២៦ ប្រទេស ចេញមុខគាំទ្រឲ្យ​បើកច្រក Hormuz ឡើងវិញ និងត្រៀមប្រើកម្លាំងបោសសម្អាតមីន

ចំពេលដែលភាពតានតឹងផ្នែកយោធាកំពុងកើនឡើងនៅជុំវិញច្រកសមុទ្រ Hormuz មេដឹកនាំនៃ ២៦ ប្រទេសជុំវិញពិភពលោក នៅថ្ងៃទី ១៥ ខែឧសភា នេះ បានអំពាវនាវដោយធ្វើឲ្យស្ថានភាពនៅច្រកសមុទ្រនេះវិលទៅរកភាពប្រក្រតីឡើងវិញ និងបានបង្ហាញសញ្ញាបង្អួតកម្លាំងក្នុងទម្រង់ជាប្រតិបត្តិការយោធាចម្រុះជាតិសាសន៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចងក្រងទិន្នន័យពីសេចក្តីប្រកាសរបស់រដ្ឋាភិបាលអង់គ្លេស និងរបាយការណ៍ប្រព័ន្ធផ្សព្វផ្សាយបរទេសធំៗ រួមទាំងទូរទស្សន៍ CNN ផងនោះ មេដឹកនាំនៃ ២៦ ប្រទេស រួមមាន កូរ៉េខាងត្បូង, អង់គ្លេស, បារាំង, អាល្លឺម៉ង់ និងជប៉ុន បានចេញសេចក្តីថ្លែងការណ៍រួមមួយ កាលពីថ្ងៃទី ១៤ ខែឧសភា ដោយបញ្ជាក់ថា៖ «យើងនឹងរួមគ្នាកៀរគរសមត្ថភាពការទូត សេដ្ឋកិច្ច និងយោធា ដើម្បីគាំទ្រដល់សេរីភាពនៃការធ្វើនាវាចរណ៍នៅក្នុងច្រកសមុទ្រ»។

នៅក្នុងសេចក្តីថ្លែងការណ៍រួមនោះ បណ្តាប្រទេសទាំងនេះបានសង្កត់ធ្ងន់ថា សេរីភាពនៃការដឹកជញ្ជូនទំនិញតាមកប៉ាល់ពាណិជ្ជកម្ម គឺជាសិទ្ធិស្នូលដែលត្រូវបានធានាដោយអនុសញ្ញាអង្គការសហប្រជាជាតិស្តីពីច្បាប់សមុទ្រ និងច្បាប់អន្តរជាតិ។ ពួកគេក៏បានព្រមព្រៀងគ្នាផងដែរថា ពួកគេ «គាំទ្រដល់បេសកកម្មយោធាចម្រុះជាតិសាសន៍ក្នុងទម្រង់ការពារសុទ្ធសាធ ដើម្បីការពារកប៉ាល់ស៊ីវិល រួមទាំងការបោសសម្អាតមីនផងដែរ»។

យោងតាមសេចក្តីជូនដំណឹងរបស់រដ្ឋាភិបាលអង់គ្លេស ការដាក់ពង្រាយកម្លាំងនេះនឹងដាច់ដោយឡែកពីយុទ្ធនាការផ្សេងទៀតដែលមាននិន្នាការវាយលុក ហើយនឹងត្រូវធ្វើឡើងក្នុងទម្រង់គាំទ្រដល់កិច្ចខិតខំប្រឹងប្រែងបន្ធូរបន្ថយភាពតានតឹងតាមផ្លូវការទូត។ ប្រតិបត្តិការនេះត្រូវបានគ្រោងនឹងចាប់ផ្តើមនៅពេលដែលបរិយាកាសប្រតិបត្តិការអំណោយផល ដោយអនុលោមទៅតាមរដ្ឋធម្មនុញ្ញ និងនីតិវិធីសភារបស់ប្រទេសនីមួយៗ។

មិនតែប៉ុណ្ណោះ ទាំងអាមេរិក និងចិន ក៏កំពុងផ្តល់ការគាំទ្រយ៉ាងខ្លាំងដល់ការបើកច្រកសមុទ្រនេះផងដែរ។ បន្ទាប់ពីបានពិភាក្សាការងារជាមួយលោក ស៊ី ជីនពីង នៅក្នុងកិច្ចប្រជុំកំពូលនៅទីក្រុងប៉េកាំងកាលពីថ្ងៃមុន លោក ត្រាំ បានថ្លែងភ្លាមៗបន្ទាប់ពីជំនួបនោះថា «ប្រធានាធិបតី ស៊ី ចង់ឲ្យច្រកសមុទ្រ Hormuz បើកឡើងវិញ» ដោយលោកបានបន្ថែមថា «លោក ស៊ី ក៏បានសម្តែងការត្រៀមខ្លួនរួចជាស្រេចក្នុងការជួយជ្រោមជ្រែងដើម្បីឈានទៅរកកិច្ចព្រមព្រៀងជាមួយប្រទេសអ៊ីរ៉ង់ផងដែរ»។

ជាមួយនឹងស្ថិរភាពនៃផ្លូវពាណិជ្ជកម្មដែលត្រូវបានលើកយកមកជជែកយ៉ាងយកចិត្តទុកដាក់តាមរយៈការយល់ឃើញរបស់មេដឹកនាំទាំងពីរ កិច្ចខិតខំប្រឹងប្រែងការពារជាតិចម្រុះ ត្រូវបានរំពឹងថានឹងទទួលបានកម្លាំងរុញច្រានកាន់តែខ្លាំង៕

អត្ថបទ៖ សាង ស្រីល័ក្ខ

នាយករដ្ឋមន្ត្រី ឡេតូនី ប្រកាសលាលែងពីតំណែង ក្រោយ​​ហេតុការណ៍​​រុស្ស៊ី​បង្វែរ​ដ្រូន​​អ៊ុយក្រែន​​​ហោះចូល​ដែន​អាកាស​​