ក្រុមប្រឹក្សាភិបាល Tesla ស្វែងរក CEO ជំនួស អេឡុន ម៉ាសក៍ កាលពី១ខែមុន

សមាជិកក្រុមប្រឹក្សាភិបាលក្រុមហ៊ុនផលិតរថយន្តអគ្គិសនី Tesla បានទាក់ទងទៅក្រុមហ៊ុនស្រាវជ្រាវជាច្រើន ដើម្បីស្វែងរកអ្នកចំនួនតំណែងនាយកប្រតិបត្តិ (CEO) របស់លោក អេឡុន ម៉ាសក៍។ នេះបើតាម​ការរាយការណ៍របស់កាសែត Wall Street Journal កាលពីថ្ងៃពុធ ដោយស្រង់សម្ដីប្រភព​ដឹងពីបញ្ហានេះ។

​

Wall Street Journal ផ្សាយថា គេមិនច្បាស់ទេ ថាបច្ចុប្បន្នក្រុមប្រឹក្សាភិបាលរបស់ Tesla បន្តការស្វែងរក ដែលធ្វើឡើងដោយសារការជាប់ពាក់ព័ន្ធការងារនយោបាយក្នុងរដ្ឋបាលប្រធានាធិបតី ដូណាល់ ត្រាំ របស់លោក ម៉ាសក៍ ដែលរួមចំណែកសំខាន់ដល់ការធ្លាក់ចុះការលក់រថយន្ត Tesla និងធ្វើឱ្យ​ផ្សារភាគហ៊ុនក្រុមហ៊ុនចុះខ្សោយ។

កាលពីសប្ដាហ៍មុន លោក ម៉ាសក៍ បាន​និយាយថា លោកនឹង​កាត់បន្ថយពេលវេលាធ្វើការឱ្យរដ្ឋបាល ត្រាំ ហើយបង្កើនការយកចិត្តទុកដាក់សម្រាប់ការដឹកនាំក្រុមហ៊ុនរបស់ខ្លួន ក្រោយរងការរិះគន់ខ្លាំងៗពីចំណាត់ការនយោបាយរបស់លោក ដែលជំរុញឱ្យ​មាន​ការបញ្ឈប់បុគ្គលិករដ្ឋសហព័ន្ធអាមេរិក និងបិទស្ថាប័នសំខាន់ៗផ្សេងៗជាដើម។

ជាមួយគ្នានោះផងដែរ ការគាំទ្រពួកស្ដាំនិយមនៅអឺរ៉ុបរបស់លោក ម៉ាសក៍ បាន​រួមចំណែកខ្លាំងដល់ការធ្លាក់ចុះជាគំហុកនៃការលក់រថយន្តក្នុងតំបន់ ចំពេលដែលមានការប្រកួតប្រជែងកាន់តែខ្លាំងឡើងៗពីក្រុមហ៊ុនផ្សេងៗ ជាពិសេសពីចិន៕