ក្រោយ​ឈ្នះ​ជើង​ឯក​ក្នុង​ស្រុក លោក អ៊ឹង ស៊ីវឈន់ ប្តេជ្ញាជួយ​​ក្រុម Pro Esports ដើម្បី​ពាន​អន្តរជាតិ

ក្រុម​កីឡា​អេឡិចត្រូនិក Pro Esports បាន​ឈ្នះ​ជើង​ឯក​លីគ​អាជីព MPL Cambodia រដូវ​កាល​ទី​១០ បន្ទាប់​ពី​មិន​ជោគជ័យ​សោះ​ក្នុង​រយៈ ៦ រដូវ​កាល​មុន។

ក្រុម Pro Esports មិន​ស្គាល់​បរាជ័យ​សោះ​សម្រាប់ការ​ប្រកួត​វគ្គ​សន្សំពិន្ទុ​ក្នុង​ពូល​ដោយ​បាន​ឈ្នះ​ទាំង ៩ ប្រកួត និង​ខ្វែង​បាន​ឈ្នះ​ក្រុម Vigor Apex ដោយ​លទ្ធផល ៣-២ ប៉ុន្តែ​បានចាញ់​ក្រុម Galaxy Legends វគ្គ​ខ្វែង​ចុងក្រោយ​ ដោយ​លទ្ធផល ០-៣។ ទោះ​បី​ជា​យ៉ាង​ណា នៅ​វគ្គ​ខ្វែង​កម្រិត​ទាប ពួក​គេ​បាន​ឈ្នះ​ក្រុម CFU Gaming ដោយ​លទ្ធ​ផល​តឹង​តែ ៤-៣ ហើយ​បាន​ឡើង​ទៅ​កាន់​វគ្គ​ផ្តាច់​ព្រ័ត្រ សង​សឹក​លើក្រុម​ Galaxy Legends បាន​សម្រេច​ដោយ​លទ្ធផល ៤-០ ដើម្បី​ក្លាយ​ជា​ជើង​ឯក​លើក​ដំបូង​ក្នុង​ប្រវត្តិ​សាស្ត្រ​របស់​ខ្លួន។

ក្រោយ​គ្រង​ជើង​ឯក លោក អ៉ឺង ស៊ីវឈន់ ដែល​ជា​ស្វាមី​របស់​​ព្រះអង្គម្ចាស់ក្សត្រី នរោត្តម ពង្សសូរិយា បានប្តេជ្ញា​​ពង្រឹង​ក្រុម​ Pro Esports ឲ្យ​កាន់​តែ​ល្អ​ប្រសើរ​ដើម្បីស្វែង​រក​​​​ពាន​រង្វាន់​អន្តរជាតិ​ជូន​ជាតិ​កម្ពុជា។

លោក​មាន​ប្រសាសន៍​ថា ៖«យើង​នឹង​ព្យាយាម​ក្រុម​ឲ្យ​អស់​ពី​សមត្ថភាព​ដើម្បី​ស្វែង​រក​ពាន​រង្វាន់ជូន​កម្ពុជា​នៅ​​លើ​ឆាក​​អន្តរជាតិ។ គោល​ដៅ​របស់​យើង​នៅ​ក្នុង​ស្រុក​គឺ​បាន​កើត ១០០ % ហើយ​ បើ​ទោះ​ជា​យើង​មាន​បញ្ហា​តិច​តូច​ក៏​ដោយ។ យើង​អត់​ចុះ​ចាញ់ ហើយ​កែ​កំហុស ធ្វើ​ឲ្យ​យើង​ទទួល​បាន​ជោគជ័យ»។

លោក​បាន​បន្ថែម​ថា បន្ទាប់​ពី​បរាជ័យ​ដល់ទៅ​ ៦ រដូវ​កាល​កន្លង​ទៅ លោក​បាន​ព្យាយាម​កែ​ប្រែ និង​ផ្លាស់​ប្តូរសមាជិក​កីឡាករ​មួយ​ចំនួន ហើយ​ពង្រឹង​ស្មារតី​ក្រុម​ដែល​បាន​ធ្វើ​ឲ្យ​សម្រេច​​គោល​ដៅ។​

សូម​បញ្ជាក់​ថា លោក អ៉ឹង​ ស៊ីវឈន់​ ស្ថាបនិកក្រុម​កីឡា​អេឡិចត្រូនិក Pro Esports ​បាន​ឈ្នះ​ជើង​ឯក​លីគ​អាជីព MPL Cambodia ជា​លើក​ដំបូង បន្ទាប់​ពី​បរាជ័យ​ចំនួន ៦ រដូវ​កាល​មក​ហើយ។ ក្នុង​នាម​ជា​ជើង​ឯក​រដូវ​កាល​ទី​១០​នេះ ក្រុម Pro Esports ត្រូវ​ចេញ​ទៅ​ប្រកួត​ជើង​ឯកក្លិប​ពិភព​លោក នៅ​ប្រទេស​អារ៉ាប៊ីសាអ៊ូឌីត៕

អត្ថបទ៖ វិរបុត្រ