បវរកញ្ញាចក្រវាលវៀតណាម ដណ្ដើមប្រជាប្រិយភាពពីអ្នកគាំទ្រកាន់តែខ្លាំង ព្រោះសកម្មភាពពីរនេះ

បន្ទាប់ពីគ្រងមកុដបវរកញ្ញាចក្រវាលវៀតណាម ឆ្នាំ២០២២ បានពីរសប្ដាហ៍ បវរកញ្ញា Nguyen Thi Ngoc Chau ត្រូវបានស្វាគមន៍យ៉ាងកក់ក្តៅពីអ្នកគាំទ្រនៅឯស្រុកកំណើត ជាពិសេសនាងបានធ្វើរឿងដ៏ភ្ញាក់ផ្អើលពីរយ៉ាង យកឈ្នះចិត្តអ្នកគាំទ្រកាន់តែខ្លាំងឡើង។

ថ្មីៗនេះ បវរកញ្ញាចក្រវាលវៀតណាម អាណត្តិថ្មី បានធ្វើដំណើរត្រឡប់ទៅស្រុកកំណើត នៅឯតៃនិញ (Tay Ninh)។ ជាមួយគ្នាដែរ ហ្វេននៅស្រុកកំណើត បានចូលរួមក្បួនដង្ហែររបស់នាងយ៉ាងច្រើនកុះករ។ ប៉ុន្ទែអ្វីដែលគេផ្ទុះការចាប់អារម្មណ៍ទ្វេដងពីបវរកញ្ញារូបនេះ គឺដោយសារតែក្បួនដង្ហែរវិលត្រឡប់ទៅស្រុកវិញលើកនេះ នាងមិនបានជិះរថយន្តទំទើបនោះទេ។ ផ្ទុយទៅវិញ នាងបែរជិះកង់ជាមួយអ្នកគាំទ្ររាប់សិបនាក់ ធ្វើឱ្យពួកគេរំភើបយ៉ាងខ្លាំង ហើយកាន់តែមានមោទកភាពចំពោះនាង។ មិនតែប៉ុណ្ណោះ គ្រប់គ្នាសរសើរនាងមិនដាច់ពីមាត់ដែលតារាស្រីរូបនេះមានភាពកតញ្ញូចំពោះម្ដាយ ព្រោះមិនថាទៅដល់ទីណា នាងតែងនាំគាត់ទៅជាមួយ ហើយបង្ហាញមុខគាត់ជាសាធារណៈ គួរឱ្យយកគម្រូតាម។

ដោយឡែកចំពោះក្បួនដង្ហែរនេះដែរ តាមពិតមិនមែនធ្វើឡើងសម្រាប់អបអរសាទរនូវជោគជ័យរបស់ Ngoc Chau ដែលបានទទួលជយលាភីឯកជាបវរកញ្ញាចក្រវាលវៀតណាម ២០២២ ឡើយ ប៉ុន្តែវាជាយុទ្ធនាការជិះកង់ឡើងភ្នំ ដើម្បីផ្សព្វផ្សាយវប្បធម៌ និងទេសចរណ៍មាតុភូមិឯណោះទេ។ ទោះយ៉ាងណា តាមរយៈសកម្មភាពនេះ ប្រជាជនវៀតណាមបានដាក់ការជឿជាក់យ៉ាងខ្លាំងលើម្ចាស់តំណែង Miss Universe Vietnam 2022 ថ្មីរបស់ខ្លួន និងរំពឹងថា នាពេលខាងមុខ ទោះជានាងមិនអាចដណ្ដើមជ័យជម្នះលើឆាកអន្តរជាតិក៏ដោយ ប៉ុន្តែក្នុង​នាម​ជា​បវរកញ្ញា​មួយរូប នាងនៅតែ​បន្តធ្វើ​សកម្មភាព​ដ៏​មាន​អត្ថន័យ​សម្រាប់ប្រទេសជាតិរបស់នាងមិនខាន៕

ប្រែសម្រួល៖ សន្យា

ចុចអាន៖ សាវតារមិនធម្មតារបស់បវរកញ្ញាចក្រវាលវៀតណាម ២០២២ នាង Nguyen Thi Ngoc Chau