កសិករ៖ ​តម្លៃស្រូវ​អ៊ីអ៊ែ​មាន​ស្ថាន​ភាពល្អ​ តែ​មិន​អាច​ទប់​ការ​ចំណាយលើ​ជីប្រេង​

តម្លៃស្រូវ អ៊ីអ៊ែនៅខេត្តមួយចំនួន មានស្ថានភាពល្អប្រសើរចន្លោះពី ៨០០ រៀល ដល់ជិត ៩០០ រៀល គិតត្រឹមថ្ងៃទី ០៣ ខែកុម្ភៈ ឆ្នាំ ២០២២ នេះ ហើយតម្លៃខុសគ្នាតិចតួចតាមតំបន់មួយចំនួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កសិករនៅស្រុកពាមជរ ខេត្តព្រៃវែង អ្នកស្រី ឆុន រ៉េន នៅថ្ងៃទី ០៣ ខែកុម្ភៈនេះ បានប្រាប់ថា តម្លៃស្រូវឆ្នាំនេះ មានភាពល្អប្រសើរ ប៉ុន្តែនៅតែមិនអាចទប់លើការចំណាយទៅលើជីប្រេង និងថ្នាំបាន។

អ្នកស្រីប្រាប់ថា ឆ្នាំនេះអ្នកស្រីធ្វើស្រែប្រាំង ៣ ហិកតា ហើយប្រមូលផលមួយហិកតាដំបូងទទួលបានទិន្នផលប្រមាណ ៥ តោន ខណៈតម្លៃលក់បាន ១ គីឡូ ៨៧០ រៀល។

កសិកររូបនេះអះអាងថា “ត្បិតតម្លៃស្រូវបានថ្លៃគួសម ប៉ុន្តែមិន​អាច​ទប់លើការចំណាយទៅលើជី ប្រេង និងថ្នាំសម្រាប់បាញ់ស្រូវបានទេ ដោយសារតម្លៃ​ជីក៏ឡើង​ថ្លៃខ្ពស់ដែរ”។

ទិន្នន័យពីសហព័ន្ធស្រូវអង្កកម្ពុជា បង្ហាញថា នៅស្រុកពាមជរ និងស្រុកព្រះស្ដេច​ខេត្តព្រៃវែង ស្រូវអ៊ីអ៊ែ (IR) មានតម្លៃចន្លោះពី ៨២០ ទៅ ៨៤០ រៀល ក្នុងមួយគីឡូ៕

អត្ថបទ៖ ឡេង ដេត