មហោស្រពអក្សរសិល្ប៍លើកទី៥ ត្រៀមអង្រួន ក្រុងពោធិ៍សាត់ លើកទី១ ចំនួន ៣ថ្ងៃ

មហោស្រពអក្សរសិល្ប៍លើកទី៥ ប្រធានបទ “មរតករស់នៃអក្សរសិល្ប៍” កំពុងត្រៀមអង្រួន ខេត្តពោធិ៍សាត់ លើកទី១ ចំនួន ៣ថ្ងៃ ដែលនឹងប្រារព្ធជាផ្លូវការចាប់ពីថ្ងៃទី២១ ដល់ថ្ងៃទី២៣ ខែតុលា ឆ្នាំ២០២២នេះ នៅវិទ្យាល័យ ពោធិ៍សាត់ និងទីតាំងជាច្រើនទៀតនៅក្នុងក្រុងពោធិ៍សាត់។

មហោស្រពអក្សរសិល្ប៍ខ្មែរ លើកទី៥ មានកម្មវិធី​​ពិសេសៗ​ជាច្រើន​ដូចជា ទស្សនកិច្ចវប្បធម៌ រាត្រីអំណាន អំណានអំពីពោធិ៍សាត់ សិក្ខាសាលានិពន្ធ វេទិកាពិភាក្សា ពិព័រណ៍មរតកអក្សរសិល្ប៍ សួនកំណាព្យសិល្បៈ កម្មវិធីប្រកាសជ័យលាភីអក្សរសិល្ប៍ និងការសម្ដែងទស្សនីយភាព ដែលមានរបាំប្រចាំខេត្តពោធិ៍សាត់ ល្ខោនអាន និងល្ខោននិយាយ ចម្រៀង និងចាប៉ីដងវែងផងដែរ។

ប្រធានកម្មវិធី នៃមហោស្រពអក្សរសិល្ប៍ខ្មែរ លោក ឥន្ទ សម៉ាណាក់ បានបញ្ជាក់ថា មហោស្រព អក្សរសិល្ប៍ខ្មែរលើកទី៥ឆ្នាំនេះ នឹងប្លែកភ្នែក ព្រោះរៀបចំនៅខេត្តពោធិ៍សាត់ដែលមិនសូវជាមានការរៀបចំកម្មវិធីបែបសិល្បៈវប្បធម៌នោះទេ។ ជាពិសេសមហោស្រពនឹងរៀបចំនៅវិទ្យាល័យពោធិ៍សាត់ ដែលមានសិស្សានុសិស្ស និងលោកគ្រូអ្នកគ្រូកំពុងសាទររង់ចាំចូលរួម។

លោក លោក ឥន្ទ សម៉ាណាក់ លើកឡើងថា៖ “ខ្ញុំសូមអញ្ជើញអ្នកនៅភ្នំពេញ និងខេត្តផ្សេងទៅចូលរួមមហោស្រព ដើម្បីឈ្វេងយល់ពីគុណតម្លៃ និងមរតករស់នៃអក្សរសិល្ប៍ខ្មែរ ព្រមទាំងបានស្គាល់ពីសិល្បៈវប្បធម៌នៅក្នុងខេត្តពោធិ៍សាត់ផងដែរ”។

ជាទូទៅ មហោស្រពអក្សរសិល្ប៍ខ្មែរ ​មានគោលបំណងធំៗបីគឺ៖ ១. កសាងសហគមន៍អក្សរសិល្ប៍សម្រាប់ទស្សនិកជនកម្ពុជា, ២. បង្កើនគុណតម្លៃរបស់អ្នកនិពន្ធ ជាពិសេសផ្តោតលើគុណតម្លៃអភិវឌ្ឍសង្គម និង ៣. ពង្រីកឱកាស ដៃគូ​ និងទីផ្សារសម្រាប់អ្នកនិពន្ធ និងអ្នកបោះពុម្ពកម្ពុជា។

អ្នកនិពន្ធ សូ ភីណា ស្ថាបនិកមហោស្រពអក្សរសិល្ប៍ខ្មែរ ​បានមានប្រសាសន៍ថា ការប្រារព្ធមហោស្រពអក្សរសិល្ប៍ខ្មែរនៅខេត្តពោធិ៍សាត់ មានតម្លៃថ្លៃមិនអាចកាត់ថ្លៃបាន។

អ្នកនិពន្ធ សូ ភីណា លើកឡើងថា៖ “ជាពលរដ្ឋ និងអ្នកនិពន្ធ ដែលមានដើមកំណើតនៅខេត្តពោធិ៍សាត់ ដែលជាខេត្តមួយមានសក្តានុពលសិល្បៈ វប្បធម៌ពិសេសមួយ មហោស្រពនេះធ្វើឱ្យខ្ញុំរំភើបចិត្តជាខ្លាំង។ ការប្តេជ្ញាចិត្តរៀបចំមហោស្រពនេះ មិនអាចកើតឡើងបានទេ ប្រសិនបើគ្មានអ្នកស្ម័គ្រចិត្តជាច្រើនរូប ពុះពារមិនខ្លាចនឿយហត់”។  

មហោស្រពអក្សរសិល្ប៍ខ្មែរលើកទី៥ បានទទួលការគាំទ្រពីក្រសួងវប្បធម៌ និងវិចិត្រសិល្បៈ ក្រសួងអប់រំ យុវជន និងកីឡា ក្រសួងព័ត៌មាន រដ្ឋបាលខេត្តពោធិ៍សាត់ សហគមន៍អក្សរសិល្ប៍នានា និងសប្បុរសជន និងសាធារណជនជាច្រើនរូប។ ការចែករំលែកថវិកាដើម្បីគាំទ្រការប្រព្រឹត្តិទៅនៃមហោស្រព ជាកាយវិការគួរឱ្យគោរព និងកក់ក្តៅបំផុត។ ដើម្បីឈ្វេងយល់កាន់តែច្បាស់អំពីការប្រព្រឹត្តិទៅកម្មវិធីមហោស្រពអក្សរសិល្ប៍ខ្មែរ លោក លោកស្រីអាចតាមដានទំព័រហ្វេសប៊ុកមហោស្រពអក្សរសិល្ប៍ខ្មែរ Khmer Literature Festival ឬតាមរយៈទូរសព្ទលេខ ០១០ ៩៤១ ២២៤៕