ហ្សេលេនស្គី សុំជួប ពូទីន ចរចាគ្នា ក្រោយរុស្ស៊ី វាយប្រហារទ្រង់ទ្រាយធំ សម្លាប់មនុស្ស ១១នាក់ ខ្ទេចទាំងវិហារ ចុះបញ្ជី យូណេស្កូ

ក្រោយពេលរុស្ស៊ី បើកការវាយប្រហារទ្រង់ទ្រាយធំថ្មីទៀត លើអ៊ុយក្រែន ឈានដល់ធ្វើឲ្យខូចខាតដល់ ព្រះវិហារដែលជាសម្បត្តិបេតិកភណ្ឌ របស់អង្គការយូណេស្កូនោះ ស្រាប់តែពេលនេះ ប្រមុខរដ្ឋាភិបាលទីក្រុងកៀវ វ៉ូឡូឌីមៀរ ហ្សេលេនស្គី បានស្នើទៅកាន់មេដឹកនាំវិមានក្រឹមឡាំង វ្ល៉ាឌីមៀរ ពូទីន ចរចាគ្នា ខណៈសំណើនេះ ត្រូវបានធ្វើឡើងអំឡុងកិច្ចសន្ទនាតាមទូរស័ព្ទ ជាមួយប្រធានាធិបតីអាមេរិក ដូណាល់ ត្រាំ។

សារព័ត៌មាន South China Morning Post បានដកស្រង់សម្តី លោក ហ្សេលេនស្គី ដែលនិយាយ កាលពីថ្ងៃចន្ទ ទី១៥ ខែមិថុនា ឆ្នាំ២០២៦ ថា លោក មានឆន្ទៈក្នុងការជួបជាមួយសមភាគីរុស្ស៊ី នៅ សហរដ្ឋអាមេរិក ព្រោះលោក ពូទីន ប្រហែលពិបាកបដិសេធណាស់ ចំពោះសំណើបែបនេះ។

ទោះយ៉ាងណា មកទល់ពេលនេះ មិនទាន់មានការឆ្លើយតបណាមួយ ពីសំណាក់ភាគី រុស្ស៊ីទេ។

សំណើរបស់លោកហ្សេលេនស្គី កើតឡើងបន្ទាប់ពី រុស្ស៊ី បើកការវាយប្រហារទ្រង់ទ្រាយធំ ដោយបាញ់មីស៊ីល ៧០គ្រាប់ និងដ្រូនជាង ៦០០គ្រឿង នៅទូទាំងប្រទេសអ៊ុយក្រែន សម្លាប់មនុស្ស ១១នាក់ និងធ្វើឲ្យរាប់សិបនាក់ទៀត រងរបួស។

អ្វីដែលគួរឲ្យកត់សម្គាល់គឺថា ការវាយប្រហារនោះ បង្កឲ្យមានអគ្គិភ័យឆាបឆេះយ៉ាងសន្ធោសន្ធៅ និងខូចខាតយ៉ាងធ្ងន់ធ្ងរដល់វិហារ Kyiv-Pechersk Lavra អាយុកាល ១ ០០០ ឆ្នាំ ដែលជាទីតាំងប្រវត្តិសាស្ត្រ ត្រូវបានចុះក្នុងបញ្ជីបេតិកភណ្ឌពិភពលោក របស់អង្គការ យូណេស្កូ។

ការវាយប្រហារនោះផងដែរ កើតឡើង ចំពេលលោកត្រាំ និយាយ​ទូរស័ព្ទ ​ជាមួយលោក ពូទីន ស្ដី​ពី​សង្គ្រាម​នៅ​អ៊ុយក្រែន។

បើតាមការបញ្ជាក់ពីជំនួយការវិមានក្រឹមឡាំង លោក Yuri Ushakov, នៅក្នុងកិច្ចសន្ទនា រយៈពេលជិតមួយម៉ោងនោះ លោក ត្រាំ ជំរុញឲ្យមានការបញ្ចប់សង្គ្រាម និងបង្ហាញពីបំណង ចង់ឲ្យទំនាក់ទំនងរវាងអាមេរិក និងរុស្ស៊ីត្រឡប់មកល្អប្រសើរឡើងវិញ៕

អត្ថបទ៖ សុខ សុវណ្ណ