ជីវិតកម្សាន្ដ

ជើងខ្លាំងទាំង៥ក្រុម ក្នុងវគ្គជម្រុះចុងក្រោយ មាន៣ក្រុមណាទៅវគ្គផ្ដាច់ព្រ័ត្របាន?

បានផុស

៥ years មុន

នៅ

ថ្ងៃចន្ទ ១ វិច្ឆិកា ២០២១

ដោយ

កាលពីវគ្គពាក់កណ្ដាលផ្ដាច់ព្រ័ត្រ ដែលបានបញ្ចប់កន្លងទៅ កម្មវិធីវង់តន្ត្រីខ្មែរ រដូវកាលទី២ បានស្វែងរកឃើញបេក្ខជនឆ្នើមទាំង៥ក្រុម ក្នុងវិញ្ញាសាបីផ្សេងគ្នារួមមាន វង់ភ្លេងពិណពាទ្យ ល្ខោនខោល និងល្ខោនយីកេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បេក្ខជនប្រកួតទាំង ៥ក្រុម ក៏បានឆ្លងកាត់នូវដំណាក់កាលបោះឆ្នោតពីទស្សនិកជន តាមរយៈវីដេអូបង្ហាញសមត្ថភាពនៃបេក្ខជននីមួយៗក្នុងផេកហ្វេសប៊ុកផ្លូវការរបស់សហភាពសហព័ន្ធយុវជនកម្ពុជា ពោលគឺពិន្ទុសម្រាប់វគ្គជម្រុះចុងក្រោយនេះ មាន៤០% ដែលយកចេញពីពិន្ទុបោះឆ្នោតរបស់បងប្អូនទស្សនិកជន។

ដោយឡែកពិន្ទុ៦០%ទៀត ជាការវិនិច្ឆ័យវាយតម្លៃពីសំណាក់គណៈកម្មការមេប្រយោគ ដែលក្នុងនោះ សមាសភាពបេក្ខជនរួមមាន៖

១. ក្រុមទេពបទុមវង្សពិណពាទ្យ (រាជធានីភ្នំពេញ) វិញ្ញាសា បទដំណើរសេះបីជាន់ ឬ(បទសាឡូម៉ា) ៣ជាន់។

២. ក្រុមពន្លកយុវជនយីកេ (រាជធានីភ្នំពេញ) វិញ្ញាសា រឿង ទិព្វសូដាច័ន្ធ (ភាគបញ្ចប់)

៣. ក្រុមមន្ទីរវប្បធម៌ខេត្តបន្ទាយមានជ័យ (ខេត្តបន្ទាយមានជ័យ) វិញ្ញាសា បទដំណើរសេះបីជាន់ ឬ(បទសាឡូម៉ា) ៣ជាន់

៤. ក្រុម យុវជនខ្មែរថែមរតកដូនតា (ខេត្តកណ្តាល) វិញ្ញាសា បទដំណើរសេះបីជាន់ ឬ(បទសាឡូម៉ា) ៣ជាន់

៥. ក្រុមយុវជនល្ខោនខោលកម្ពុជា (រាជធានីភ្នំពេញ) វិញ្ញាសា ដកស្រង់ពីរឿងរាមកេរ្តិ៍

ជាលទ្ធផល គឺកម្មវិធីបានរកឃើញក្រុមចំនួន៣ ដែលទទួលបានពិន្ទុសរុបខ្ពស់ជាងគេ (ពិន្ទុបោះឆ្នោត បូកនឹងពិន្ទុវាយតម្លៃពីគណៈកម្មការ) គឺក្រុមទេពបទុមវង្សពិណពាទ្យ ក្រុមមន្ទីរវប្បធម៌ខេត្តបន្ទាយមានជ័យ ក្រុមយុវជនល្ខោនខោលកម្ពុជា។

បេក្ខជនទាំង៣ក្រុម នឹងមានឱកាសទៅវគ្គផ្ដាច់ព្រ័ត្រ ដើម្បីយកជយលាភីលេខ១ បន្តដោយលេខ២ និងលេខ៣។ ដោយឡែក កម្មវិធីក៏សូមចូលរួមសោកស្ដាយចំពោះក្រុមពន្លកយុវជនយីកេ និងក្រុមយុវជនខ្មែរថែមរតកដូនតា ដែលមិនមានឱកាសទៅវគ្គបន្ត ហើយពីកម្មវិធីក៏លើកទឹកចិត្តឲ្យក្រុមទាំង២ បន្តនូវស្មារតីលើកតម្កើងវប្បធម៌បុរាណខ្មែរជានិច្ចនិរន្តរ៍។

កម្មវិធីវង់តន្ត្រីខ្មែររដូវកាលទី២ នឹងមានការចាក់ផ្សាយលើកញ្ចក់ទូរទស្សន៍ BTV រៀងរាល់ថ្ងៃសៅរ៍ ចាប់ពីម៉ោង ៨យប់តទៅ និងការផ្សាយបន្តផ្ទាល់លើផេកផ្លូវការ របស់សហភាពសហព័ន្ធយុវជនកម្ពុជា ខេត្តស្វាយរៀងផងដែរ៕