Tesla​ ​ខាត​​អស់​​១២៦​​ប៊ី​លាន​​ដុល្លារ​ ចំពេល​កង្វល់​​​សេដ្ឋី​ Musk​ ទិញ​ Twitter

ក្រុមហ៊ុនរថយន្តអគ្គីសនី Tesla Inc បានខាតប្រាក់ ១២៦ប៊ីលានដុល្លារអាមេរិកនៅក្នុងតម្លៃកាលពីថ្ងៃអង្គារ៍ម្សិលមិញ ចំពេលអ្នកវិនិយោគព្រួយបារម្ភអំពីនាយកប្រតិបត្តិលោក Elon Musk ប្រហែលជាលក់ភាគហ៊ុនដើម្បីផ្តល់ប្រាក់រួមចំណែក២១ប៊ីលានដុល្លារដល់ការទិញបណ្តាញទំនាក់ទំនងសង្គម Twitter ក្នុងតម្លៃ៤៤ប៊ីលានដុល្លារអាមេរិក។

ក្រុមហ៊ុន Tesla មិនពាក់ព័ន្ធនឹងការទិញ Twitter ទេ ប៉ុន្តែភាគហ៊ុនរបស់វាត្រូវបានកំណត់គោលដៅដោយអ្នកវិនិយោគ បន្ទាប់ពីលោក Musk បានបដិសេធបង្ហាញជាសាធារណៈថាតើប្រាក់ដែលលោកគ្រោងចំណាយក្នុងការទិញបានមកពីណា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការធ្លាក់ចុះ១២.២%នៃផ្សារហ៊ុនរបស់ Tesla កាលពីថ្ងៃអង្គារ៍ស្មើនឹងធ្លាក់ចុះទឹកប្រាក់២១ប៊ីលានដុល្លារនៅក្នុងតម្លៃនៃភាគហ៊ុនរបស់ Tesla ដូចគ្នានឹងសាច់ប្រាក់២១ប៊ីលានដុល្លារដែលលោកបានសន្យាចំពោះកិច្ចព្រមព្រៀងទិញ Twitter។

អ្នកវិភាគនៅ Wedbush Securities លោក Daniel Ives បាននិយាយថា ការព្រួយបារម្ភអំពីការលក់ភាគហ៊ុននាពេលខាងមុខរបស់លោក Musk និងលទ្ធភាពដែលលោកកំពុងត្រូវបានរំខានដោយការទិញ Twitter ធ្វើឲ្យប៉ះពាល់ដល់ផ្សារហ៊ុនរបស់ Tesla។

ដើម្បីធ្វើឲ្យប្រាកដ ការធ្លាក់ចុះភាគហ៊ុនរបស់ Tesla បានកើតមានឡើងប្រឆាំងនឹងផ្នែកខាងក្រោយដ៏លំបាកសម្រាប់ផ្សារហ៊ុនពាក់ព័ន្ធនឹងបច្ចេកវិទ្យាជាច្រើន។ កាលពីថ្ងៃអង្គារ៍ ផ្សារហ៊ុន Nasdaq បានបិទនៅកម្រិតទាបបំផុតគិតចាប់តាំងពីខែធ្នូ ឆ្នាំ២០២០ ខណៈអ្នកវិនិយោគព្រួយបារម្ភអំពីកំណើនសកលយឹត និងការឡើងអត្រាការប្រាក់ខ្ពស់ពីធនាគារកណ្តាលរបស់អាមេរិក។

ភាគហ៊ុនរបស់ Twitter ក៏បានធ្លាក់ចុះដែរកាលពីថ្ងៃអង្គារ៍ ដោយធ្លាក់ចុះ៣.៩%មកបិទនៅត្រឹម ៤៩.៦៨ដុល្លារ​ក្នុង​មួយ​ហ៊ុន​ បើទោះជាលោក Musk បានយល់ព្រមទិញកាលពីថ្ងៃចន្ទជាមួយតម្លៃ៥៤.២០ដុល្លារក្នុងមួយហ៊ុន។

ការរាលដាលកាន់តែធំ បានឆ្លុះបញ្ចាំងពីអ្នកវិនិយោគដែលមានការព្រួយបារម្ភថា ការធ្លាក់ចុះយ៉ាងកំហុគនៃភាគហ៊ុនរបស់ Tesla ដែលលោក Musk ទទួលបានភាគហ៊ុន ២៣៩ប៊ីលានដុល្លារអាចនាំឲ្យបុរសមានទ្រព្យសម្បត្តិច្រើនបំផុតក្នុងពិភពលោកមានគំនិតទី២អំពីការទិញ Twitter។

អ្នកវិភាគទីផ្សារជាន់ខ្ពស់របស់ OANDA លោក Ed Moya បាននិយាយថា ៖«ប្រសិនបើតម្លៃផ្សារហ៊ុនរបស់ Tesla បន្តស្ថិតក្នុងភាពស្រពិចស្រពិលនឹងធ្វើឲ្យប៉ះពាល់ដល់ហិរញ្ញវត្ថុរបស់លោក Musk»។

សាស្ត្រាចារ្យសាកលវិទ្យាល័យ Maryland លោក David Kirsch ដែលការស្រាវជ្រាវផ្តោតលើនវានុវត្តន៍ និងសហគ្រិនភាពបាននិយាយថា អ្នកវិនិយោគចាប់ផ្តើមព្រួយបារម្ភអំពីការធ្លាក់ចុះនៃប្រាក់ចំណេញ៕

ប្រែសម្រួល៖ វីរបុត្រ
ប្រភព៖ Reuters