វិថីសិល្បៈ ៩ឆ្នាំរបស់ BTS ត្រូវបានថតជាខ្សែភាពយន្តឯកសារ ដែលនឹងចាក់ផ្សាយឆាប់ៗនេះ

ឈានជើងចូលវិស័យសិល្បៈជិតមួយទសវត្សរ៍ វិថីជីវិតក្រុមតន្ត្រី BTS ត្រូវបានថតជាខ្សែភាពយន្តឯកសារ ដែលនឹងមានចាក់ផ្សាយលើសេវាកម្មស្ទ្រីមរបស់ក្រុមហ៊ុន Walt Disney Co នៅឆ្នាំក្រោយ។ នេះបើតាមការប្រកាសរបស់ក្រុមហ៊ុន កាលពីថ្ងៃចន្ទ ទី១១ ខែកក្កដា ឆ្នាំ២០២២។

ខ្សែភាពយន្តនេះ​នឹង​បង្ហាញ​ខ្លួន​ជា​លើក​ដំបូង​ នៅ​២០២៣ ដោយ​រួម​បញ្ចូល​ទាំង​តន្ត្រី និង​វីដេអូ​របស់​ក្រុម​កូរ៉េ​ខាង​ត្បូង​រយៈពេល​ ៩​ឆ្នាំ​កន្លង​ទៅ។ ខ្សែភាពយន្តចំណងជើង “BTS Monuments: Beyond the Star” ជាខ្សែភាពយន្តភាគបែបឯកសាររៀបរាប់ពីជីវិតប្រចាំថ្ងៃ គំនិត និងផែនការរបស់សមាជិកក្រុម ក្នុងកំឡុងពេលនៃការប្រឡូកក្នុងពិភពតន្រ្តីជិត ១០ឆ្នាំមកនេះ។

ក្រុមហ៊ុន Disney ថ្លែងថា ខ្សែភាពយន្តឯកសារ “BTS Monuments: Beyond the Star” នឹងចេញផ្សាយជាសកលនៅលើសេវាកម្មផ្សាយរបស់ខ្លួន រួមទាំងនៅលើ Disney+ ផងដែរ។ ចំណែកវេទិកាស្ទ្រីមផ្សេងទៀត រួមមាន Hulu និង Disney + Hotstar ក៏មានផ្សាយដែរ។ ក្នុងនោះក្រុមហ៊ុន​មិន​បានបញ្ជាក់ទេថា “BTS Monuments: Beyond the Star” នឹងមាននៅលើទីផ្សារឬអត់ឡើយ។

គួររំលឹកថា កាលពីខែមុនក្រុម K-pop បានប្រកាសពីការបំបែកក្រុមមួយរយៈពេល ខណៈសមាជិកកំពុងសម្រុកធ្វើការលើគម្រោងទោល ប៉ុន្តែជាដំណឹងល្អមួយសម្រាប់ហ្វេនៗ ព្រោះវិថីតន្ត្រីរបស់ក្រុមនេះនឹងលាតត្រដាងលើស្គ្រីនក្នុងពេលដ៏ខ្លីខាងមុខ៕

ប្រែសម្រួល៖ សន្យា

ចុចអាន៖ សមាជិក BST ជាប់ឈ្មោះជាសេដ្ឋី ព្រោះម្នាក់ៗកាន់កាប់ប្រាក់សុទ្ធរាប់សិបលាននៅក្នុងដៃ

ចុចអាន៖ ដឹងអាថ៌កំបាំងរក្សាវ័យមិនចេះចាស់របស់ អតីតតួ ហាន់ជីអ៊ុន