ទាស់ពាក្យ​សម្ដីក្នុងហ្វូងផឹកស៊ី​ បុរស៣នាក់ ​វាយបុរសម្នាក់ស្លាប់​សមត្ថកិច្ចចាប់បានម្នាក់

សមត្ថកិច្ចនគរបាលស្រុកគាស់ក្រឡ បានឃាត់ខ្លួន បុរសម្នាក់ក្នុងចំណោមបក្ខពួក ៣ នាក់ បន្ទាប់ពី​យកកៅអីជ័រ វាយទៅលើជនរងគ្រោះបណ្ដាលឱ្យបាត់បង់ជីវិត​ក្រោយពេលបញ្ជូន​ទៅសង្គ្រោះ​នៅ​មន្ទីរពេទ្យ។

​ហេតុការណ៍នេះបានកើតឡើង​នៅភូមិតាថុក ឃុំធិបតី ស្រុកគាស់ក្រឡ ខេត្តបាត់ដំបង កាលពីថ្ងៃទី២៦ ខែមិថុនា ឆ្នាំ២០២២។

សមត្ថកិច្ចនគរបាលបានឲ្យដឹងថា បុរសជនដៃដល់៣នាក់បានយកកៅអីជ័រវាយទៅលើបុរស​ជនរងគ្រោះម្នាក់ឈ្មោះ ណែម ប៊ុនរិទ្ធ អាយុ៣២ឆ្នាំ រស់នៅភូមិឃុំកើតហេតុចំក្បាល និងក ហើយបានស្លាប់ ក្រោយពេលបញ្ជូនយកទៅសង្គ្រោះនៅមន្ទីរពេទ្យ។

សមត្ថកិច្ចស្រុកគាស់ក្រឡបានដឹកនាំកងកម្លាំងធ្វើការស្រាវជ្រាវ រហូតឃាត់បានខ្លួនជនសង្ស័យ​ម្នាក់​ក្នុងចំណោម៣នាក់ ដែលជនសង្ស័យម្នាក់នេះមានឈ្មោះ វែង វី អាយុ២៤ឆ្នាំ រស់នៅភូមិកន្ទួត ឃុំធិបតី ស្រុកគាស់ក្រឡរ ខេត្តបាត់ដំបង។ មូលហេតុដែលឈានដល់ការប្រព្រឹត្តបែបនេះ គឺដោសារការផឹកស៊ីទាស់ពាក្យសម្តីគ្នា ព្រោះជំពាក់ប្រាក់លេងបាល់ទះជាមួយគ្នា។

បច្ចុប្បន្នសមត្ថកិច្ច កំពុងស្រាវជ្រាវស្វែករកជនសង្ស័យផ្សេងទៀតដែលបានរត់គេចខ្លួន ខណៈ​សង្ស័យ​ដែលសមត្ថកិច្ចចាប់បាន ត្រូវបានកសាងសំណុំរឿងបញ្ជូនទៅតុលាការ៕

អត្ថបទ៖ ឌឿន ចាន់ថាវី