បង្ក្រាបទីតាំងអាហារដ្ឋាន និងផ្ទះសំណាក់មួយកន្លែង លួចលាក់បង្កប់សេវាផ្លូវភេទ និងនាំស្រីក្មេងមកបម្រើការ នៅខេត្តកំពង់ស្ពឺ

កម្លាំងជំនាញនៃស្នងការដ្ឋាននគរបាលខេត្តកំពង់ស្ពឺ បានបើកប្រតិបត្តិការចុះបង្ក្រាបទីតាំងអាហារដ្ឋាន និងផ្ទះសំណាក់មួយកន្លែង ដែលសង្ស័យថាបានលួចលាក់បើកឱ្យមានការប្រព្រឹត្តអំពើសញ្ចារកម្ម និងផ្តល់ទីតាំងធ្វើពេស្យាចារ ដោយក្នុងនោះសមត្ថកិច្ចបានឃាត់ខ្លួនម្ចាស់ទីតាំងម្នាក់ និងសង្គ្រោះនារីរងគ្រោះចំនួន ៧នាក់។

ប្រតិបត្តិការនេះបានធ្វើឡើងកាលពីរសៀលថ្ងៃទី១៥ ខែកក្កដា ឆ្នាំ២០២៦ ក្រោមការបញ្ជាដឹកនាំដ៏ខ្ពង់ខ្ពស់ពី លោកឧត្តមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ និងមានការដឹកនាំផ្ទាល់ពី លោកស្រី ឧត្តមសេនីយ៍ត្រី ងិន សុគន្ធា ស្នងការរងទទួលផែនការងារប្រឆាំងការជួញដូរមនុស្ស និងការពារអនីតិជន។

ទន្ទឹមនឹងនោះ កម្លាំងជំនាញដឹកនាំដោយ លោកស្រីវរសេនីយ៍ឯក មួន មល្លិកា នាយការិយាល័យប្រឆាំងការជួញដូរមនុស្ស និងការពារអនីតិជន ដោយមានការសម្របសម្រួលនីតិវិធីពី លោកស្រី ធាម ច័ន្ទពីលីការ ព្រះរាជអាជ្ញារងអមសាលាដំបូងខេត្តកំពង់ស្ពឺ បានចុះទៅដល់ទីតាំងផ្ទាល់ ដែលមានយីហោ «អាហារដ្ឋានម្លប់លាភត្រជាក់ចិត្ត» និង «ផ្ទះសំណាក់ ហេងហេង» ស្ថិតនៅភូមិទឹកលង២ ឃុំរុងរឿង ស្រុកថ្ពង ខេត្តកំពង់ស្ពឺ។

លោកស្រីនាយការិយាល័យបានបញ្ជាក់ឱ្យដឹងថា នៅក្នុងប្រតិបត្តិការខាងលើ កម្លាំងសមត្ថកិច្ចបានរកឃើញបន្ទប់សម្រាប់ស្នាក់នៅ និងបានធ្វើការឃាត់ខ្លួនម្ចាស់ទីតាំងម្នាក់ ឈ្មោះ សុខុម សៀប ភេទស្រី អាយុ ៦០ឆ្នាំ។ ជាមួយគ្នានោះ សមត្ថកិច្ចក៏បានអន្តរាគមន៍ជួយសង្គ្រោះនារីដែលមករកការងារធ្វើនៅទីតាំងខាងលើបានចំនួន ៧នាក់ ក្នុងនោះមាននារីជាអនីតិជន (អាយុក្រោម ១៨ឆ្នាំ) ចំនួន ២នាក់ ដែលត្រូវបានម្ចាស់ហាងអូសទាញ និងធានាឱ្យមកបម្រើការងារនៅទីនេះ។

បច្ចុប្បន្ន សមត្ថកិច្ចបានបញ្ជូនទាំងនារីរងគ្រោះទាំង ៧នាក់ និងម្ចាស់ទីតាំង មកកាន់ស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តទៅតាមនីតិវិធីច្បាប់៕