ព័ត៌មានជាតិ

អភិបាលស្រុកសំរោងចុះពិនិត្យបើកការដ្ឋានជួសជុលផ្លូវលំប្រវែងជាង ១០០០ម៉ែត្រ

បានផុស

៤ years មុន

នៅ

ថ្ងៃចន្ទ ៣០ វិច្ឆិកា ២០២០

ដោយ

តាកែវ ៖ លោក កេត ម៉ៅ អភិបាល នៃគណៈអភិបាលស្រុកសំរោង ដោយមានការចូលរួមពីលោក ស្វាយ ឧត្ថោ អភិបាលរងស្រុក លោក អន បូរ៉ា ប្រធានការិយាល័យផែនការ និងគាំទ្រឃុំ លោកមេឃុំ លោក លោកស្រីសមាជិកក្រុមប្រឹក្សាឃុំ ស្មៀនឃុំសំរោង លោកមេភូមិ បានចុះពិនិត្យ និងបើកការដ្ឋានជួសជុលផ្លូវនៅក្នុងមូលដ្ឋាន នាថ្ងៃចន្ទ ១៥កើត ខែមិគសិរ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី៣០ ខែវិច្ឆិកា ឆ្នាំ២០២០។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរស្រុកសំរោង ប្រាប់ឲ្យដឹងថា ផ្លូវដែលត្រូវបើកការដ្ឋានជួសជុលផ្លូវ នាថ្ងៃនេះ គឺជាផ្លូវលំក្រាលគ្រួសធម្មជាតិ ប្រវែង ១,០៨៩ ម៉ែត្រ និងទទឹងខ្នងប្រវែង ៥ ម៉ែត្រ កម្រាស់គ្រួស ១៥០មម។ ផ្លូវលំមួយខ្សែនេះមានអត្ថប្រយោជន៍សម្រាប់បងប្អូនប្រជាពលរដ្ឋ ធ្វើដំណើរឆ្លងកាត់ ចំនួន ២ ភូមិ រួមមាន ភូមិដីក្រហម និងភូមិកន្សោមអក នៃស្រុកសំរោង ខេត្តតាកែវ ដោយប្រើប្រាស់ថវិកាមូលនិធិឃុំ ឆ្នាំ ២០២០។

ពិធីបើកការដ្ឋាននេះមានការចូលរួមពីគណៈកម្មាការគ្រប់គ្រងគំរោងឃុំ មេភូមិ អនុភូមិ អ្នកទទួលការ ព្រមទាំងបងប្អូនប្រជាពលរដ្ឋក្នុងភូមិជាអ្នកទទួលផលជាច្រើនរូបផងដែរ។

សូមជម្រាបជូនឲ្យដឹងថា កាលពីថ្ងៃព្រហស្បតិ៍ ១១កើត ខែមិគសិរ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៦ ខែវិច្ឆិកា ឆ្នាំ២០២០ កន្លងទៅថ្មីៗនេះ អាជ្ញាធរស្រុកសំរោង ក៏បានបើកការដ្ឋានជួសជុលផ្លូវលំក្រាលគ្រួសធម្មជាតិប្រវែង ៣,៨៦៦ ម៉ែត្រ ទទឹងប្រវែង ៥,៥ ម៉ែត្រ ឆ្លងកាត់ ចំនួន ៥ ភូមិ រួមមាន ភូមិស្វាយទង ភូមិត្រាំគល់ ភូមិអង្គញ់ ភូមិព្រៃជ័រ និងភូមិត្រពាំងឃ្លោក សម្រាប់បំរើផលប្រយោជន៍ជូនបងប្អូនរស់នៅស្រុកសំរោង ខេត្តតាកែវ ដោយប្រើប្រាស់ថវិកាមូលនិធិឃុំ ឆ្នាំ២០២០។