អាជ្ញាធរខណ្ឌសែនសុខ បន្តសម្អាតប្រឡាយទួលសំពៅ កាត់ស្មៅ កាយស្រង់សំរាម និងជំរុញពលរដ្ឋរួមគ្នាថែរក្សាបរិស្ថាន

អាជ្ញាធរខណ្ឌសែនសុខ បន្តពង្រឹងការងារថែទាំប្រព័ន្ធប្រឡាយរំដោះទឹក ដោយមិនត្រឹមតែស្ដារប្រឡាយឱ្យមានលំហូរទឹកបានលឿន និងមានប្រសិទ្ធភាពប៉ុណ្ណោះទេ ប៉ុន្តែថែមទាំងបន្តសម្អាតបរិស្ថានជុំវិញប្រឡាយ តាមរយៈការកាត់ស្មៅនៅលើខ្នងប្រឡាយ និងមាត់ប្រឡាយ ព្រមទាំងកាយស្រង់ និងប្រមូលសំរាមចេញពីក្នុង និងជុំវិញប្រឡាយ ដើម្បីលើកកម្ពស់សោភ័ណភាពទីក្រុង និងកាត់បន្ថយការកកស្ទះលំហូរទឹកក្នុងរដូវវស្សា។

កាលពីថ្ងៃទី១៧ ខែកក្កដា ឆ្នាំ២០២៦ កម្លាំងសណ្ដាប់ធ្នាប់ខណ្ឌសែនសុខ បានបន្តចុះអនុវត្តការងារកាត់ស្មៅ កាយស្រង់សំរាម និងថែទាំប្រឡាយទួលសំពៅ ស្ថិតនៅតំបន់ខាងក្រោយផ្សារឈូកមាស ក្នុងភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ។ សកម្មភាពនេះ គឺជាផ្នែកមួយនៃផែនការថែទាំប្រព័ន្ធរំដោះទឹកជាប្រចាំ ដើម្បីធានាឱ្យប្រឡាយមានសភាពស្អាត គ្មានស្មៅដុះរាំងស្ទះ និងគ្មានសំរាមបង្កការកកស្ទះចរន្តទឹក។

ការអនុវត្តការងារនេះ មិនត្រឹមតែរួមចំណែកធ្វើឱ្យទឹកហូរបានលឿន កាត់បន្ថយហានិភ័យនៃការជន់លិចប៉ុណ្ណោះទេ ប៉ុន្តែថែមទាំងជួយលើកកម្ពស់សោភ័ណភាព បរិស្ថាន និងអនាម័យនៅតាមបណ្ដោយប្រឡាយ ឱ្យកាន់តែមានភាពស្អាត និងផ្តល់បរិយាកាសរស់នៅល្អប្រសើរសម្រាប់ប្រជាពលរដ្ឋក្នុងមូលដ្ឋាន។

ទន្ទឹមនឹងនេះ អាជ្ញាធរខណ្ឌសែនសុខ ក៏បានអំពាវនាវដល់ប្រជាពលរដ្ឋទាំងអស់ សូមចូលរួមថែរក្សាបរិស្ថានរួម ដោយវេចខ្ចប់ និងទុកដាក់សំរាមឱ្យបានត្រឹមត្រូវ មិនបោះចោលចូលក្នុងប្រឡាយ ឬតាមមាត់ប្រឡាយ ដើម្បីរួមគ្នារក្សាអនាម័យ បរិស្ថាន ផាសុខភាពរស់នៅ និងធានាឱ្យប្រព័ន្ធប្រឡាយអាចបំពេញតួនាទីរំដោះទឹកបានល្អ មានទឹកហូរលឿន និងរក្សាបាននូវសោភ័ណភាព៕ អត្ថបទ៖ សំណាង