ពេទ្យ វៀតណាម ប្រើពេលជិត ៣ ម៉ោង វះយកកូនបាល់ដែក ២៥ គ្រាប់ចេញពីពោះទារកអាយុ ៣៧ ខែ

វេជ្ជបណ្ឌិតនៅក្នុងខេត្ត Nghe An ភាគពាយ័ព្យនៃប្រទេសវៀតណាមកាលពីថ្ងៃសុក្របានវះយកគ្រាប់បាល់ដែកក្មេងលេងចំនួន ២៥ គ្រាប់ចេញពីពោះរបស់ទារកអាយុ ៣៧ ខែម្នាក់ ។

ក្រុមគ្រួសាររបស់ក្មេងឈ្មោះ N.T.T. បាននាំទារកទៅមន្ទីរពេទ្យក្នុងតំបន់ ដោយសារក្មេងនោះឈឺពោះខ្លាំង ដោយខ្លាចលេបអ្វីដែលគ្រោះថ្នាក់ ។

នៅពេលដែលការឈឺចាប់របស់ទារកកាន់តែអាក្រក់ N.T.T.  ត្រូវបានបញ្ជូនទៅមន្ទីរពេទ្យសម្ភព និងកុមារខេត្ត Nghe An ជាកន្លែងដែលគ្រូពេទ្យបានប្រើកាំរស្មីអ៊ិចពិនិត្យមើលពោះឃើញគ្រាប់បាល់ដែកឆក់ជាប់គ្នាជាច្រវ៉ាក់បណ្តាលឲ្យស្ទះពោះវៀន និងក្រពះរបស់គាត់ ។

ភ្លាមៗនោះគ្រូពេទ្យវះកាត់បានប្រើថ្នាំស្ពឹក និងធ្វើការវះកាត់សង្គ្រោះបន្ទាន់លើក្មេងប្រុសនោះ ។ ក្នុងអំឡុងពេលប្រតិបត្តិការវះកាត់ គ្រូពេទ្យបានរកឃើញគ្រាប់បាល់ដែកក្មេងលេងចំនួន ២៥ គ្រាប់ជាប់គ្នា ដែលនាំឲ្យធ្លាយពោះវៀន ។

ក្រោយវះកាត់រយៈពេលជិត ៣ ម៉ោង ក្រុមគ្រូពេទ្យបានយកវត្ថុគ្រោះថ្នាក់ទាំងអស់ចេញដោយជោគជ័យ ហើយកុមារបានទទួលការបំបៅតាមសរសៃឈាម បន្ទាប់ពីការវះកាត់ ខណៈពេលនេះសុខភាព​របស់​គាត់​បាន​ប្រសើរ​ឡើង​ហើយ ប៉ុន្តែ​នៅ​តែ​ត្រូវ​ការ​តាម​ដាន​បន្ថែម​ទៀត ។

គួរបញ្ជាក់ថា ការលេបវត្ថុដូចជាកូនបាល់ដែក គឺជាឧបទ្ទវហេតុទូទៅមួយចំពោះកុមារតូចៗ ហើយវាមានគ្រោះថ្នាក់ខ្លាំងណាស់ ហើយក្នុង​ករណី​នេះគ្រូពេទ្យ​ណែនាំឲ្យ​យក​កុមារ​ទៅ​មណ្ឌល​សុខភាពឲ្យ​បាន​លឿនដើម្បី​ពិនិត្យ និង​ព្យាបាល​​ទាន់​ពេលវេលា ៕

ប្រែសម្រួលដោយ ៖ ជីវ័ន្ត

ប្រភព ៖ Tuoi Tre

ចុចអាន ៖ វៀតណាម ចាប់ខ្លួនមេជួញដូរក្រលៀនខុសច្បាប់ ត្រៀមផ្តន្ទាទោសជាប់គុកមួយជីវិត