វិធានការមួយសំខាន់ បើធ្វើមិនបាន វីរុសកូវីដបំប្លែងខ្លួនថ្មី នឹងលេចចេញនៅឆ្នាំក្រោយ

ក្រុមអ្នកជំនាញបានព្រមានថា វីរុសកូវីដ-១៩អាចបំប្លែងខ្លួនថ្មីទៀត ក្នុងរយៈពេលមួយឆ្នាំ ប្រសិនបើអាជ្ញាធរនៅជុំវិញពិភពលោក មិនចាត់វិធានការដើម្បីជួយប្រទេសដែលគ្មានលទ្ធភាពទទួលវ៉ាក់សាំងទេនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍មួយដែលចេញផ្សាយក្នុងប្រទេសអូស្ត្រាលីនៅសប្តាហ៍នេះ បានចង្អុលបង្ហាញពីគ្រោះថ្នាក់រយៈពេលវែង ដែលបង្កឡើងដោយវីរុសកូវីដ-១៩ ហើយនិយាយថា ជំងឺរាតត្បាតនេះ នឹងមិនបញ្ចប់ចំពោះបុគ្គលណាម្នាក់ទេ រហូតដល់វាបញ្ចប់សម្រាប់មនុស្សគ្រប់គ្នា។

យោងតាមឯកសារបានបង្ហាញថា ការស្ទង់មតិលើអ្នកជំនាញខាងរោគរាតត្បាតចំនួន ៧៧ នាក់មកពី ២៨ ប្រទេស បានរកឃើញថា អ្នកជំនាញពីរភាគបីជឿថា កូវីដអាចបំប្លែងខ្លួនទៀតក្នុងរយៈពេលមួយឆ្នាំ ប្រសិនបើអាជ្ញាធរមិនធ្វើសកម្មភាពឲ្យបានលឿនទេនោះ។

របាយការណ៍នេះនិយាយថា ប្រទេសដែលមានប្រាក់ចំណូលទាប នឹងមិនអាចគ្រប់គ្រងការចាក់វ៉ាក់សាំងឲ្យបាន ៧០ ភាគរយនៃប្រជាជនរបស់ពួកគេបានឡើយរហូតដល់ឆ្នាំ ២០៣០ ប្រសិនបើប្រទេសអ្នកមានមិនជួយ។

ស្របពេលជាមួយគ្នានោះដែរ ក្រុមអ្នកជំនាញបានអំពាវនាវដល់រដ្ឋាភិបាលអូស្រ្តាលី ឲ្យសន្យា ចែករំលែកវ៉ាក់សាំងចំនួន ២០ លានដូសទៀត និងវិនិយោគជាទឹកប្រាក់បន្ថែម ២៥០ លានដុល្លារនៅក្នុងកម្មវិធី Covax។

របាយការណ៍ដដែលបន្តថា “ល្បឿនគឺសំខាន់ណាស់។ ប្រសិនបើយើងចាក់វ៉ាក់សាំងដល់ពិភពលោកកាន់តែលឿន លទ្ធភាពនៃវីរុសដែលបំប្លែងខ្លួននឹងធ្លាក់ចុះ។ វាស្ថិតនៅក្នុងអំណាចរបស់យើងដើម្បីកំណត់ឱកាសនៃការបំប្លែងខ្លួនរបស់វីរុស”។

គួរបញ្ជាក់ថា របាយការណ៍នេះបានបញ្ចេញ ចំពេលដែលប្រទេសជាច្រើន រួមទាំងសហរដ្ឋអាមេរិក អ៊ីស្រាអែលនិងចក្រភពអង់គ្លេសផងដែរ បានចាប់ផ្តើមចាក់វ៉ាក់សាំងការពារជំងឺកូវីដ-១៩ ដូសជំរុញ៕

ប្រែសម្រួល៖ Vann Vann

ប្រភព៖ Mirror

ចុចអាន៖ ទោះជាសះស្បើយពីកូវីដ មនុស្សមួយចំនួន នៅតែមានអាការ ៥យ៉ាងនេះ រយៈពេល៦ខែ