ក្រុមមេធាវីរាជរដ្ឋាភិបាល ទាត់ចោលទាំងស្រុង នូវការចុះផ្សាយដោយគ្មានសច្ចភាព របស់សារព័ត៌មាន The Guardian

សេចក្ដីថ្លែងការណ៍បដិសេធ របស់ក្រុមមេធាវីរាជរដ្ឋាភិបាល នៅថ្ងៃទី៦ ខែតុលានេះ បានសរសេរថា កាលពីថ្ងៃទី៣ ខែតុលា ឆ្នាំ២០២១ សារព័ត៌​មាន The Guardian ដែលមានមូលដ្ឋាននៅចក្រភពអង់គ្លេស បានចុះផ្សាយអត្ថបទ​មួយ ដែលមានចំណងជើងថា «ការិយាល័យមេធាវី ដែលបង្កើតឡើងដោយប្រធានាធិបតីប្រទេសស៊ីប (Cyprus) ត្រូវបានចោទប្រកាន់ពីការ​លា​ក់​បំបាំង នូវទ្រព្យសម្បត្តិរបស់ជនជាតិរុស្ស៊ី ដែលរត់គេចខ្លួន» ដែលក្នុងនោះ បាន​ចុះផ្សាយចោទប្រកាន់​ដោយ​បំភ្លៃ​ការពិតទាំងស្រុងថា សម្ដេច ហ៊ុន សែន មានលិខិតឆ្លងដែនប្រទេសស៊ីប (Cyprus)។

ក្រុមមេធាវីរាជរដ្ឋាភិបាល សូមបដិសេធ និងទាត់ចោលទាំងស្រុង នូវការចុះផ្សាយដោយគ្មានសច្ចភាព គ្មានមូល​ដ្ឋាន និងផ្ទុយពីការពិត របស់សារព័ត៌មាន The Guardian ខាងលើនេះ។ ក្រុមមេធាវីរាជរដ្ឋាភិបាល បានបញ្ជាក់ថា សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា មានសញ្ជាតិខ្មែរតែមួយគត់ គ្មានសញ្ជាតិបរទេសណាមួយ គ្មាន​លំនៅដ្ឋានណាមួយឯបរទេស ហើយក៏មិនដែលរត់ចោលប្រជាជន និងប្រទេសកម្ពុជានោះទេ។

ក្រុមមេធាវីរាជរដ្ឋាភិបាល បានបញ្ជាក់ទៀតថា ការចុះផ្សាយថា សម្ដេច ហ៊ុន សែន មានលិខិតឆ្លងដែនប្រទេស៊ីប (Cyprus) ជាការចុះផ្សាយដែលបំផ្លើស និងប្រាសចាកពីការពិតសុទ្ធសាធ៕