ព័ត៌មានអន្ដរជាតិ

ជំនួយការលោក ពូទីន៖ រុស្ស៊ីនិងចិន នៅថ្ងៃពុធនេះ នឹងចុះកិច្ចព្រមព្រៀងប្រហែល៤០

បានផុស

២ ខែ មុន

នៅ

ថ្ងៃពុធ ២០ ឧសភា ២០២៦

ដោយ

នៅថ្ងៃពុធទី២០ខែឧសភានេះ ប្រមុខដឹកនាំរុស្ស៊ី លោក វ្ល៉ាឌីមៀ ពូទីន និងសមភាគីចិន លោក ស៊ី ជីនពីង កំពុងដឹកនាំប្រតិភូរៀងៗខ្លួន ដើម្បីពិភាក្សាគ្នាលើបញ្ហាទ្វេភាគី និងបញ្ហាសកលលោក ដែលតាមមន្ត្រីរបស់ទីក្រុងមូស្គូ បានអះអាងថា កិច្ចព្រមព្រៀងយ៉ាងហោចណាស់៤០ នឹងត្រូវចុះហត្ថលេខា ក្រោមវត្តមានរបស់ប្រមុខរដ្ឋទាំងពីរ។

ប្រធានាធិបតីចិន ស៊ី ជីនពីង ស្វាគមន៍ លោក ពូទីន នៅទីក្រុងប៉េកាំង នៅព្រឹកថ្ងៃទី២០ខែឧសភា ២០២៦។ REUTERS

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំណើរទស្សនកិច្ចរបស់ប្រធានាធិបតីរុស្ស៊ី លោក វ៉្លាឌីមៀរ ពូទីន ទៅកាន់ទីក្រុងប៉េកាំងនៅពេលនេះ កើតមានជួនពេលគ្នាដែលប្រធានាធិបតីសហរដ្ឋអាមេរិក លោក ដូណាល់ ត្រាំ ទើបបញ្ចប់ទស្សនកិច្ច និង ស្របពេលជាមួយនឹងខួបលើកទី២៥ នៃសន្ធិសញ្ញាទ្វេភាគីរុស្ស៊ី-ចិន ដែលលោក ពូទីន បរិយាយថា «ជាមូលដ្ឋានស្តីពីភាពជាអ្នកជិតខាងល្អ និងកិច្ចសហប្រតិបត្តិការមិត្តភាព» និងខួបលើកទី៣០ នៃការបង្កើតភាពជាដៃគូយុទ្ធសាស្ត្រចិន-រុស្ស៊ី សម្រាប់ការសម្របសម្រួលសម្រាប់សតវត្សរ៍ទី ២១។

យោងតាមការចេញផ្សាយរបស់ទីភ្នាក់ងារព័ត៌មានរុស្ស៊ី TASS លោក Yury Ushakov ជាជំនួយការប្រធានាធិបតីរុស្ស៊ី បាននិយាយថា ប្រទេសទាំងពីរមានគម្រោងចុះហត្ថលេខាលើឯកសារប្រហែល ៤០ ដែលក្នុងនោះ ២១ នឹងត្រូវចុះហត្ថលេខានៅចំពោះមុខប្រធានាធិបតីទាំងពីរ។

លោក ពូទីន បានទៅដល់ទីក្រុងប៉េកាំងនៅវេលាអាធ្រាត្រនៃយប់ថ្ងៃអង្គារ ហើយ ការពិភាក្សាពេញលេញនិងផ្លូវការនឹងប្រព្រឹត្តទៅនៅថ្ងៃពុធនេះ។ យោងតាម TASS កិច្ចប្រជុំនេះនឹងក្លាយជាទំនាក់ទំនងលើកទីពីររបស់ពួកគេនៅឆ្នាំនេះ បន្ទាប់ពីជំនួបតាមរយៈវីដេអូនៅថ្ងៃទី ៤ ខែកុម្ភៈ និងកិច្ចពិភាក្សាផ្ទាល់លើកដំបូងរបស់ពួកគេនៅឆ្នាំ ២០២៦។ ទោះបីជាមានការអះអាងបែបនេះ ព័ត៌មាននៃដំណើរទស្សនកិច្ចរបស់លោក ពូទីន ទៅកាន់ក្រុងប៉េកាំង ទើបតែត្រូវផ្សព្វផ្សាយជាសាធារណៈនៅពេល លោក ត្រាំ ហៀបបញ្ចប់បេសកកម្មនៅទីក្រុងប៉េកាំងកាលថ្ងៃសុក្រសប្តាហ៍មុនប៉ិណ្ណោះ៕

រ៉ាន់ រើយ