អាជ្ញាធរស្រុកសំឡូត រកឃើញទីតាំងលក់ទុរេនមួយ កន្លែងនាំចូលមិនមានប្រភពច្បាស់លាស់

ចាប់តាំងពីសប្តាហ៍ទី៣ នៃខែឧសភា ឆ្នាំ២០២៦ កន្លងមកនេះ គណៈបញ្ជាការឯកភាពរដ្ឋបាលស្រុកសំឡូត បានដឹកនាំកម្លាំងចម្រុះ ចុះត្រួតពិនិត្យជាប់ជាប្រចាំតាមគោលដៅនានាជាច្រើនកន្លែងដែលមានដាក់តាំងលក់ផ្លែទុរេនក្នុងស្រុក ដើម្បីពង្រឹងគុណភាព និងមិនមានការបន្លំភ្នែកដល់ភ្ញៀវទេសចរ ដែលគាំទ្រចំពោះផ្លែទុរេនទាំងនេះ។

បើតាមការបញ្ជាក់ពីលោក ហែម ស៊ីណាក់ អភិបាលរងស្រុកសំឡូត ដែលជាអ្នកដឹកនាំកម្លាំងចុះត្រួតពិនិត្យតាមទីតាំងនានា ក្នុងស្រុក បានលើកឡើងថា ចាប់តាំងពីថ្ងៃទី២៦ ខែឧសភា មកដល់ពេលនេះ កម្លាំងចម្រុះដែលបានចុះត្រួតពិនិត្យជាញឹកញាប់ទៅតាមទីតាំងលក់ផ្លែទុរេនចំនួន ៦៣ទីតាំងនៅក្នុងស្រុកសំឡូត គឺមានមួយកន្លែងនាំផ្លែទុរេនមកដាក់លក់គ្មានប្រភពច្បាស់លាស់។

លោកអភិបាលរងស្រុកបានបន្តថា យោងទៅលើការសួរនាំពីម្ចាស់ផ្លែទុរេន ខ្លះបានឆ្លើយថា យកមកពីស្រុកស្រែអំបិល ខ្លះទៀតឆ្លើយថាយកមកពីក្រុងភ្នំពេញ។ ដោយសារប្រភពមិនច្បាស់លាស់ទើបកម្លាំង​គណៈបញ្ជាការឯកភាពរដ្ឋបាលស្រុកបានបញ្ជាឲ្យដោះស្លាកសញ្ញាសម្គាល់ជាផ្លែទុរេនក្នុងស្រុកសំឡូតចេញ ដោយមិនអនុញ្ញាតឱ្យយកស្លាកស្រុកសំឡូតទៅបំពាក់លើផ្លែទុរេនឡើយ ហើយផ្លែទុរេនទាំងនោះមានសរុបប្រមាណជាងមួយតោន។

ដោយឡែកកញ្ញា ឆាន់ ចន្ធូ ជាប្រជាកសិករ និងជាអ្នកដាំដើមទុរេនចំនួនមួយហិកតាកន្លះ ស្ថិតក្នុងភូមិបឹងរុន ឃុំសំឡូត បានរៀបរាប់ថា មួយរយៈនេះមានភ្ញៀវទេសចរចុះទៅកំសាន្ត និងទិញផ្លែទុរេនរបស់កញ្ញាដល់ក្នុងចំការតែម្ដង ហើយក្នុងមួយថ្ងៃកញ្ញាអាចលក់បានចាប់ពី ១០០ ទៅ ១៥០ គីឡូក្រាម ដោយមិនអាចកំណត់តម្លៃបានទេ ដោយគ្រាន់តែអះអាងថា ចាប់ពី ១ម៉ឺនឡើងទៅក្នុងមួយគីឡូក្រាម។

កញ្ញាបានសង្កត់ធ្ងន់ថា មិនថាតែចំការរបស់កញ្ញាផ្ទាល់នោះទេ របស់អ្នកភូមិដទៃទៀតក៏លក់ដាច់ដូចគ្នា បើសម្រាប់ថ្ងៃសៅរ៍ និងថ្ងៃអាទិត្យដែលជាថ្ងៃឈប់សម្រាកវិញ គឺមានភ្ញៀវទេសចរទៅកំសាន្ត និងទិញផ្លែទុរេនស្ទើរតែស្ទះចរាចរណ៍ ដោយភ្ញៀវទេសចរស្ទើរពាក់កណ្ដាលបានមកពីទីក្រុងភ្នំពេញផ្ទាល់តែម្ដង ព្រមទាំងបានសរសើរមិនដាច់ពីមាត់អំពីរសជាតិផ្អែមឆ្ងាញ់ខ្ទិះរបស់ទុរេនស្រុកសំឡូត។

គណៈបញ្ជាការឯកភាពរដ្ឋបាលស្រុកសំឡូត នៅតែបន្តដឹកនាំកម្លាំងចុះត្រួតពិនិត្យជាប់ជាប្រចាំ ដើម្បីរក្សាស្លាកឈ្មោះរបស់ទុរេនសំឡូត ឱ្យនៅឋិតថេរជៀសវាងការនាំទុរេនពីក្រៅស្រុកមកបន្លំភ្នែកដែលធ្វើឲ្យខូចគុណភាព និងតម្លៃនៃទុរេនរបស់ស្រុកសំឡូត ៕

អត្ថបទ៖ សោ និយមរ័ត្ន