ថៃ ផលិតឧបករណ៍ធ្វើតេស្តរកវីរុសកូវីដ-១៩តាមរយៈញើសក្លៀក

នៅសប្តាហ៍នេះ អ្នកវិទ្យាសាស្ត្រប្រទេសថៃ បានអភិវឌ្ឍឧបករណ៍រាវរកវីរុសកូវីដ-១៩តាមរយៈញើស ហើយកំពុងងសាកល្បងធ្វើតេស្តចំពោះម្ចាស់ហាងនានាតាមផ្សារម្ហូបអាហារក្នុងទីក្រុងបាងកក។

អ្នកស្រាវជ្រាវថៃ និយាយថា ក្នុងកំលុងរដូវស្សានេះ សម្រាប់អ្នកលក់ទំនិញនៅទីក្រុងបាងកកដែលបែកញើសក្លៀកជាប់នឹងអាវ ពួកគេអាចមានសញ្ញានៃការឆ្លងមេរោគកូរ៉ូណា។ ដូច្នេះការធ្វើតេស្តញើសក្លៀកនឹងក្លាយជារឿងកាន់តែងាយស្រួល ព្រមទាំងមិនរង់ចាំលទ្ធផលយូរថែមទៀត។

លោក Chadin Kulsing មកពីសាកលវិទ្យាល័យ ជូឡាឡុងកន (Chulalongkorn) មានប្រសាសន៍ថា សំណាកដែលប្រមូលបានពីមនុស្សដែលឆ្លងមេរោគកូវីដ-១៩ អាចបបញ្ចេញសារធាតុគីមីខុសៗពីគ្នា ដែលមានន័យថា មិនមែនទាល់តែសំណាកពីច្រមុះឬមាត់ ទើបបញ្ជាក់ករណីវិជ្ជមាននោះទេ។ យោងតាមការរកឃើញនេះ ក្រុមសា្រវជ្រាវថៃបានបង្កើតឧបករណ៍តេស្តញើសក្លៀកទៅលើអ្នកជំងឺ Covid-19 ។ តេស្តនេះមានភាពត្រឹមត្រូវ ៩៥ ភាគរយ និងអាចត្រូវបានដាក់ឲ្យប្រើជាជម្រើសដែលមានតំលៃសមរម្យជាងតេស្ត PCR នៅមន្ទីរពិសោធន៍។

ចំណែករបៀបតេស្តនៃឧបករណ៍ថ្មីនេះគឺគេដាក់សំឡីកប្បាសនៅក្រោមក្លៀករយៈពេល ១៥ នាទីដើម្បីស្រូបញើស រួចយកញើសទៅដាក់ក្នុងកែវដែលប្រើកាំរស្មីយូវីសម្លាប់មេរោគ។ បន្ទាប់មកអ្នកបច្ចេកទេសនឹងយកសំណាកដោយប្រើបំពង់ដាក់សម្ពាធទៅក្នុងឧបករណ៍វិភាគ ដើម្បីពិនិត្យមើលលទ្ធផល។

ការប្រមូលសំណាកនឹងចំណាយពេល ១៥ នាទី រីឯលទ្ធផលនឹងចេញក្នុងរយៈពេល ៣០ វិនាទី។

យ៉ាងណាមិញ ឧបករណ៍តេស្តប្រភេទថ្មីនេះ កំពុងស្ថិតក្នុងដំណាក់កាលអភិវឌ្ឍន៍នៅឡើយ៕

ប្រែសម្រួល៖ សន្យា

ប្រភព៖ GMA NEWS ONLINE

ចុចអាន៖ វិភាគលើ​តម្លៃ​ព្យាបាល​កូវីដ​និងចាក់​វ៉ាក់​សាំង​នៅ​អាមេរិក​ខ្ពស់ណាស់

ចុចអាន៖ អ្នកវិទ្យាសាស្រ្តព្រមាន វីរុសបណ្តាលឲ្យហើមខួរក្បាល អាចជារោគរាតត្បាតបន្ទាប់ពី កូវីដ