តំបន់ភាគច្រើននៃពិភពលោកនឹងជួបសីតុណ្ហភាពក្ដៅខ្លាំងបំផុតនៅឆ្នាំ ២១០០

បើយោងតាមឯកសារស្រាវជ្រាវចុងក្រោយបានឲ្យដឹងថា តំបន់ភាគច្រើននៃពិភពលោកនឹងស្ថិតក្នុងសីតុណ្ហភាពក្ដៅខ្លាំងបំផុតនៅឆ្នាំ ២១០០ ជាពិសេសតំបន់ត្រូពិច និងអនុតំបន់ត្រូពិច រួមទាំងឧបទ្វីបឥណ្ឌា ផ្នែកធំៗនៃឧបទ្វីបអារ៉ាប់ និងអនុតំបន់សាហារ៉ាអាហ្រ្វិកជាដើម ។

ការ​សិក្សា​បាន​ព្រមាន​ថា វា​ទំនង​ជា​នឹង​កើត​ឡើង​ បើ​ទោះ​បី​ជា​យើង​ទទួល​បាន​ជោគជ័យ​ក្នុង​ការ​កំណត់​ការ​ឡើងកម្ដៅ​ផែនដី​ដល់ ២ អង្សា​សេ​លើស​កម្រិត​មុន​ឧស្សាហកម្ម​ក៏​ដោយ ហើយតំបន់ពាក់កណ្តាលរយៈទទឹងជុំវិញពិភពលោក យ៉ាងហោចណាស់នឹងជួបប្រទះរលកកំដៅខ្លាំងជារៀងរាល់ឆ្នាំ ។

ជាឧទាហរណ៍ នៅទីក្រុងឈីកាហ្គោ សហរដ្ឋអាមេរិក អ្នកស្រាវជ្រាវព្យាករណ៍ពីការកើនឡើង ១៦ ដងនៃរលកកម្ដៅដ៏គ្រោះថ្នាក់នៅចុងសតវត្សនេះ ជាពិសេសប្រសិនបើការបំភាយឧស្ម័នផ្ទះកញ្ចក់មិនត្រូវបានកាត់បន្ថយ” ។

ការសិក្សាបានបន្ថែមទៀតថា អ្នកដែលងាយរងគ្រោះបំផុតចំពោះបញ្ហាសុខភាពធ្ងន់ធ្ងរដែលបណ្តាលមកពីរលកកម្ដៅខ្លាំងគឺមនុស្សចាស់ អ្នកក្រ និងកម្មករក្រៅផ្ទះ ហើយបើគ្មានវិធានការសម្របខ្លួនទេ វានឹងបង្កើនអត្រាកើតជំងឺទាក់ទងនឹងកម្ដៅ ហើយនឹងកាត់បន្ថយសមត្ថភាពការងារក្រៅផ្ទះនៅក្នុងតំបន់ជាច្រើន ដែលប្រកបការងារធ្វើកសិកម្មចិញ្ចឹមជីវិត ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ មកដឹងខ្ទង់ចំណាយសម្រាប់ពិធីបុណ្យសពថ្នាក់រដ្ឋរបស់លោក Abe