ធនាគារ អេស៊ីលីដា​ពង្រីក​«​សេវាកម្ម​ធនាគារ​ស្វ័យប្រវត្តិ​»​កាន់តែច្រើន​ដើម្បី​បង្ខិត​សេវា​ឱ្យ​កាន់តែ​កៀក​អតិថិ​ជន​

ភ្នំពេញ​ ៖​ បច្ចុប្បន្ននេះ​ធនាគារ អេស៊ីលីដា​បាន​នឹង​កំពុង​ពង្រីក​«​សេវាកម្ម​ធនាគារ​ស្វ័យប្រវត្តិ​»​ឱ្យបាន​កាន់តែច្រើន​បន្ថែ​ម​ទៀត​ដើម្បី​បង្ខិត​សេវា​ឱ្យ​កាន់តែ​កៀក​អតិថិ​ជន​ងាយស្រួល​ក្នុង​ការដក​ប្រាក់ ដាក់​ប្រាក់​និង​បើក​គណនី​ទៅតាម​តម្រូវការ​ពិសេស​ស្ថិតក្នុង​ស្ថានភាព​ការ​រាតត្បាត​ជំងឺ​កូ​វីដ​១៩​។

បើ​តាម​លោកស្រី សុខ សោភា នាយិកា​ប្រតិបត្តិ​ជាន់ខ្ពស់​ទីផ្សារ នៃ​ធនាគារ​អេស៊ីលីដា​បាន​ឲ្យ​ដឹង​ថា​៖ « បច្ចុប្បន្ននេះ ធនាគារ អេស៊ីលីដា កំពុង​បំពាក់​បំពាក់​ម៉ាស៊ីន​ទំនើបៗ ប្រកបដោយ​បច្ចេកវិទ្យា​ដោយ​បង្កើត​នូវ​ភាព​លេចធ្លោ​និង​ទាន់សម័យ​សម្រាប់​អតិថិជន​, សាធារណជន និង​បណ្តា​ដៃគូ​ពាណិជ្ជកម្ម​របស់​យើង ដែល​រួមមាន ម៉ាស៊ីន​ដាក់​ប្រាក់​-​ដក​ប្រាក់​, ម៉ាស៊ីន​ដក​ប្រាក់​, ម៉ាស៊ីន​បើក​គណនី​, ម៉ាស៊ីន​បើក​គណនី​មាន​កាលកំណត់ និង​ម៉ាស៊ីន​ដាក់​កាបូប​ប្រាក់​សម្រាប់​ដៃគូ​ដែល​មានការ​ចរាចរ​ក្រដាសប្រាក់​ច្រើន​ប្រភេទ​ទៀត ដើម្បី​បង្ក​លក្ខណៈ​ងាយស្រួល​ជូន​ដល់​អតិថិជន​សម្រាប់​ការប្រើប្រាស់​សាច់ប្រាក់​ទៅតាម​តម្រូវការ បន្ថែម​ពីលើ​ការប្រើប្រាស់​តាម អេស៊ីលីដា​ម៉ូ​បាល »​។

លោកស្រី​នាយិកា​បាន​បន្ត​ថា អត្ថប្រយោជន៍ គឺ​ការធានាបាន​នូវ​សេចក្តីត្រូវការ​របស់​អតិថិជន ក្នុងការ​ប្រើប្រាស់​សាច់ប្រាក់​ទៅតាម​ពេលវេលា​ដែល​គាត់​ត្រូវការ មិន​ថា​ពេលណា ឬ​កន្លែង​ណា​ទេ គឺ​ងាក​ឃើញៗ​គ្រប់កន្លែង បើ​ហួស​មួយកន្លែង ដល់​មួយកន្លែង​ទៀត ដោយ​មិនចាំបាច់​ត្រឡប់ក្រោយ​ឡើយ ។

​លោកស្រី​បាន​បន្ថែម​ទាំង​ទៀតថា ធនាគារ អេស៊ីលីដា មាន​គម្រោង​ដាក់​បម្រើ​សេវាកម្ម​ធនាគា​រ ស្វ័យប្រវត្តិ​របៀបនេះ​ចំនួន​៥០​ទីតាំងនៅ​ទូទាំងប្រទេស​ជា​បន្តបន្ទាប់ ។​

