ព័ត៌មានជាតិ

របាយការណ៍ WFP៖ កម្ពុជាបង្ហាញជំហររឹងមាំក្នុងការគ្រប់គ្រងកម្មវិធីអាហារតាមសាលារៀន

បានផុស

២ ខែ មុន

នៅ

ថ្ងៃអង្គារ ១៩ ឧសភា ២០២៦

ដោយ

របាយការណ៍ចុងក្រោយវាយតម្លៃពាក់កណ្តាលអាណត្តិ (Midterm Evaluation Report) ដែលទើបចេញផ្សាយដោយកម្មវិធីស្បៀងអាហារពិភពលោក (WFP) បានឱ្យដឹងថាកម្ពុជាមានជំហររឹងមាំក្នុងការគ្រប់គ្រងកម្មវិធីអាហារតាមសាលារៀន ខណៈដែលជំនួយស្បៀងអាហារអន្តរជាតិ McGovern-Dole របស់ក្រសួងកសិកម្មសហរដ្ឋអាមេរិក (USDA) សម្រាប់ឆ្នាំ២០២២-២០២៧ កំពុងឈានចូលពាក់កណ្ដាលអាណត្តិចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរបាយការណ៍នោះ WFP ថាពេលនេះកម្ពុជាកំពុងជំរុញល្បឿនក្នុងការទទួលយកការផ្ទេរការគ្រប់គ្រងកម្មវិធីផ្ដល់អាហារតាមសាលារៀនមកក្រោមការគ្រប់គ្រងរបស់ខ្លួនដែលអាចមើលឃើញតាមរយៈការបង្កើនថវិកាជាតិ និងពង្រឹងហេដ្ឋារចនាសម្ព័ន្ធនៃកម្មវិធីនៅតាមសាលារៀនរបស់ខ្លួន។

ការសម្រេចបានការអនុម័តជាផ្លូវការនូវគោលនយោបាយជាតិស្ដីពីការផ្ដល់អាហារតាមសាលារៀន ២០២៤-២០៣៥ គឺជាផែនទីចង្អុលផ្លូវដ៏សំខាន់មួយ ហើយការបង្កើតនូវរចនាសម្ព័ន្ធអភិបាលកិច្ចអន្តរក្រសួងមួយដែលចងក្រងក្រសួងស្ថាប័នជាតិ១១ ដើម្បីធានាដល់និរន្តរភាពនៃកម្មវិធីនេះផងដែរ។

ក្នុងរបាយការណ៍នោះសរសេរបន្ថែមផងដែរថា៖ «រដ្ឋាភិបាលបានគោរពការប្តេជ្ញាចិត្តរបស់ខ្លួនក្នុងការផ្តល់ធនធានគ្រប់គ្រាន់សម្រាប់ផ្គត់ផ្គង់អាហារដល់សាលារៀនដែលបានប្រគល់ជូន។ រហូតមកដល់ពេលនេះ ថវិកាបានគ្របដណ្តប់តែលើការទិញស្បៀងប៉ុណ្ណោះ ប៉ុន្តែចាប់ពីឆ្នាំ ២០២៦ វានឹងពង្រីកវិសាលភាពគ្របដណ្តប់លើការកែលម្អហេដ្ឋារចនាសម្ព័ន្ធ និងការរួមចំណែកផ្ដល់ប្រាក់លើកទឹកចិត្តរបស់ចុងភៅផងដែរ»។

គិតត្រឹមដំណាក់កាលពាក់កណ្តាលអាណត្តិនេះ កម្មវិធីផ្តល់អាហារតាមសាលារៀនត្រូវបានផ្ទេរចេញពីការគ្រប់គ្រងរបស់ USDA និង WFP ទៅឱ្យរដ្ឋាភិបាលបានចំនួន ១៩៦ សាលារួចហើយ ក្នុងចំណោមសាលាគោលដៅសរុបក្នុងគម្រោងចំនួន ៥១០ ខណៈដែលការផ្ទេរទាំងស្រុង ១០០ ភាគរយ ត្រូវបានរំពឹងថានឹងបញ្ចប់នៅឆ្នាំ២០២៨ ខាងមុខ។

ទោះជាយ៉ាងណា WFP ក៏មើលឃើញនូវបញ្ហាប្រឈមមួយចំនួនផងដែរបន្ទាប់ពីការផ្ទេរទៅឱ្យរដ្ឋនេះគឺទាក់ទងនឹង កង្វះថវិកាសម្រាប់ការតាមដាន (M&E) លើថវិកាដែលរដ្ឋទម្លាក់មកផ្គត់ផ្គង់ក្នុងកម្មវិធីនេះ ការផ្លាស់ប្ដូរបុគ្គលិកថ្នាក់ក្រោមជាតិ ធ្វើឱ្យប៉ះពាល់ដល់និរន្តរភាពនៃការបណ្តុះបណ្តាលសមត្ថភាពគ្រប់គ្រងប្រព័ន្ធទិន្នន័យ (SFIS)។

បច្ចុប្បន្ន តួនាទីរបស់ WFP ប្រចាំកម្ពុជាបានកែប្រែទម្រង់យ៉ាងខ្លាំង ដោយដកខ្លួនចេញពីការចែកស្បៀងផ្ទាល់ ហើយងាកមកធ្វើជាអ្នកផ្តល់ប្រឹក្សាបច្ចេកទេសកម្រិតខ្ពស់ និងបណ្តុះបណ្តាលមន្ត្រីរាជការវិញ ដើម្បីធានាថាពេលដែលជំនួយបរទេសអស់ទាំងស្រុង មន្ត្រីខ្មែរនៅតែមានសមត្ថភាពគ្រប់គ្រងប្រព័ន្ធភស្តុភារដ៏ស្មុគស្មាញនេះបានដោយខ្លួនឯង។

គួរឱ្យដឹងផងដែរថា គម្រោងកម្មវិធីតាមសាលារៀនដែលជាជំនួយរបស់ក្រសួងកសិកម្មសហរដ្ឋអាមេរិកនឹងបញ្ចប់នៅឆ្នាំ២០២៧ខាងមុខ ក្នុងកញ្ចប់ជំនួយ២១លានដុល្លារ ដែលអនុវត្តក្នុងសាលារៀនចំនួន៥១០ក្នុងខេត្តចំនួន៣គឺកំពង់ឆ្នាំង កំពង់ធំ និងសៀមរាប ដែលមានកុមារទទួលផលសរុបចំនួន ៩៤ ០១៨នាក់។

បច្ចុប្បន្នមានកុមារជាង៣០ម៉ឺននាក់ នៅសាលា ១ ១១៤ កំពុងទទួលបានអត្ថប្រយោជន៍ពីកម្មវិធីដូចគ្នានេះទូទាំងប្រទេស ខណៈរដ្ឋាភិបាលបានប្រកាសដាក់ឱ្យអនុវត្តជាផ្លូវការនូវ «ផែនការសកម្មភាពអនុវត្តគោលនយោបាយស្តីពី ការផ្តល់អាហារតាមសាលារៀន ឆ្នាំ២០២៤–២០៣០» កាលពីចុងខែមីនាកន្លងទៅ៕

អត្ថបទដោយ ហ៊ុន សិរីវឌ្ឍន៍