ក្រសួង​កំពុងរង់ចាំ​លទ្ធផលតេស្ត​មនុស្ស ៥ នាក់​ប៉ះពាល់ផ្ទាល់​ជាមួយ​អ្នកជំងឺ​អុតស្វា

លោកស្រីវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាលមានប្រសាសន៍នៅព្រឹកថ្ងៃទី ២៥ ខែកក្កដានេះថា ក្រសួងសុខាភិបាលកំពុងរង់ចាំលទ្ធផលតេស្តអ្នកប៉ះពាល់ផ្ទាល់ជាមួយអ្នកជំងឺអុតស្វាជនជាតិនីហ្សេរីយ៉ាចំនួន​ ៥នាក់ដែលបានបញ្ជូនសំណាកទៅធ្វើតេស្តកាលពីម្សិលមិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រីវេជ្ជបណ្ឌិត បញ្ជាក់ថា «យើងក៏បានធ្វើតេស្តអ្នកប៉ះពាល់ជាមួយគាត់ទាំង ៥ នាក់កំពុងរង់ចាំលទ្ធផល និងធ្វើការតាមដានសុខភាពពួកគាត់ហើយនឹងដឹងលទ្ធផលឆាប់ៗនេះ»។

លោកស្រីវេជ្ជបណ្ឌិតបានបន្តថា មកដល់ពេលនេះស្ថានភាពអ្នកជំងឺនីហ្សេរីយ៉ាធម្មតាទេគ្រាន់តែយើងបានពិនិត្យ តេស្តគាត់ម្ដងទៀតគឺគាត់នៅតែវិជ្ជមាននៅទ្បើយ។

លោកស្រីវេជ្ជបណ្ឌិតបានបន្តទៀតថា បច្ចុប្បន្ននេះក្រុមគ្រូពេទ្យនៃមន្ទីរពេទ្យខ្មែរសូវៀតបន្តជួយព្យាបាលគាត់និងតាមដានដោយមានការប្រុងប្រយ័ត្នហើយមិនបានគិតប្រាក់ទេ។

បុរសជនជាតិនីហ្សេរីយ៉ាឆ្លងជំងឺអុតស្វានេះមានឈ្មោះ អូសម៉ុងសាហាហ្សីរីមមាន អាយុ ២៧ឆ្នាំបានគេចខ្លួនពីប្រទេសថៃហើយបានធ្វើដំណើរចូលមកប្រទេសកម្ពុជាត្រូវបានសមត្ថកិច្ចរាជធានីភ្នំពេញធ្វើការឃាត់ខ្លួនកាលពីល្ងាចថ្ងៃទី ២៣ កក្កដានៅម្តុំផ្សារដើមថ្កូវ ខណ្ឌចំការរាជធានីភ្នំពេញ សង្កាត់ទួលទំពូង។ បច្ចុប្បន្ននេះបុរសនេះកំពុងសម្រាកព្យាបាលជំងឺនៅមន្ទីរពេទ្យខ្មែរសូវៀត។

គួរបញ្ជាក់ថាគិតត្រឹមល្ងាចថ្ងៃទី ២៤ ខែកក្កដា ឆ្នាំ២០២២ក្រសួងបានរកឃើញអ្នកពាក់ព័ន្ធ សរុបចំនួន ៥នាក់ហើយ  ដែលបានណែនាំឱ្យពួកគាត់នៅដោយឡែកនិងតាមដានសុខភាពហើយពួកគាត់ទាំង ៥នាក់នេះ មិនទាន់បង្ហាញសញ្ញាណាមួយ ដែលបញ្ជាក់ពីការឆ្លងនៅឡើយទេ។

ប៉ុន្តែត្រូវរាយការណ៍ជូនក្រុមគ្រូពេទ្យ ប្រសិនបើមានចេញរោគសញ្ញាណាមួយដែលសង្ស័យ និងរក្សាសណ្តាប់ធ្នាប់សុវត្ថិភាពឃ្លាំមើលដោយអាជ្ញាធរមានសមត្ថកិច្ចនៃរដ្ឋបាលរាជធានីភ្នំពេញ៕

អត្ថបទ៖ សំអឿន