លោកស្រី​បានឱ្យដឹង​ទៀតថា​« នេះ​ជា​ពេលវេលា​ដែល​យើងទាំងអស់គ្នា បំរើការ​នៅ​ធនាគារ អេស៊ីលីដា មាន​មោទនភាព​ណាស់​ដែលមាន​ឱកាស​ក្នុង​ការបម្រើ​សេវាកម្ម​ហិរញ្ញវត្ថុ​ជូន​អតិថិជន​, សាធារណជន គ្រប់​ជាតិ​សាសន៍ ប្រកបដោយ​កាយវាចារ​ចិត្ត​ស្មោះស្ម័គ្រ និង​មាន​ក្រមសីលធម៌​វិជ្ជាជីវៈ​ខ្ពស់បំផុត »​។

មកដល់ពេលនេះ ធនាគារ អេស៊ីលីដា មាន​ម៉ាស៊ីន អេ​ធី​អឹម​សម្រាប់​បំរើ​អតិថិជន​ទាំងយប់​ថ្ងៃ ២៤/២៤ ចំនួន​៧៩២ ម៉ាស៊ីន​ឆូត​កាត​ចំនួន ៤,៣២១​ម៉ាស៊ីន​។

​កាលពីដើមឆ្នាំ​២០២១​នេះ ធនាគារ អេស៊ីលីដា ដែលជា​ធនាគារ​ខ្មែរ​ពាណិជ្ជ​ធំជាងគេ​បំផុត​នៅ​ប្រទេស​កម្ពុជា​បានធ្វើ​ទំនើបកម្ម​និង​អភិវឌ្ឍ អេស៊ីលីដា​ម៉ូ​បាល របស់ខ្លួន កាន់តែ​ទំនើប មាន​ពហុ​មុខងារ​ច្រើន​សម្បូរបែប ដែល​ធ្វើ​ឲ្យ​អតិថិជន​កាន់តែ​ទទួលបាន​អត្ថប្រយោជន៍​យ៉ាងច្រើន និង​ងាយស្រួល​ប្រើ ដែល​មកដល់ពេលនេះ អេប​មួយ​នេះ​មាន​ចំនួន​អ្នកប្រើប្រាស់​២​លាន​នាក់ ។​

​គួរ​បញ្ជាក់ថា ​ទីតាំង​សេវាកម្ម​ធនាគារ​ស្វ័យប្រវត្តិ ទាំង​១៣​កន្លែង​រួមមាន​៖

១ . BSS (​ផ្លូវ​កម្ពុជា​ក្រោម​)(​ចន្លោះ​ពី​ស្តុ​ប​ដេ​អិន ដល់​ផ្លូវ​មុនី​វង្ស​)

២ . BSS (​ផ្លូវ​លេខ ២០០៤) (​ចន្លោះ​ពី​ស្តុ​ប Nokia ដល់​បុរី​អរ​គី​ដេរ​)

៣. BSS (​ផ្លូវ​កម្ពុជា​ក្រោម​)(​ចន្លោះ​ពី​ផ្លូវ​ស្ពាន​អាកាស​៧​មករា ដល់​ស្តុ​ប​សាលា​សន្ធរម៉ុក​)

៤. BSS (​ផ្លូវ​ទេព​ផន​) (​ចន្លោះ​ពី​កែង​ផ្សារ​ដេប៉ូ ដល់​សំណង់​១២) ៥. BSS (​ផ្លូវ​លេខ ១៦៣)(​ចន្លោះ​ពី​ផ្សារ​ទួល​ទំពូង ដល់​រង្វង់​មូល​ផ្សារ​ដើមថ្កូវ​)

៦. BSS (​ផ្លូវជាតិ​លេខ ២)(WB ចាក់អង្រែ​ក្រោម​)

៧. BSS (​ផ្លូវ​លេខ ២០១១)(​ម្តុំ​ផ្សារ​ឈូក​មាស​)

៨. BSS (​ផ្លូវ​មុនី​វង្ស​)(​ពី​ស្តុ​ប​ពេទ្យ​ចិន ដល់​ស្តុ​ប​បឹងត្របែក​)

៩. BSS (GREEN COMMUNITY MALL) ១០. BSS (CAMKO) ១១. BSS (​វិថី​ស៊ីវ​ត្ថា (​ស្រប​ផ្លូវ ២​ធ្នូ​) ១២ . BSS (​ផ្លូវ​មាត់ទន្លេ​)(​ចន្លោះ​ពី ផ្សារ​រាត្រី ដល់​ស្តុ​ប​វត្ត​ឧណ្ណាលោម​)​និង​១៣. BSS (​ផ្លូវ​លេខ ៣១០)(​ចន្លោះ​ពី​ស្តុ​ប​អនុវិទ្យាល័យ​ទួលស្លែង ដល់​ផ្លូវ​មុនី​វង្ស​) ៕