រុស្ស៊ី ព្រមានប្រទេស២ទៀត ឲ្យប្រយ័ត្នខ្លួន កុំចង់ចូល​ ណាតូ ឲ្យសោះ (មានវីដេអូ)

មន្ត្រីរុស្ស៊ីម្នាក់កាលពីថ្ងៃសុក្រទី២៥ខែកុម្ភៈ បានចេញការព្រមានដល់ប្រទេសហ្វាំងឡង់ និងស៊ុយអែត ប្រសិនបើប្រទេសទាំងពីរមានបំណងចូលរួមជាមួយអង្គការណាតូ ដោយនិយាយថា ទង្វើបែបនេះនឹងមានផលប៉ះពាល់នយោបាយយោធា ធ្ងន់ធ្ងរ។

ក្នុងអំឡុងសន្និសីទសារព័ត៌មាន អ្នកនាំពាក្យក្រសួងការបរទេសរុស្ស៊ីលោកស្រី Maria Zakharova បានធ្វើការកត់សម្គាល់បែបនេះ នៅពេលដែលកងកម្លាំងរុស្ស៊ី បន្តប្រយុទ្ធជាមួយទាហានអ៊ុយក្រែន បន្ទាប់ពីការវាយលុយដោយមិនញញើត ចូលទៅក្នុងប្រទេសជិតខាង។

លោកស្រីបាននិយាយនៅក្នុងឃ្លីបវីដេអូមួយថា “ដោយសារតែសន្តិសុខរបស់ពួកគេ ហ្វាំងឡង់ និងស៊ុយអែត មិនគួរបង្កឲ្យមានការបំផ្លាញសន្តិសុខរបស់ប្រទេសផ្សេងទៀតនោះទេ ហើយការចូលជាសមាជិកអង្គការ ណាតូ អាចមានផលវិបាក និងប្រឈមមុខនឹងផលវិបាកផ្នែកយោធា និងនយោបាយមួយចំនួន”។

ក្រោយ​មក ​ក្រសួង​បាន​បង្ហោះ​ការ​គំរាម​កំហែង​ដូច​គ្នានេះ​នៅ​លើ Twitter។

Twitter នោះសរសេរថា “យើងចាត់ទុកការប្តេជ្ញាចិត្តរបស់រដ្ឋាភិបាលហ្វាំងឡង់ចំពោះគោលនយោបាយមិនចូលបក្សសម្ព័ន្ធយោធាជាកត្តាសំខាន់ក្នុងការធានាសន្តិសុខ និងស្ថិរភាពនៅអឺរ៉ុបខាងជើង។ ការចូលជាសមាជិករបស់ហ្វាំងឡង់ទៅ ណាតូ នឹងមានផលប៉ះពាល់យ៉ាងធ្ងន់ធ្ងរខាងយោធា និងនយោបាយ”។

គួរបញ្ជាក់ថា មេដឹកនាំអ៊ុយក្រែន បានបង្ហាញពីបំណង ចូលរួមជាមួយអង្គការណាតូ ប៉ុន្តែប្រទេសរុស្ស៊ីបានសម្តែងការប្រឆាំងយ៉ាងដាច់ខាត ចំពោះការពង្រីកសម្ព័ន្ធភាពដែលមានសមាជិក៣០ប្រទេស ជាពិសេសនៅតាមព្រំដែនរបស់ខ្លួនជាមួយប្រទេសជិតខាងអ៊ុយក្រែន៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Fox

ចុចអាន៖ សម្រង់សម្តីសំខាន់ ៣ចំណុច ក្នុងសារដែលលោក Zelensky ចេញកណ្តាលអាធ្រាត្រ