មន្ត្រី​សមត្ថកិច្ច​ ក.ប.ប.ខេត្តកំពង់ចាម ចុះត្រួតពិនិត្យទីតាំងស្តុកលក់ចែកចាយសាច់បង្កក និងប្រហិត​

កំពង់ចាម ​៖​ មន្ត្រី​សមត្ថកិច្ច​ ក.ប.ប.ខេត្តកំពង់ចាម បានបន្តចុះត្រួតពិនិត្យទីតាំងស្តុកទុកលក់ចែកចាយ សាច់បង្កក និងប្រហិត​ ក្នុងភូមិសាស្ត្រខេត្តកំពង់ចាម។ 

នៅថ្ងៃទី១៧ ខែមិថុនា  ឆ្នាំ២០២៦ មន្ទីរពាណិជ្ជកម្មខេត្តកំពង់ចាម សហការជាមួយ សាខាក.ប.ប.ខេត្តកំពង់ចាម និងអាជ្ញាធរមូលដ្ឋាន បានធ្វើការចុះត្រួតពិនិត្យទីតាំងស្តុកទុក លក់ចែកចាយ សាច់បង្កក ដែលស្ថិតនៅក្នុងក្រុងកំពង់ចាម ស្រុកកំពង់សៀម និងស្រុកព្រៃឈរ ខេត្តកំពង់ចាម បានចំនួន១៧ទីតាំង។​

ជាលទ្ធផលបានរកឃើញ ចៃយ៉ខៀវ ចំនួន៥គីឡូក្រាម, ប្រហិតត្រីចំនួន៣គីឡូក្រាម , ហតដកម្ទេសចំនួន៤គីឡូក្រាម , សាច់ក្រកកញ្ចប់ចំនួន៥គីឡូក្រាម , ហតដកស្បែកជ្រូកចំនួន២គីឡូក្រាម, ប្រហិតមឹកបំពង់ចំនួ​៣គីឡូក្រាម, តៅហ៊ូជ្រុងចំនួ​ន៣គីឡូក្រាម, និងប្រហិតសាច់ក្តាមចំនួន៤គីឡូ​ ដែលបានហួសកាលបរិច្ឆេទ​ និងប្រហិតបង្កកហួសកាល បរិច្ឆេទចំនួន២៩គីឡូក្រាម។

ជាមួយគ្នា​នេះដែរ​ ក្រុមការងារ​ មិនបានរកឃើញសាច់បង្កកដែលមានប្រភពមកពីប្រទេសថៃនោះទេ​ ហេីយក្រុមការងារបានផ្សព្វផ្សាយច្បាប់ស្តីពីសុវត្ថិភាពម្ហូបអាហារ និងបទប្បញ្ញតិពាក់ព័ន្ធជូនដល់អាជីវករ ដើម្បីឱ្យបានយល់ដឹងបន្ថែម៕

អត្ថបទ​និងរូបភាព​៖​ឡេក​ ចាន់ពេជ្រ