លោក Medvedev៖ គ្មានប្រទេសណាក្នុងប្រវត្តិសាស្ត្រទំនើប រងសម្ពាធទណ្ឌកម្មធ្ងន់ធ្ងរដូច រុស្ស៊ី ឡើយ

អនុប្រធានក្រុមប្រឹក្សាសន្តិសុខរុស្ស៊ី លោក Dmitry Medvedev បានថ្លែងនៅក្នុងកិច្ចប្រជុំក្រុមប្រឹក្សាអ្នកជំនាញដើម្បីរៀបចំកម្មវិធីថ្មីរបស់គណបក្សថា រុស្ស៊ីគឺជាប្រទេសតែមួយគត់នៅក្នុងប្រវត្តិសាស្ត្រទំនើប ដែលកំពុងរងការគាបសង្កត់ និងស្ថិតក្រោមសម្ពាធយ៉ាងធ្ងន់ធ្ងរបំផុតបែបនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អតីតប្រធានាធិបតីរុស្ស៊ីរូបនេះបានគូសបញ្ជាក់ថា «សម្ពាធមិនធ្លាប់មានពីមុនមកពីខាងក្រៅ គឺជាបញ្ហាប្រឈមដ៏ធំបំផុតមួយនៅក្នុងយុគសម័យបច្ចុប្បន្ន។ យើងត្រូវតែផ្តល់ចម្លើយតបវិញ ហើយយើងក៏កំពុងតែធ្វើវាដែរ។ ត្រូវតែទទួលស្គាល់ថា នេះគឺជាបញ្ហាប្រឈមដ៏លំបាកបំផុត»។ លោកបានបន្ថែមថា នៅក្នុងប្រវត្តិសាស្ត្រពិភពលោកទំនើប មិនដែលមានប្រទេសណាមួយរងការដាក់កម្រិតដោយខុសច្បាប់ (ទណ្ឌកម្ម) ច្រើនលើសលប់ដូចរុស្ស៊ីនោះឡើយ។

យោងតាមសារព័ត៌មាន tass, បើតាមលោក Medvedev រុស្ស៊ីចាំបាច់ត្រូវធ្វើអ្វីៗគ្រប់យ៉ាងដែលមិនអាចខ្វះបាន ដើម្បីធានាថាប្រទេសជាតិនៅតែបន្តអភិវឌ្ឍ សូម្បីតែស្ថិតក្នុងលក្ខខណ្ឌបច្ចុប្បន្ននេះក៏ដោយ ដោយលោកបានលើកឡើងថា «ប្រជាជនរបស់យើងត្រូវតែមានគុណភាពជីវិតដ៏សមរម្យមួយ។ យើងកំពុងខិតខំប្រឹងប្រែងធ្វើបែបនោះ ហើយប្រទេសជាតិក៏កំពុងតែបន្តអភិវឌ្ឍទៅមុខផងដែរ»។

ដោយឡែក អ្នកនាំពាក្យវិមានក្រឹមឡាំង លោក Dmitry Peskov បានប្រកាសដែរថា ធនាគារធំៗបំផុតរបស់រុស្ស៊ីបានរងទណ្ឌកម្មជាយូរមកហើយ។ រឿងនេះមិនបានរារាំងធនាគារទាំងនោះ ពីការរកប្រាក់ចំណេញបានយ៉ាងច្រើន ការអភិវឌ្ឍ និងការរក្សាបាននូវស្ថិរភាពដាច់ខាតនោះទេ។

លោក Peskov ក៏បានសង្កត់ធ្ងន់លើការអត្ថាធិប្បាយរបស់ប្រធានាធិបតី វ្ល៉ាឌីមៀ ពូទីន កាលពីថ្ងៃទី១០ ខែមិថុនា អំពីស្ថានភាពសេដ្ឋកិច្ចរុស្ស៊ី ដោយអះអាងថា សេដ្ឋកិច្ចទាំងមូលកំពុងត្រូវបានគ្រប់គ្រងយ៉ាងល្អ។ មិនតែប៉ុណ្ណោះ វិស័យធនាគារក៏ដូចគ្នាដែរ។ ធនាគារកណ្តាលរបស់យើងបានបញ្ជាក់រឿងនេះម្តងហើយម្តងទៀត។ ពួកគេកំពុងតាមដានស្ថានភាពយ៉ាងដិតដល់បំផុត និងកំពុងចាត់វិធានការចាំបាច់នានាដើម្បីរក្សាស្ថិរភាពនេះ៕

អត្ថបទ ៖ សាង ស្រីល័ក្ខ