ព័ត៌មានអន្ដរជាតិ

ការលក់រថយន្ត Tesla នៅអឺរ៉ុប បន្តធ្លាក់ចុះខ្លាំងជាង ៤០% ខែមុន

បានផុស

១ year មុន

នៅ

ថ្ងៃពុធ ២៥ មិថុនា ២០២៥

ដោយ

ការលក់រថយន្តរបស់ក្រុមហ៊ុនផលិតរថយន្តអគ្គិសនី Tesla នៅទូទាំងអឺរ៉ុប បានបន្តធ្លាក់ចុះជាគំហុក ទោះបីជាតម្រូវការរថយន្តអគ្គិសនីក្នុងតំបន់កើនឡើងក៏ដោយ។ នេះបើតាមការចុះផ្សាយរបស់កាសែត The Guardian។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យចុងក្រោយពីសមាគមក្រុមហ៊ុនផលិតរថយន្តអឺរ៉ុប (ACEA) បានបង្ហាញថា Tesla បានលក់រថយន្តចំនួន ៨ ៧២៩ គ្រឿង នៅទូទាំងសហភាពអឺរ៉ុប (EU) កាលពីខែឧសភា ដោយធ្លាក់ចុះពី ១៤ ៦៨២ គ្រឿង នៅខែឧសភា។ នោះគឺជាការធ្លាក់ចុះ ៤០,៥ ភាគរយ ដោយកាត់បន្ថយចំណែកទីផ្សារនៅអឺរ៉ុបរបស់ Tesla មកនៅត្រឹម ០,៩ ភាគរយ ពីប្រមាណ ១,៦ ភាគរយ កាលពីឆ្នាំមុន។

ចំណែកឯការលក់របស់ក្រុមហ៊ុនដដែលនៅទូទាំងអឺរុប ដែលរួមមាន EU, EFTA (សមាគមពាណិជ្ជកម្មសេរីអឺរ៉ុប), និងចក្រភពអង់គ្លេស បានធ្លាក់ចុះប្រមាណ ២៧,៩ ភាគរយ នៅខែឧសភា មកត្រឹម ១៣ ៨៦៣ គ្រឿង ដែលធ្វើឱ្យចំណែកទីផ្សារធ្លាក់ចុះមកត្រឹម ១,២ ភាគរយ ធៀបនឹង ១,៨ ភាគរយ នៅខែឧសភា ឆ្នាំមុន។

រូបភាពម្ចាស់ក្រុមហ៊ុន Tesla លោក អេឡុន ម៉ាសក៍ ដែលធ្វើកាយវិការបែបគោរពណាហ្ស៊ី ត្រូវបានដាក់បញ្ចាំងលើជញ្ជាំងក្រុមហ៊ុន Tesla នៅក្បែរទីក្រុងប៊ែកឡាំង អាល្លឺម៉ង់។

តាមការចុះផ្សាយរបស់ទីភ្នាក់ងារសារព័ត៌មានរ៉យទ័រ វាគឺជាការធ្លាក់ចុះការលក់ប្រចាំខែរបស់ Tesla ជាលើកទី ៥ ខណៈការលក់រថយន្តអគ្គិសនីនៅ EU ទាំងមូល បានកើនឡើង ២៥ ភាគរយ នៅខែឧសភា ដល់ ១៤២ ៧៧៦ គ្រឿង ធៀបនឹង ១១៤ ២៣១ គ្រឿង ក្នុងរយៈពេលដូចគ្នាកាលពីឆ្នាំំមុន។

គួរបញ្ជាក់ថា ការលក់រថយន្ត Tesla បានធ្លាក់ចុះរាប់តាំងពីដើមឆ្នាំនៅតាមតំបន់ជាច្រើនទូទាំងពិភពលោក រួមទាំងអឺរ៉ុប និងចិន ដែលគេគូសភ្ជាប់ទៅនឹងកត្តាច្រើនយ៉ាង រួមទាំងការជាប់ពាក់ព័ន្ធនឹងនយោបាយរបស់លោក អេឡុន ម៉ាសក៍ ដែលជានាយកប្រតិបត្តិរបស់ Tesla ដែលបង្កការស្អប់ពីអតិថិជន កង្វះម៉ូដែលរថយន្តថ្មីៗ និងការប្រកួតប្រជែងកាន់តែខ្លាំងឡើងៗ ជាពិសេសពីក្រុមហ៊ុនចិន BYD និង SAIC Motor៕