WHO ព្រមានថា Omicron កំពុងរាលដាលលឿនជាងវីរុសបំប្លែងខ្លួនមុនៗ

អង្គការសុខភាពពិភពលោក (WHO) កាលពីថ្ងៃអង្គារបានព្រមានថា Omicron កំពុងរីករាលដាលលឿនជាងវីរុសកូវីដបំប្លែងខ្លួនមុនៗ ហើយវាប្រហែលជាមានវត្តមាននៅ ក្នុងប្រទេសភាគច្រើននៃពិភពលោក ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គនាយក WHO លោក Tedros Adhanom Ghebreyesus បាននិយាយក្នុងអំឡុងពេលធ្វើបច្ចុប្បន្នភាពកូវីដនៅទីក្រុងហ្សឺណែវថា “Omicron កំពុងរីករាលដាលក្នុងអត្រាមួយដែលយើងមិនបានឃើញជាមួយនឹងវីរុសបំប្លែងខ្លួនពីមុនណាមួយឡើយ ។ ប្រទេសចំនួន ៧៧ ឥឡូវនេះបានរាយការណ៍ករណីឆ្លង omicron ។ ហើយការពិតគឺថា Omicron ប្រហែលជានៅ ក្នុងប្រទេសភាគច្រើន ទោះបីជាកន្លែងផ្សេងទៀតមិនទាន់ត្រូវបានរកឃើញក៏ដោយ” ។

លោក Tedros បាននិយាយថា WHO មានការព្រួយបារម្ភលើប្រទេសនានាកំពុងចាត់ទុក Omicron ជាវីរុសបំប្លែងខ្លួនស្រាល ។ យ៉ាងណាទោះបីជា Omicron មានការឆ្លងខ្លាំងក៏ដោយ ក៏វាមិនទាន់ច្បាស់ថាតើមេរោគនេះបង្កជាជំងឺស្រាល ឬធ្ងន់ធ្ងរជាងវីរុសបំប្លែងខ្លួនពីមុនៗនោះទេ ។

ទន្ទឹមនោះលោក Tedros បានព្រមានថា វ៉ាក់សាំងតែមួយមុខនឹងមិនការពារប្រទេសពី Omicron នោះទេ ហើយបានសង្កត់ធ្ងន់លើសារៈសំខាន់នៃការពាក់ម៉ាស និងគម្លាតសង្គមជាដើម ។

ចំណែកលោកវេជ្ជបណ្ឌិត Mike Ryan នាយកប្រតិបត្តិនៃកម្មវិធីសង្គ្រោះបន្ទាន់ផ្នែកសុខភាពរបស់ WHO បាននិយាយថា វិធានការដូចជាការពាក់ម៉ាស និងរក្សាគម្លាតសង្គមក៏មិនមែនមានន័យថាបញ្ឈប់ការចម្លងមេរោគទាំងស្រុងនោះផងដែរ ប៉ុន្តែវិធានការទាំងនេះនឹងកាត់បន្ថយសម្ពាធលើប្រព័ន្ធសុខាភិបាលជុំវិញពិភពលោក ។

លោក Ryan បាននិយាយថា រដ្ឋាភិបាលជុំវិញពិភពលោកត្រូវរៀបចំសម្រាប់រលកនៃការឆ្លងថ្មីដោយធ្វើឲ្យប្រាកដថា មន្ទីរពេទ្យមានការផ្គត់ផ្គង់បុគ្គលិក ជំនួយ និងអុកស៊ីសែននៅ នឹងកន្លែង ។ លោក​ក៏​បាន​និយាយ​ដែរ​ថា រដ្ឋាភិបាល​ត្រូវ​បន្ត​ជំរុញ​អ្នក​ដែល​មិន​បាន​ចាក់​វ៉ាក់សាំងឲ្យ​ទទួល​បាន​ការ​ចាក់វ៉ាក់សាំង ៕

ប្រែសម្រួលដោយ ៖ ជីវ័ន្ត

ប្រភព ៖ CNBC

ចុចអាន ៖ Omicron ពិតជាឆ្លងខ្លាំងជាង Delta និងធ្វើឲ្យវ៉ាក់សាំង ថយប្រសិទ្ធភាពមែន