រុស្ស៊ី បង្ហាញឈ្មោះប្រទេស និងចំនួនទាហានចូលរួមក្នុងសមយុទ្ធ “Vostok-2022” (មានវីដេអូ)

ក្រសួងការពារជាតិរុស្ស៊ីបានជូនដំណឹងថា សមយុទ្ធយោធាពហុភាគី “Vostok-2022” នឹងត្រូវធ្វើឡើងចាប់ពីដើមខែកញ្ញា នៅតំបន់យោធាភាគខាងកើតរបស់ប្រទេសរុស្ស៊ី ហើយនឹងមានការចូលរួមពីទាហានជាង ៥០,០០០ នាក់ ។

ក្រសួងការពារជាតិបាននិយាយនៅក្នុងសេចក្តីថ្លែងការណ៍មួយថា “សមយុទ្ធយុទ្ធសាស្ត្រ ‘Vostok-2022’ នឹងប្រព្រឹត្តទៅ ចាប់ពីថ្ងៃទី ១ ខែកញ្ញាដល់ថ្ងៃទី ៧ ខែកញ្ញា ឆ្នាំ ២០២២ ក្រោមការដឹកនាំរបស់អគ្គសេនាធិការនៃកងកម្លាំងប្រដាប់អាវុធនៃសហព័ន្ធរុស្ស៊ី ជាមួយនឹងការបណ្តុះបណ្តាលជាក់ស្តែងនៃសកម្មភាពការពារ និងវាយលុកនៅខ្សែរត្រៀមចំនួន ៧ នៃតំបន់យោធាភាគខាងកើត ។

ក្រសួងការពារជាតិបញ្ចាក់ថា ក្រៅពីមានការចូលរួមពីទាហានជាង ៥០,០០០ នាក់ ក្នុងនោះក៏មានអាវុធ និងសម្ភារៈយោធាជាង ៥,០០០ គ្រឿង រួមទាំងយន្តហោះចំនួន ១៤០ គ្រឿង, នាវាចម្បាំង ៦០ គ្រឿង, ទូក និងនាវាគាំទ្រនឹងលេចវត្តមានក្នុងសមយុទ្ធនោះផងដែរ ។

ទន្ទឹមនោះ សមយុទ្ធនេះនឹងមានការចូលរួមពីសមាជិកនៃអង្គការសន្ធិសញ្ញាសន្តិសុខសមូហភាព (CSTO) និងអង្គការសហប្រតិបត្តិការសៀងហៃ (SCO) ក៏ដូចជារដ្ឋជាដៃគូផ្សេងទៀតរួមមាន ប្រទេសអាស៊ែបៃហ្សង់, អាល់ហ្សេរី, អាមេនី, បេឡារុស, ឥណ្ឌា, កាហ្សាក់ស្ថាន, កៀហ្ស៊ីស៊ីស្ថាន, ចិន, ឡាវ, ម៉ុងហ្គោលី, នីការ៉ាហ្គា, ស៊ីរី និងតាហ្ស៊ីគីស្ថាន ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រុស្ស៊ី បាញ់មីស៊ីលកម្ទេចឃ្លាំងស្តុកប្រេងសម្រាប់ផ្គត់ផ្គង់ដល់ទាហាន អ៊ុយក្រែន