោក បានត្រៀមខ្លួនរួចជាស្រេចដើម្បី «ផ្ដល់មេរៀន» ដែលមិនអាចបំភ្លេចបាន​ដល់​​​អ្នក​ឈ្លាន​ពានណាមួយ បន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បានព្រមានថា បទឈប់បាញ់ក្នុងតំបន់​មជ្ឈិមបូព៌ា កំពុងស្ថិតក្នុងស្ថានភាពប្រកាសអាសន្នបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន Anadolu របស់តួកគី​ បាន​ស្រង់​​ការ​បង្ហោះលើបណ្ដាញសង្គម X​ របស់​ លោក Galibaf ​ដែលសរសេរ​ថា​៖ «កងកម្លាំងប្រដាប់អាវុធរបស់យើងបានត្រៀមខ្លួនជាស្រេចដើម្បីឆ្លើយតប និងផ្ដល់មេរៀនចំពោះរាល់ការឈ្លានពានណាមួយ។ យុទ្ធសាស្ត្រខុស និងការសម្រេចចិត្តដ៏អាក្រក់ តែងតែនាំទៅរកលទ្ធផលអាក្រក់ ហើយពិភពលោកបានយល់ច្បាស់អំពីរឿងនេះរួចហើយ»។ ។

យ៉ាងណាមិញ នៅក្នុងការបង្ហោះដាច់ដោយឡែកមួយទៀត ប្រធានសភាអ៊ីរ៉ង់​រូប​នេះ បានលើកឡើងថា «គ្មានជម្រើសផ្សេង» ក្រៅពីការទទួលយកសិទ្ធិរបស់ប្រជាជនអ៊ីរ៉ង់ ដូចដែលបានចែងនៅក្នុងសំណើ ១៤ ចំណុចរបស់ទីក្រុងតេហេរ៉ង់នោះទេ។ រាល់វិធីសាស្ត្រផ្សេងពីនេះ នឹងមិនទទួលបានលទ្ធផលអ្វីទាំងអស់ ពោលគឺគ្មានអ្វីក្រៅពីការបរាជ័យម្តងហើយម្តងទៀតនោះឡើយ។ ជាក់ស្ដែង «ពួកគេកាន់តែអូសបន្លាយពេលយូរវាកាន់តែអាក្រក់ ហើយអ្នកបង់ពន្ធជនជាតិអាមេរិក នឹងត្រូវចំណាយកាន់តែច្រើនសម្រាប់រឿងនេះ»។

ការលើកឡើងនេះបានកើតឡើង បន្ទាប់ពីលោកប្រធានាធិបតី ដូណាល់ ត្រាំ បានថ្លែងកាលពីថ្ងៃចន្ទ ថា បទឈប់បាញ់ជាមួយអ៊ីរ៉ង់បច្ចុប្បន្នកំពុង «ស្ថិតក្នុងស្ថានភាពគ្រោះថ្នាក់បំផុត» បន្ទាប់ពីលោកបានទាត់ចោលការឆ្លើយតបរបស់ទីក្រុង​តេហេរ៉ង់ ចំពោះសំណើស្វែងរកសន្តិភាពរបស់អាមេរិក ដោយលោកចាត់ទុកថា ជាការឆ្លើយតបដ៏ «ល្ងង់ខ្លៅ»។

មិនតែប៉ុណ្ណោះ ការបដិសេធយ៉ាងរហ័សរបស់លោក ត្រាំ ក៏បានបង្កឲ្យមានការព្រួយបារម្ភកាន់តែខ្លាំង​ឡើង​​ថា ជម្លោះដែលបានអូសបន្លាយរយៈពេល ១០សប្តាហ៍មកនេះ នឹងបន្តអូសទាញ និងធ្វើឲ្យចរាចរណ៍នាវាចរណ៍តាមច្រកសមុទ្រ Hormuz បន្តជាប់គាំង​ដ៏​អាក្រក់​​​​។

ជាមួយគ្នានេះ ​លោក ត្រាំ ក៏ត្រូវបានរំពឹងថា នឹងរៀបចំកិច្ចប្រជុំកម្រិតខ្ពស់ជាមួយក្រុមការងារសន្តិសុខជាតិរបស់លោក នៅថ្ងៃចន្ទដដែល ដើម្បីពិភាក្សាអំពីជម្រើសនៃការវាយប្រហារដែលអាចកើតមាន បន្ទាប់ពីបទឈប់បាញ់រយៈពេលប៉ុន្មានសប្តាហ៍កន្លងមក ដែលធ្លាប់បានធ្វើឲ្យការវាយប្រហាររវាងអាមេរិក និងអ៊ីរ៉ង់ត្រូវផ្អាកមួយរយៈធំនោះ បានឈានមកដល់ភាពរកាំរកូសជាថ្មី៕

អត្ថបទ៖ សាង ស្រីល័ក្ខ

របាយការណ៍អាមេរិក៖ មេដឹកនាំកំពូល​ អ៊ីរ៉ង់ Mojtaba កំពុងក្ដាប់យុទ្ធសាស្ត្រសង្គ្រាម​យ៉ាងសម្ងាត់​