ការលក់ឡាននៅអឺរ៉ុបកើនឡើង ប៉ុន្តែ Tesla ធ្លាក់ចុះជិត ៣០%

ការលក់រថយន្តថ្មីរបស់ក្រុមហ៊ុនផលិតរថយន្តអគ្គិសនី Tesla នៅ​អឺរ៉ុប បានធ្លាក់ចុះ ២៨,២ ភាគរយ ​កាលពីខែមីនា ធៀបនឹង​រយៈពេល​ដូចគ្នា​កាលពីឆ្នាំមុន ទោះបីជាការលក់រថយន្តអគ្គិសនីនៅទូទាំងទ្វីប​បាន​​កើនឡើង ២៣,៦ ភាគរយ ក៏ដោយ​។ នេះបើតាម​ទិន្នន័យពីសមាគមក្រុមហ៊ុនផលិតរថយន្តអឺរ៉ុប (ACEA)។

នេះគឺជាព័ត៌មាន​ចុង​ក្រោយ​ដែល​បង្ហាញថា ម៉ាកយីហោ Tesla បាន​ធ្លាក់ចុះ ដោយសារតែ​កំណើន​នៃការប្រកួតប្រជែងពីក្រុមហ៊ុនក្នុងតំបន់ និងក្រុមហ៊ុនចិន​ ក៏ដូចជា​ផលអវិជ្ជមាន​នៃគំនិត និងអាកប្បកិរិយានយោបាយ​របស់​លោក អេឡុន ម៉ាសក៍ ដែលជានាយកប្រតិបត្តិរបស់​ក្រុមហ៊ុន។

ការធ្លាក់ចុះជិត ៣០ ភាគរយ នេះ ធ្វើឱ្យចំណែកទីផ្សារនៅអឺរ៉ុបរបស់ Tesla ធ្លាក់ចុះ​មកនៅត្រឹម ២ ភាគរយ ធៀប​នឹង​ ២,៩ ភាគរយ កាលពី១ឆ្នាំមុន។

ទិន្នន័យរបស់ ACEA ដដែល​បង្ហាញផងដែរថា ក្នុងត្រីមាសទី១ ដើមឆ្នាំ ២០២៥ ការចុះបញ្ជីរថយន្ត Tesla នៅក្នុងអឺរ៉ុប បាន​ធ្លាក់ចុះ​រហូតទៅដល់ ៤៥ ភាគរយ ក្រុមហ៊ុន Stellantis ​នធ្លាក់ចុះ ១៤ ភាគរយ និង ​Mercedes-Benz បានធ្លាក់ចុះ ៦,២ ភាគរយ។

ផ្ទុយទៅវិញ ​ការចុះបញ្ជីរថយន្តរបស់ក្រុមហ៊ុន​អាល្លឺម៉ង់ Volkswagen បាន​កើនឡើង ៤,៨ ភាគរយ ​ក្រុមហ៊ុន Renault ​កើនឡើង ៩,៥ ភាគរយ ខណៈក្រុមហ៊ុនចិន ​SAIC Motor ​បានកើនឡើង​កប់ពពករហូតទៅដល់ ៥២,៣ ភាគរយ។ ​

គិតតែក្នុងខែមីនា ​​ទិន្នន័យបង្ហាញថា​ ការលក់រថយន្តថ្មីសរុបនៅអឺរ៉ុប បានកើនឡើង ២,៨ ភាគរយ ​​ដែលជំរុញដោយកំណើនខ្ពស់នៅអង់គ្លេស និងអេស្បាញ ​បណ្ដាលមកពីកំណើនលក់នៃរថយន្ត EV ​ដែលប៉ះប៉ូវលើការ​លក់ចុះខ្សោយ​​នៃរថយន្តស៊ីសាំង។ យ៉ាងណា​មិញ ការលក់រថយន្តទាំងមូលរបស់អឺរ៉ុប បាន​ធ្លាក់ចុះ ០,២ ភាគរយ នៅខែមីនាដដែល ធៀប​នឹង​រយៈពេលដូចគ្នាកាលពីឆ្នាំមុន៕