ម៉ា ដូណា បំផុសអ្នកសិល្បៈរួមផ្សព្វផ្សាយផលិតផលខ្មែរ ខណៈការតាំងពិព័រណ៍ពាណិជ្ជកម្មកម្ពុជា ២០២៦ ចាប់ផ្តើមស្អែកនេះ

តារាសម្តែង និងកំប្លែងលោក ម៉ា ដូណា បានអំពាវនាវដល់សិល្បករ និងសិល្បការិនីខ្មែរទាំងអស់ ចូលរួមផ្សព្វផ្សាយ និងលើកតម្កើងស្នាដៃកូនខ្មែរ តាមរយៈការគាំទ្រផលិតផល និងសកម្មភាពដែលបង្ហាញពីសមត្ថភាពរបស់អ្នកផលិតក្នុងស្រុក។ លោកថា ទោះបច្ចុប្បន្នលោកកំពុងស្ថិតនៅក្រៅប្រទេសក៏ដោយ ក៏មិនភ្លេចការការផ្សព្វផ្សាយស្នាដៃផលិតផលកូនខ្មែរនោះដែរ។

ការលើកឡើងនេះ គឺស្របពេលដែលមានការរៀបចំការតាំងពិពណ៌ពាណិជ្ជកម្ម និងទីផ្សារអាហារកម្ពុជា ២០២៦ ក្រោមយុទ្ធនាការ «អាហារខ្មែរ ត្រូវតែខ្លាំង» ដែលនឹងរៀបចំឡើងរយៈពេល ៣ថ្ងៃ ពីថ្ងៃទី១៧ ដល់ថ្ងៃទី១៩ នៅមជ្ឈមណ្ឌលពិព័រណ៍ និងសន្និបាត កោះពេជ្រ ។

ស្របពេលបញ្ហាព្រំដែនកម្ពុជា-ថៃនៅតែជាប្រធានបទរសើប ស្មារតីគាំទ្រផលិតផលក្នុងស្រុក និងការបន្តពហិកាផលិតផលថៃ ក៏នៅតែត្រូវបានលើកឡើងដោយប្រជាពលរដ្ឋ និងបុគ្គលល្បីៗមួយចំនួន ដែលចាត់ទុកថាជាការបង្ហាញពីការរួបរួម និងការលើកកម្ពស់ផលិតផលជាតិ។

ជាក់ស្តែង តាមរយៈសារបង្ហោះលើបណ្តាញសង្គម លោក ម៉ា ដូណា បានរៀបរាប់ថា “ទោះខ្ញុំនៅស្រុកក្រៅតែខ្ញុំជាសិល្បករត្រូវចូលរួមឆ្លៀតផ្សព្វផ្សាយនូវអ្វីដែលជាការរបង្ហាញស្នាដៃកូនខ្មែរ ការតាំងពិព័ណ៌ដល់ធំអស្ចារ្យ នៅថ្ងៃទី១៧/១៨/១៩ ខែកក្កដា ឆ្នាំ២០២៦ នៅសាលកោះពេជ្រ និងបន្តពហិការផលិតផលចោរសៀមងាកមកតម្កើងផលិផលជាតិយើង”។

គួររំលឹកថា កន្លងមក លោក ម៉ា ដូណា ធ្លាប់ប្រកាសបន្តពហិកាមិនប្រើប្រាស់ទំនិញ និងផលិតផលថៃ បន្ទាប់ពីមានភាពតានតឹងពាក់ព័ន្ធនឹងជម្លោះព្រំដែនកម្ពុជា-ថៃ។ លោកថែមទាំងបានបង្ហាញជំហរថា នឹងបន្តប្រកាន់ខ្ជាប់ការសម្រេចចិត្តនេះ និងផ្តាំដល់កូនចៅជំនាន់ក្រោយឱ្យចូលរួមគាំទ្រផលិតផលជាតិផងដែរ៕ ដោយ៖ ចាន់រ៉ា