លោកនាយឧត្តមសេនីយ៍ វង្ស ពិសេន ៖ ជំងឺកូវីដ-១៩ នៅកម្ពុជា មានសភាពធូរស្រាលវិញ ​មិនមែនជារឿង​ចៃដន្យ

លោកនាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ បានអះអាងយ៉ាងច្បាស់ថា ការឆ្លងរីករាលដាលជំងឺកូវីដ-១៩ នៅកម្ពុជា ដែលបច្ចុប្បន្នមានសភាពធូរស្រាលមកវិញនោះ មិនមែនជារឿងចៃដន្យទេ។

ការលើកឡើង របស់លោកនាយឧត្តមសេនីយ៍ បានធ្វើឡើងនៅក្នុងជំនួបពិភាក្សាការងារ ជាមួយលោកនាយឧត្តមសេនីយ៍ តាន់ស្រ៊ី ដាតូស្រ៊ី ហ្សាមរ៉ូស ប៊ីន ម៉ូដ ហ្សេន មេបញ្ជាការកងទ័ពជើងគោកម៉ាឡេស៊ី នៅក្នុងឱកាសដឹកនាំប្រតិភូ មកបំពេញទស្សនកិច្ច នៅព្រះរាជាណាចក្រកម្ពុជា នាថ្ងៃទី ៣ ខែមីនា ឆ្នាំ ២០២២។

លោកនាយឧត្តមសេនីយ៍ វង្ស ពិសេន បានបញ្ជាក់ថា ក្រោមការដឹកនាំដ៏ឈ្លាសវៃ ប៉ិនប្រសប់ និងផ្លាស់ប្ដូរយុទ្ធវិធីទាន់ពេលវេលា របស់រាជរដ្ឋាភិបាល ដែលមានសម្ដេចតេជោ ហ៊ុន សែន ជាប្រមុខ និងដោយមានការចូលរួម ពីកងកម្លាំងប្រដាប់អាវុធ មន្ត្រីរាជការ ប្រជាពលរដ្ឋ ក៏ដូចជាការចូលរួមជួយឧបត្ថម្ភគាំទ្រពីបណ្ដាប្រទេសជាមិត្ត អង្គការសុខភាពពិភពលោក ធ្វើឲ្យកម្ពុជាទប់ស្កាត់បានការរីករាលដាលជំងឺកូវីដ-១៩ ហើយបច្ចុប្បន្ន ស្ថានភាពនៃការឆ្លងរីករាលដាលមានភាពធូរស្រាល អាចគ្រប់គ្រងបាន និងឈានដល់ការបើកប្រទេសពេញលេញឡើងវិញ។

លោកនាយឧត្តមសេនីយ៍ អគ្គមេបញ្ជាការកម្ពុជា ក៏បានលើកឡើងពីទំនាក់ទំនង កិច្ចសហប្រតិបត្តិការរវាងប្រទេសទាំងពីរនាពេលកន្លងមក។ ក្នុងនោះលើវិស័យកងទ័ព ប្រទេសទាំងពីរនៅតែបន្តកិច្ចសហប្រតិបត្តិការជាមួយគ្នា រួមមាន៖ ការផ្លាស់ប្ដូរព័ត៌មាន ការបង្ក្រាបឧក្រិដ្ឋកម្មឆ្លងដែន ការហ្វឹកហ្វឺន ការធ្វើលំហាត់សមយុទ្ធរួមគ្នា ការផ្លាស់ប្ដូរទស្សនកិច្ច និងបានសំណូមពរដល់កងទ័ពម៉ាឡេស៊ី បន្តចូលរួមជួយក្នុងលទ្ធភាពដល់ការផ្ដល់អាហារូបករណ៍ សម្រាប់ការហ្វឹកហ្វឺនរបស់កងយោធពលខេមរភូមិន្ទ។

នាឱកាសនោះ លោកនាយឧត្តមសេនីយ៍ តាន់ស្រ៊ី ដាតូស្រ៊ី ហ្សាមរ៉ូស ប៊ីន ម៉ូដ ហ្សេន បានសម្ដែងការអរគុណ ចំពោះអគ្គមេបញ្ជាការកងយោពលខេមរភូមិន្ទកម្ពុជា ដែលបានអនុញ្ញាតឲ្យរូបលោក និងគណៈប្រតិភូ បានចូលជួបសម្ដែងការគួរសម ដើម្បីពង្រឹងកិច្ចសហប្រតិបត្តិការ រវាងកងទ័ពប្រទេសទាំងពីរ។

លោកនាយឧត្តមសេនីយ៍ ហ្សាមរ៉ូស ប៊ីន បានគួសបញ្ជាក់ថា អស់រយៈពេលជាច្រើនឆ្នាំមកហើយ ដែលកងទ័ពប្រទេសទាំងពីរ បានសហការគ្នាជាធ្លុងមួយ ហើយរហូតមកដល់បច្ចុប្បន្ន បើទោះបីស្ថានភាពពិភពលោក កំពុងប្រឈមនឹងបញ្ហាជំងឺកូវីដ-១៩ ក៏ដោយ ក៏កងទ័ពប្រទេសទាំងពីរ នៅតែបន្តកិច្ចសហប្រតិបត្តិកា រជាមួយគ្នាយ៉ាងស្អិតរមួត ដែលធ្វើឲ្យកិច្ចសហប្រតិបត្តិការ ពីមួយឆ្នាំទៅមួយឆ្នាំកាន់តែមានភាពល្អប្រសើរជាលំដាប់។

លោកនាយឧត្តមសេនីយ៍ ហ្សាមរ៉ូស ប៊ីន បញ្ជាក់ថា ការពង្រឹងពង្រីកកិច្ចសហប្រតិបត្តិការក្នុងតំបន់ ក៏ដូចជាទ្វេភាគី គឺមានសារៈសំខាន់ណាស់ ក្នុងការធ្វើឲ្យស្ថានភាពតំបន់មានស្ថិរភាព និងសន្តិភាពតែម្ដង៕

អត្ថបទ៖ វិមាន

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត