ហូឡង់ ត្រៀម​បញ្ជូននាវាសម្រាប់ដោះ​មីន ទៅ​ច្រក Hormuz ពេល​ភាគីជម្លោះព្រមព្រៀងគ្នា​

រដ្ឋាភិបាល​ហូឡង់ នឹងបញ្ជូននាវា​ដោះ​មីនមួយគ្រឿង ទៅកាន់សមុទ្រមេឌីទែរ៉ាណេ ដែលជាផ្នែកមួយនៃ​​ការ​ត្រៀម​​ប្រតិបត្តិការរបស់អង្គការណាតូ ដើម្បីអនុញ្ញាតឲ្យមានការដាក់ពង្រាយកម្លាំងឲ្យ​បានយ៉ាងរហ័ស ទៅកាន់ច្រកសមុទ្រ Hormuz ប្រសិនបើមានការព្រមព្រៀងលើបេសកកម្មនៅទីនោះ ក្រោយពេលដែលសង្គ្រាម​នៅ​​អ៊ីរ៉ង់ត្រូវបានបញ្ចប់។ នេះបើយោងតាមសម្ដីរបស់ក្រុមរដ្ឋមន្ត្រីបានបញ្ជាក់នៅក្នុងលិខិតផ្ញើជូនសភា កាលពីថ្ងៃពុធ ទី២៧ ខែឧសភា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លិខិតរួមគ្នារបស់រដ្ឋមន្ត្រីក្រសួងការពារជាតិ លោកស្រី Dilan Yesligoz និងរដ្ឋមន្ត្រីក្រសួងការបរទេស លោក Tom Berendsen បានឲ្យដឹងថា នាវាបោសសម្អាតមីនដែលនឹងចាកចេញនៅសប្តាហ៍នេះ នឹងអាចចូលរួមចំណែកក្នុងក្រុមការងារប្រឆាំងមីន​ដែនសមុទ្រអចិន្ត្រៃយ៍របស់អង្គការណាតូ ចាប់ពីពាក់កណ្តាលខែមិថុនាតទៅ។

រដ្ឋមន្ត្រីទាំងពីររូប បានអះអាង​ក្នុងលិខិត​​បន្ថែមទៀតថា ការរៀបចំត្រៀមលក្ខណៈកំពុងត្រូវបានធ្វើឡើង សម្រាប់តួនាទីដែលអាចទៅរួចរបស់ប្រទេសហូឡង់ ក្នុងការធានាសុវត្ថិភាពនៃផ្លូវនាវាចរណ៍នៅក្នុងតំបន់ឈូងសមុទ្រ។ នេះបើយោងតាមការចេញផ្សាយពីទីភ្នាក់ងារសារព័ត៌មាន Reuters។

ដោយឡែក ប្រមុខអង្គការណាតូ លោក Mark Rutte បានថ្លែងថា ប្រទេសមួយចំនួនកំពុង «ដាក់ពង្រាយទុកជាមុន» នូវកងកម្លាំងភស្តុភារ និងការគាំទ្រផ្សេងៗទៀត ដូចជានាវាស្វែងរកមីន និងនាវាបោសសម្អាតមីន នៅជិតតំបន់ឈូងសមុទ្រ ដើម្បីត្រៀមខ្លួនជាស្រេចសម្រាប់បេសកកម្មដែលអាចកើតមានណាមួយ នៅក្នុងច្រកសមុទ្រ Hormuz ដែលជាផ្លូវទឹកសកលដ៏សំខាន់បំផុតសម្រាប់ការដឹកជញ្ជូនប្រេង និងឧស្ម័ន។

ជាក់ស្ដែង ជម្រើសមួយសម្រាប់ប្រទេសហូឡង់ គឺអាចដាក់ពង្រាយក្រុមចម្រុះសម្រាប់ការរុករក ការមុជទឹក និងការកម្ទេចគ្រាប់រំសេវមិនទាន់ផ្ទុះ។

លិខិតនោះក៏បានបញ្ជាក់ផងដែរថា ប្រទេសហូឡង់កំពុងវាយតម្លៃថា តើខ្លួនអាចរួមចំណែកផ្តល់កម្លាំងបុគ្គលិក ដល់សម្ព័ន្ធភាពអន្តរជាតិនានា ដែលចូលរួមក្នុងបេសកកម្មនេះដែរឬទេ?

អត្ថបទ ៖ សាង ស្រីល័ក្ខ