សមាគមអតីតយុទ្ធជនកម្ពុជាខេត្តកំពង់ធំចុះពិនិត្យមើលការរស់នៅរបស់អតីតយុទ្ធជន​​ក្នុងពេល​ជំនន់ទឹកភ្លៀង

លោកឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធជនកម្ពុជាខេត្តកំពង់ធំ ក្រោយពីមានភ្លៀង ជាបន្តបន្ទាប់ជាច្រើនថ្ងៃ បានចុះសួរសុខទុក្ខបងប្អូនអតីតយុទ្ធជន ចំនួន ១៤១ គ្រួសារ ដែលរស់នៅលើដីសម្បទាន​សង្គមកិច្ច ស្ថិតនៅឃុំក្រយា ស្រុកសន្ទុក ខេត្តកំពង់ធំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អតីតយុទ្ធជនចំនួន១៤១គ្រួសារ ត្រូវបានយកចិត្តទុកដាក់ ពីប្រធានសមាគមអតីតយុទ្ធជនកម្ពុជាខេត្តកំពង់ធំ និងជួយសម្រូលរាល់ការលំបាក ខណៈពេលដែលមានភ្លៀងធ្លាក់ជាបន្តបន្ទាប់ បណ្ដាលឱ្យទីតាំងដីសម្ប​ទានសង្គមកិច្ចចំនួនជាង២០០ ហិកតា មានស្ថានភាពជាវាលទំនាប បណ្ដាលឱ្យទឹកលិចតាមលំនៅដ្ឋាន និងទីតាំងខ្លះស្ថិតនៅលើទីទួលងាយស្រួលឱ្យបងប្អូនរស់នៅ។

ប្រធានសមាគមអតីតយុទ្ធជនកម្ពុជាខេត្តកំពង់ធំបានបញ្ជាក់ថា ក្រោយពីបានសិក្សា និងវាយតម្លៃ គឺអាចរំដោះទឹកចេញពីតំបន់ជន់លិចនេះបាននៅពេលខាងមុខ ក្រោយពេលសាងសង់ផ្លូវ និងធ្វើប្រឡាយរំដោះទឹកនៅក្នុងភូមិបានរួចរាល់ បងប្អូនអតីតយុទ្ធជន បើទោះបីជាមានការលំបាកខ្លះ ក្នុងស្ថានភាពរស់នៅបច្ចុប្បន្ន  ក្នុងពេលដែលកំពុងមានជំនន់ទឹកភ្លៀង តែក៏សប្បាយចិត្ត និងរស់នៅលើដីសម្បទានសង្គមកិច្ច ដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក្នុងនោះថ្នាក់ដឹកនាំខិតខំរៀបចំភូមិឋាននេះឱ្យល្អប្រសើរក្នុងការកសាងជីវភាពថ្មីនៅលើដីសម្បទានសសង្គមកិច្ច៕

អត្ថបទៈ ប៊ុន រដ្ឋា