គ្រូពេទ្យចុះយកសំណាកលើកទី១លើបុគ្គលិកធនាគារអេស៊ីលីដា ស្នាក់ការកណ្ដាល ៦៨នាក់

អាជ្ញាធរខណ្ឌដូនពេញបានចុះសម្របសម្រួលជូនគ្រូពេទ្យដើម្បីចុះយកសំណាកលើកទី១លើបុគ្គលិកធនាគារអេស៊ីលីដា ស្នាក់ការកណ្តាលចំនួន៦៨នាក់។

ប្រតិបត្តិការចុះយកសំណាកធ្វើឡើងនៅថ្ងៃទី០៧ ខែកញ្ញា ឆ្នាំ២០២១ វេលាម៉ោង ០៩:៣០នាទី ដឹកនាំដោយលោក ម៉ុក ច័ន្ទករុណា អភិបាលរង នៃគណៈអភិបាលខណ្ឌដូនពេញ បានដឹកនាំក្រុមការងារចម្រុះខណ្ឌ ចុះសម្របសម្រួលជូនក្រុមគ្រូពេទ្យស្ម័គ្រចិត្តយុវជនសម្តេចតេជោ TYDA យកសំណាក (Rapid Test និង PCR) លើកទី១ ចំនួន ៦៨នាក់ (ស្រី ៦១នាក់) ជូនបុគ្គលិកធនាគារ អេសុីលីដា ទីស្នាក់ការកណ្តាល (ACELEDA Bank) ស្ថិតនៅមហាវិថីព្រះមុនីវង្ស ភូមិ៦ សង្កាត់ស្រះចក ខណ្ឌដូនពេញ រាជធានីភ្នំពេញ។

ជាលទ្ធផល អវិជ្ជមានទាំងអស់។ ដោយឡែកបុគ្គលិកពាក់ព័ន្ធចំនួន ៥៣នាក់ (ស្រី ៤១នាក់) ក្រោយចេញលទ្ធផលអវិជ្ជមាន ក្រុមគ្រូពេទ្យអនុញ្ញាតឱ្យចូលបម្រើការងារជាធម្មតា ដោយត្រូវអនុវត្តតាមវិធានរបស់ក្រសួងសុខាភិបាល ៣កុំ៣ការពារ។ ចំពោះបុគ្គលិកចំនួន ១៥នាក់ (ស្រី ១៣នាក់) ដែលប៉ះពាល់ផ្ទាល់ ក្រោយចេញលទ្ធផលអវិជ្ជមាន ក្រុមគ្រូពេទ្យសម្រេចឱ្យធ្វើចត្តាឡីស័កចំនួន ១៤ថ្ងៃ និងរង់ចាំលទ្ធផលធ្វើតេស្តបន្តជាមួយម៉ាសុីន PCR៕

អត្ថបទ៖ រស្មី