ព័ត៌មានអន្ដរជាតិ

UN៖ ការមិនអើពើនឹងច្បាប់អន្តរជាតិ កំពុងរុញឱ្យជម្លោះកើតឡើងថ្មីៗជាបន្តបន្ទាប់ នាំមកនូវផលលំបាកធ្ងន់ធ្ងរ

បានផុស

២៩ វិនាទី មុន

នៅ

ថ្ងៃសុក្រ ២៤ កក្កដា ២០២៦

ដោយ

អគ្គលេខាធិការអង្គការសហប្រជាជាតិ(UN) លោក Antonio Guterres បានព្រមាននៅថ្ងៃព្រហស្បតិ៍ថា ការមិនអើពើនឹងច្បាប់អន្តរជាតិ កំពុងជំរុញឱ្យមានជម្លោះកាន់តែច្រើនឡើងៗ និងវិបត្តិកាន់តែអាក្រក់ទៅៗនៅទូទាំងមជ្ឈិមបូព៌ា ដោយតំបន់នេះកំពុងប្រឈមមុខនឹងផលវិបាកដ៏ធ្ងន់ធ្ងរ។ នេះបើយោងតាមការចុះផ្សាយរបស់ទីភ្នាក់ងារសារព័ត៌មានតួកគី Anadolu នៅថ្ងៃទី២៣ ខែកក្កដា ឆ្នាំ២០២៦ ។

លោក Guterres ប្រាប់ក្រុមប្រឹក្សាសន្តិសុខអង្គការសហប្រជាជាតិស្តីពីការដោះស្រាយជម្លោះដោយសន្តិវិធី ថា៖ « សព្វថ្ងៃនេះ ជម្លោះកំពុងកើនឡើងទាំងចំនួន ភាពស្មុគស្មាញ រយៈពេល និងវិសាលភាព។ និទណ្ឌភាពកំពុងរីករាលដាល។ ការរំលោភបំពានកំពុងគ្មានចម្លើយ។ ស្ថានភាពកំពុងហួសពីការគ្រប់គ្រង! វាកំពុងរង្គោះរង្គើនៅលើគែមនៃភាពមិនអាចនឹកស្មានដល់»។

អគ្គលេខាធិការអង្គការសហប្រជាជាតិ លោក Antonio Guterres។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយជំរុញឱ្យមានការស្ដារឡើងវិញនូវសិទ្ធិ និងសេរីភាពនាវាចរណ៍នៅជុំវិញច្រកសមុទ្រ Hormuz និងច្រកសមុទ្រ Bab al-Mandab (ស្ថិតនៅចន្លោះប្រទេសយេម៉ែន នៅលើឧបទ្វីបអារ៉ាប់) លោកមានប្រសាសន៍ថា៖ « សិទ្ធិ និងសេរីភាពនាវាចរណ៍អន្តរជាតិនៅ និងជុំវិញច្រកសមុទ្រ Hormuz និង Bab al-Mandab ត្រូវតែស្ដារឡើងវិញយ៉ាងពេញលេញ។ ការទូតគឺជាមធ្យោបាយតែមួយគត់ ដើម្បីឆ្ពោះទៅមុខយ៉ាងត្រឹមត្រូវ»។

ងាកទៅតំបន់ហ្គាហ្សាវិញ លោក Guterres និយាយថា ជនស៊ីវិលនៅតែរងគ្រោះរៀងរាល់ថ្ងៃ ទោះបីជាមានបទឈប់បាញ់ក៏ដោយ ដោយជនរងគ្រោះត្រូវបានសម្លាប់នៅក្នុងផ្ទះ និងសហគមន៍របស់ពួកគេ ខណៈអ៊ីស្រាអែលបង្កើនការគ្រប់គ្រងលើតំបន់នេះ។

លោកសង្កត់ធ្ងន់ថា៖ « ក្នុងពេលជាមួយគ្នានេះ ស្ថានភាពរស់នៅ នៅតែមិនអាចទ្រាំទ្របាន ហើយជំងឺដ៏គួរឱ្យភ័យខ្លាច កំពុងរីករាលដាល ដោយប្រតិបត្តិការមនុស្សធម៌ត្រូវបានរារាំងយ៉ាងខ្លាំង»។

លោក Guterres ក៏បានជំរុញឱ្យរដ្ឋជាសមាជិក ដើរតួនាទីក្នុងការចូលរួមជាមួយ UN ព្រោះគ្មានគំនិតផ្តួចផ្តើមការទូតណាមួយឥតប្រយោជន៍ទេ ហើយក៏គ្មានការសន្ទនាណាមួយឥតប្រយោជន៍ដែរ»៕

ណឺ មិនា