ព័ត៌មានជាតិ

មណ្ឌលចត្តាឡីស័ក ដែលសាងសង់ថ្មីនៅខណ្ឌឫស្សីកែវអាចទទួលអ្នកស្នាក់នៅបានជាង ៥០០នាក់

បានផុស

៥ years មុន

នៅ

ថ្ងៃសៅរ៍ ២៨ វិច្ឆិកា ២០២០

ដោយ

ភ្នំពេញ ៖ ដោយមានគោលការណ៍ពីរាជរដ្ឋាភិបាល រដ្ឋបាលរាជធានីភ្នំពេញបាននឹងកំពុងពន្លឿនការងារសាងសង់ មណ្ឌលចត្តាឡីស័កមួយកន្លែង មានចំនួន២អគារដែលអាចទទួលអ្នកដំណើរមកស្នាក់នៅបានជាង ៥០០នាក់ នាប៉ុន្មានសប្ដាហ៍ក្រោយនេះ ដើម្បីធានាបាននូវការអនុវត្តវិធានការចត្តាឡីស័ក ចំពោះអ្នកដំណើរចូលមកព្រះរាជាណាចក្រកម្ពុជាតាមអាកាសយានដ្ឋានអន្តរជាតិភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកមាន ចាន់យ៉ាដា អភិបាលរងរាជធានីភ្នំពេញនិងលោកសាំ ពិសិដ្ឋ ប្រធានមន្ទីរសាធរណការនិងដឹកជញ្ជូនរាជធានីភ្នំពេញព្រមទាំងមន្ត្រីអាជ្ញាធរមូលដ្ឋានខណ្ឌឫស្សីកែវ នាថ្ងៃទី២៨វិច្ឆិកានេះ បានចុះពិនិត្យការងារសាងសង់អគារចត្តាឡីស័កនេះ ដើម្បីពន្លឿនការសាងសង់ឲ្យបានលឿន។

មន្ត្រីរដ្ឋបាលរាជធានីភ្នំពេញបានឲ្យដឹងថា មណ្ឌលចត្តាឡីស័កមួយកន្លែងនេះ មានទីតាំងនៅក្នុងខណ្ឌឫស្សីកែវ ហើយមណ្ឌលចត្តាឡីស័កខាលើ នឹងដំណើរការក្រោយសាងសង់រួចនៅពេលខាងមុខ ដោយធ្វើឱ្យកាន់តែមានប្រសិទ្ធភាព បន្ទាប់ពីប្រគល់កន្លែងចត្តាឡីស័កកន្លងមក ឱ្យទៅសាលារៀនជូនសិស្សានុសិស្សបានចូលរៀនវិញនាពេលខាងមុខ។

គួរបញ្ជាក់ថា កន្លងមករដ្ឋបាលរាជធានីភ្នំពេញបានយកវិទ្យាល័យជម្ពូរវ័ន្ត និងអនុវិទ្យាល័យពោធិចិនតុងនៅខណ្ឌពោធិសែនជ័យ និងសាលាមួយកន្លែងទៀត នៅខណ្ឌឫស្សីកែវធ្វើជាកន្លែងសម្រាប់ធ្វើចត្តាឡីស័ក៕
ដោយ ៖ ស្រីរ័ត្ន