សម្ដេចតេជោ ហ៊ុន សែន បញ្ជាក់អំពីការស្នើមន្ត្រីអឺរ៉ុប និងអាមេរិក ឲ្យពិនិត្យឡើងវិញអំពីការដាក់ទណ្ឌកម្មរុស្ស៊ី

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់អំពីការស្នើរបស់សម្ដេច ទៅកាន់តំណាងជាន់ខ្ពស់សហភាពអឺរ៉ុប និងទៅកាន់រដ្ឋមន្រ្តីក្រសួងការបរទេសអាមេរិក អំពីការដាក់ទណ្ឌកម្មទៅលើប្រទេសរុស្ស៊ី ដែលទណ្ឌកម្មនេះ មិនប៉ះពាល់ត្រឹមតែរុស្ស៊ីនោះទេ តែប៉ះពាល់ដល់សេដ្ឋកិច្ចពិភពលោក ក៏ដូចប្រទេសកម្ពុជា ផងដែរ។

ក្នុងពេលអញ្ជើញទទួលសញ្ញាបត្របណ្ឌិតកិត្តិយសផ្នែកអភិវឌ្ឍន៍ ពីសាកលវិទ្យាល័យភូមិន្ទភ្នំពេញ នាព្រឹកថ្ងៃទី ៥ ខែសីហានេះ សម្ដេចតេជោ ហ៊ុន សែន បានថ្លែងថា មានការផ្សព្វផ្សាយរួចហើយ អំពីការស្នើរបស់សម្ដេច ទៅកាន់តំណាងជាន់ខ្ពស់សហភាពអឺរ៉ុប និងទៅកាន់រដ្ឋមន្រ្តីក្រសួងការបរទេសអាមេរិក ដែលឲ្យមានការពិនិត្យឡើងវិញអំពីការដាក់ទណ្ឌកម្មរុស្ស៊ី។

សម្ដេចតេជោនាយករដ្ឋមន្ត្រី បានថ្លែងបន្តថា «យើងដឹងច្បាស់ហើយថា បញ្ហាវាចាប់ពីរុស្ស៊ី ទៅអ៊ុយក្រែន សង្គ្រាមរុស្ស៊ី-អ៊ុយក្រែន ផ្ដើមពីមូលហេតុនោះ ចាប់ផ្ដើមដាក់ទណ្ឌកម្ម ដល់ទណ្ឌកម្មនេះ វាបង្កើតឲ្យមានវិបត្តិមិនមែនគ្រាន់តែរុស្ស៊ីឯណា វិបត្តិនៅអឺរ៉ុបខ្លួនឯង យើងវិបត្តិដល់យើងនេះ ដែលកំពុងឡើងថ្លៃប្រេងនេះ បានជាយើងខ្ញុំស្នើឲ្យមានការពិចារណាឡើងវិញ អំពីបញ្ហានេះ។

បើតាមសម្ដេចតេជោ ហ៊ុន សែន ការស្នើឲ្យពិនិត្យពិចារណានេះ គឺធ្វើយ៉ាងណាដើម្បីកាត់បន្ថយផលប៉ះពាល់ ទៅលើសេដ្ឋកចិ្ចពិភពលោក។ សម្ដេចតេជោនាយករដ្ឋមន្ត្រិ បានបន្ថែមទៀតថា «តែនេះ គឺជាការគិតគូររបស់ប្រទេសតូចមួយ តែស្មើភាព ស្មើសិទ្ធិ អ្នកមានសិទ្ធិនិយាយ ខ្ញុំគិតគូរ និងនិយាយដែរ ហើយមានឱកាសនិយាយ ត្រូវតែនិយាយព្រោះជួបមុខផ្ទាល់ហើយ»។

សូមជម្រាបថា ក្នុងពេលជួបពិភាក្សាជាមួយលោក ចូសិប បូររែល ហ្វុនតេលលេស (Josep Borrll Fontelles) តំណាងជាន់ខ្ពស់សហភាពអឺរ៉ុបទទួលបន្ទុកកិច្ចការបរទេស និងសន្តិសុខ នយោបាយ និងជាអនុប្រធានគណៈកម្មការអឺរ៉ុប កាលពីថ្ងៃទី ៤ ខែសីហា ឆ្នាំ ២០២២ សម្តេចតេជោ ហ៊ុន សែន បានស្នើឲ្យមានការពិនិត្យឡើងវិញ អំពីការដាក់ទណ្ឌកម្មរុស្ស៊ី ព្រោះថា ការដាក់ទណ្ឌកម្មនេះ មិនប៉ះពាល់តែរុស្ស៊ីទេ តែវាធ្វើឲ្យមានការប៉ះពាល់យ៉ាងធ្ងន់ធ្ងរទាំងសេដ្ឋកិច្ច សង្គមទាំងនៅអឺរ៉ុប និងទូទាំងពិភពលោក។

ចំណែកនៅក្នុងជំនួបជាមួយលោក Antony J. Blinken រដ្ឋមន្រ្តីក្រសួងការបរទេសអាមេរិក សម្ដេចតេជោ ហ៊ុន សែន ក៏បានស្នើឲ្យមានការពិនិត្យឡើងវិញ អំពីការដាក់ទណ្ឌកម្មទៅលើប្រទេសរុស្ស៊ី ដែលទណ្ឌកម្មនេះ មិនប៉ះពាល់ត្រឹមតែរុស្ស៊ីនោះទេ តែប៉ះពាល់ដល់សេដ្ឋកិច្ចពិភពលោក ក្នុងនោះរួមទាំងកម្ពុជាផងដែរ៕

អត្ថបទ៖ ឃួន សុភ័ក្រ