លោកស្រី ឱ វណ្ណឌីន ៖ ការបង្ខិតសេវាសុខាភិបាល មានន័យថា ផ្ដល់លទ្ធភាពគ្រប់យ៉ាងឲ្យពលរដ្ឋ អាចស្វែងរកសេវាសុខាភិបាលបាន

មន្ត្រីជាន់ខ្ពស់ក្រសួងសុខាភិបាល បានបញ្ជាក់នូវពាក្យដែលធ្លាប់លើកឡើងថា បង្ខិតសេវាសុខាភិបាលឲ្យទៅជិតប្រជាពលរដ្ឋ ដោយកន្លងមកមានការយល់ច្រលំថា ទាល់តែភូមិឃុំនោះមានមន្ទីរពេទ្យទំនើប។

លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល មានប្រសាសន៍ក្នុងសន្និ​សីទសារព័ត៌មាន ស្ដីពី “សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួងសុខាភិបាល” នាព្រឹកថ្ងៃទី ១៥ ខែកញ្ញានេះថា កន្លងមកមានការយល់ច្រលំនូវពាក្យថា ការបង្ខិតសេវាសុខាភិបាលឲ្យទៅជិតប្រជាពលរដ្ឋ ទាល់តែភូមិឃុំនោះមានមន្ទីរពេទ្យទំនើប តែមិនមែនដូច្នេះឡើយ។

លោកស្រី ឱ វណ្ណឌីន បានថ្លែងថា «ពាក្យថា បង្ខិតសេវា គឺផ្ដល់លទ្ធភាពសព្វបែបយ៉ាង ជាពិសេសភាសាអង់គ្លេសថា អាក់សេសស៊ីប៊ីលីធី មានន័យថា ការដែលប្រជាពលរដ្ឋលោកអាចទៅស្វែងរកសេវាសុខាភិបាលបាន ដោយមិនមានរបាំងអ្វីទាំងអស់ ហើយរបាំងដែលធំនោះបច្ចុប្បន្ននេះ គឺរបាំងហិរញ្ញវត្ថុ»។

លោកស្រីរដ្ឋលេខាធិការ បានឲ្យដឹងបន្តថា ពាក់ព័ន្ធនឹងរបាំងហិរញ្ញវត្ថុនេះ គឺប្រមុខរាជរដ្ឋាភិបាល និងក្រសួងសេដ្ឋកិច្ច និងហិរញ្ញវត្ថុ ក៏ដូចជាក្រសួងសុខាភិបាល បានគិតគូរដើម្បីចេញនូវគោលនយោបាយគាំពារសុខភាពសង្គម។ ទន្ទឹមនឹងនោះ កម្ពុជា ក៏បានដើរមួយជំហានរួចទៅហើយ នៅក្នុងការគិតគូរជួ​យ​ទៅដល់ប្រជាពលរដ្ឋក្រីក្រ ដោយប្រើប្រាស់នូវប័ណ្ណមូលនិធិសមធម៌។

អ្នកនាំពាក្យក្រសួងសុខាភិបាលរូបនេះ បានបញ្ជាក់ទៀតថា «មានន័យថា ផ្ដល់លទ្ធភាពសព្វបែបយ៉ាងទាំងអស់ ដើម្បីឲ្យបងប្អូនប្រជាពលរដ្ឋ​ មានលទ្ធភាពអាចទៅប្រើប្រាស់សេវាបាន ដោយមិនមានរបាំង ហើយទន្ទឹមនឹងនោះ គោលដៅរបស់យើង គឺយើងចង់សម្រេចឲ្យបាន ដោយមិនទុកប្រជាពលរដ្ឋណាម្នាក់ ដែលគាត់មិនមានលទ្ធភាពទៅទទួលសេវានោះទេ»៕

អត្ថបទ៖ ឃួន សុភ័ក្រ