ក្រុមហ៊ុន Booyoung Group គ្រោងសាងសង់សាកលវិទ្យាល័យ បណ្តុះបណ្តាលវិជ្ជាជីវៈអន្តរជាតិ

ក្រុមហ៊ុន Booyoung Group បានលើកឡើងអំពីការបើកគម្រោងសាងសង់អគារសាលារៀន និងសាកលវិទ្យាល័យបណ្តុះបណ្តាលវិជ្ជាជីវៈអន្តរជាតិ ក៏ដូចជាសាលាគិលានុបដ្ឋាយិកា នៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានអនុញ្ញាតឱ្យអគ្គនាយកក្រុមហ៊ុន Booyoung Group ពិភាក្សាការងារទាក់ទងនឹងសំណើ បើកសាលារៀន សាកលវិទ្យាល័យបណ្តុះបណ្តាលវិជ្ជាជីវៈ ក៏ដូចជាសាលាគិលានុបដ្ឋាយិកា នៅថ្ងៃទី២២ ខែមិថុនា ឆ្នាំ២០២២។

បណ្ឌិតសភាចារ្យ ហង់ជួន ណារ៉ុន មានប្រសាសន៍គាំទ្រដល់គម្រោងបើកសាកលវិទ្យាល័យបណ្តុះបណ្តាលវិជ្ជាជីវៈ ជាពិសេសការបើកសាកលវិទ្យាល័យបណ្តុះបណ្តាលជំនាញគិលានុបដ្ឋាយិកា ដោយយល់ឃើញថា គម្រោងនេះនឹងជួយលើកកម្ពស់ដល់វិស័យអប់រំនៅកម្ពុជាក្នុងរូបភាព បណ្តុះបណ្តាលជំនាញវិជ្ជាជីវៈដល់សិស្សានុសិស្ស ក៏ដូចជាបង្កើតឱកាសការងារបន្ទាប់ពីបញ្ចប់ការសិក្សា។ បណ្ឌិតសភាចារ្យ លើកឡើងថា ក្រសួងអប់រំ យុវជន និងកីឡា នឹងជួយគាំទ្រគម្រោងនេះឱ្យបានជោគជ័យ។

លោកអគ្គនាយកក្រុមហ៊ុន Booyoung Group បានលើកឡើងថា ការបើកគម្រោងសាងសង់អគារសាលារៀន និងសាកលវិទ្យាល័យបណ្តុះបណ្តាលវិជ្ជាជីវៈអន្តរជាតិ ក៏ដូចជាសាលាគិលានុបដ្ឋាយិកា ដើម្បីពង្រឹងវិស័យអប់រំនៅកម្ពុជា ក៏ដូចជាបណ្តុះបណ្តាលជំនាញគិលានុបដ្ឋាយិកាក្នុងប្រទេស និងក្រៅប្រទេសផងដែរ៕