ចូ បៃដិន ព្រមានថា រុស្ស៊ី អាចវាយ អ៊ុយក្រែន ខែក្រោយ

ប្រធានាធិបតីអាមេរិកលោក ចូ បៃដិន បានព្រមានថា មានលទ្ធភាពជាក់ស្តែងដែលថា រុស្ស៊ីអាចវាយចូល អ៊ុយក្រែននៅខែក្រោយនេះ។

ប្រធានាធិបតីសហរដ្ឋអាមេរិក បានធ្វើអត្ថាធិប្បាយបែបនេះ នៅក្នុងកិច្ចសន្ទនាតាមទូរសព្ទជាមួយប្រធានាធិបតីអ៊ុយក្រែនលោក Volodymyr Zelensky កាលពីថ្ងៃព្រហស្បតិ៍ទី២៧ខែមករា។

អ្នកនាំពាក្យក្រុមប្រឹក្សាសន្តិសុខជាតិសេតវិមាន លោកស្រី Emily Horne បាននិយាយថា “លោក បៃដិន ​បាន​និយាយ​រឿង​នេះ​ជា​សាធារណៈ ហើយ​យើង​បាន​ព្រមាន​អំពី​រឿង​នេះអស់រយៈពេល​ជាច្រើន​ខែមកហើយ”។

យោងតាមសេចក្តីថ្លែងការណ៍របស់សេតវិមាន, ក្នុងអំឡុងពេលនៃកិច្ចពិភាក្សារបស់មេដឹកនាំទាំង២ លោកប្រធានាធិបតី បៃដិន បានអះអាងជាថ្មីអំពីការត្រៀមខ្លួនរបស់សហរដ្ឋអាមេរិក រួមជាមួយសម្ព័ន្ធមិត្ត និងដៃគូរបស់ខ្លួន ដើម្បីឆ្លើយតបយ៉ាងម៉ឺងម៉ាត់ ប្រសិនបើរុស្ស៊ីវាយចូលអ៊ុយក្រែនកាន់តែជ្រៅ។

ស្របពេលជាមួយគ្នានោះដែរ លោក Zelensky បាននិយាយថា ពួកគេបានពិភាក្សាអំពីកិច្ចខិតខំប្រឹងប្រែងការទូតនាពេលថ្មីៗនេះ ស្តីពីការកាត់បន្ថយភាពតានតឹង និងបានយល់ព្រមលើសកម្មភាពរួមគ្នាសម្រាប់ពេលអនាគត។

ដោយឡែកកាលពីថ្ងៃចន្ទទី២៤ខែមករា ប្រធានាធិបតីអាមេរិកលោក ចូ បៃដិន បាននិយាយថា មានការឯកភាពទាំងស្រុង ជាមួយមេដឹកនាំអឺរ៉ុប ជុំវិញបញ្ហារុស្ស៊ីបង្កើនកងទ័ពនៅតាមព្រំដែនជាប់ប្រទេស អ៊ុយក្រែន។

លោកប្រធានាធិបតី បៃដិន បានរៀបចំកិច្ចសន្ទនាតាមរយៈ Video Call ជាមួយសម្ព័ន្ធមិត្តអឺរ៉ុប ខណៈមហាអំណាចលោកខាងលិច មានគោលបំណងដាក់យុទ្ធសាស្ត្ររួមមួយ ប្រឆាំងនឹងសកម្មភាពរបស់រុស្ស៊ី។

ចក្រភពអង់គ្លេស បានព្រមានរុស្ស៊ី អំពីទណ្ឌកម្មរហ័សនិងមិនធ្លាប់មានពីមុនមក ប្រសិនបើហេតុការណ៍ណាមួយកើតឡើង។ 

ទោះបីជាយ៉ាងណាក៏ដោយ រុស្ស៊ី​បានបដិសេធ​ផែនការ​វាយចូល​អ៊ុយក្រែន បើ​ទោះបី​ជា​មាន​ទាហាន​១០​ម៉ឺន​នាក់ កំពុងឈរជើងនៅព្រំដែន​ក៏ដោយ៕

ប្រែសម្រួល៖ Vann Vann

ប្រភព៖ BBC

ចុចអាន៖ ឃើញស្រស់ស្អាតអ៊ីចឹង តែតាមពិត ទាហានស្រីទាំងនេះ ជាអាវុធសម្ងាត់របស់ រុស្ស៊ី