មនុស្សស្លាប់កើនលើស ១ ៧០០នាក់ ក្នុងមហាវិនាសកម្មរញ្ជួយដី នៅ វ៉េណេស៊ុយអេឡា

ប្រទេសវ៉េណេស៊ុយអេឡា បញ្ជាក់ថា មនុស្សស្លាប់ ក្នុងមហាវិនាសកម្មរញ្ជួយដីភ្លោះ ដែលវាយប្រហារកាលពីសប្តាហ៍មុន បានកើនដល់ ១ ៧១៩នាក់ហើយ និងរបួស ៥ ០៣៤នាក់។

តាមការផ្សាយរបស់ Al Jazeera, តួលេខនេះ គិតត្រឹមរសៀលថ្ងៃអង្គារ ទី៣០ ខែមិថុនា ឆ្នាំ២០២៦ ខណៈក្រុមជួយសង្គ្រោះ ព្រមានថា ក្តីសង្ឃឹមក្នុងការរកឃើញមនុស្សបាត់ខ្លួនរាប់ម៉ឺននាក់ទៀតទាំងនៅរស់ គឺកាន់តែស្តួចស្តើងមែនទែនហើយ ព្រោះពេលវេលាសំខាន់ ៧២ម៉ោងដំបូង ដែលជាឱកាស ក្នុងការរស់រានមានជីវិត បានបិទបញ្ចប់ទៅហើយ។

យោងតាមទិន្នន័យ ដែលបញ្ចេញដោយរដ្ឋាភិបាលវ៉េណេស៊ុយអេឡា, ក្រៅពីអ្នកស្លាប់ និងរបួស នៅមានមនុស្ស ១២ ៧២១នាក់ទៀត បាត់បង់ផ្ទះសម្បែង ចំណែកអគារចំនួន ៧៧៤ ត្រូវបាក់រលំ។

សូមជម្រាបជាថ្មី គ្រោះរញ្ជួយដីកម្រិតធ្ងន់ ២លើកផ្ទួនៗ បានវាយប្រហារប្រទេសវ៉េណេស៊ុយអេឡា ក្នុងរយៈពេលត្រឹមតែ ៣៩វិនាទីប៉ុណ្ណោះ។

ចំណុចកណ្តាលនៃការរញ្ជួយដីដំបូងកម្លាំង ៧.៥រ៉ិចទ័រ គឺស្ថិតនៅចម្ងាយប្រហែល ២៣គីឡូម៉ែត្រ ភាគអាគ្នេយ៍នៃទីក្រុង Yumare ក្នុងរដ្ឋ Yaracuy ខណៈការរញ្ជួយដីលើកទី២ កម្លាំង ៧.២រ៉ិចទ័រ គឺស្ថិតនៅក្បែរទីក្រុង San Felipe ក្នុងរដ្ឋដដែលនេះ។

ក្រោយមក មានការរញ្ជួយដីបន្ទាប់បន្សំ (Aftershock) ជាង ៦០០ ដងទៀត ត្រូវបានកត់ត្រា ហើយក្នុងនោះ ការរញ្ជួយខ្លាំងបំផុត គឺមានកម្រិត ៤.៦ រ៉ិចទ័រ ដែលវាយប្រហារនៅជិតតំបន់ Caraballeda កាលពីថ្ងៃចន្ទ។

យ៉ាងណា មិនមានសេចក្តីរាយការណ៍ អំពីការខូចខាតថ្មីៗទេ ប៉ុន្តែការរញ្ជួយនោះ ធ្វើឲ្យអ្នកក្រុង Caracas ភ័យស្លន់ស្លោ និងរត់ចេញមកលើដងផ្លូវ ទាំងភិតភ័យ៕

អត្ថបទ៖ សុវណ្ណ